Cun s’arribu de mìgia de turistas istràngios, is espertos sollètzitant s’aumentu de is controllos in is portos e aeroportos de s’Ìsula

43 casos totales in Sardigna: custos is nùmeros atuales de sa variante Deltas atzertados e secuentziados in is laboratòrios de s’Aou de Casteddu e de s’Aou de Tàtari.

In s’Ìsula si càstiat cun pensamentu a s’istajone turìstica, cando ant a èssere mìgias is arribos fintzas dae s’èsteru.

Pro immoe, faghet ischire s’assessoradu regionale de sa Sanidade, no est possìbile istabilire su pesu cumplessivu in sa regione, mancari a su nord siat prus fidùndida sa variante indiana.

Is datos sunt cunditzionados dae s’epitzentru iscasiddadu in is iscenas de su film Disney “La Sirenetta” a Trinidade de Agultu, tra sa bidda e sa localidade turìstica Ìsula Ruja, Bintiduos is contàgios, àteros 7 – totus cun variante Delta – sunt istados agatados su 22 làmpadas coladu e secuentziados dae su laboratòriu de s’Aou de Tàtari.

Sa timoria chi is contàgios aumentent at cumbintu su sìndigu de Trinidade de Agultu a mantènnere s’òbrigu de is maschereddas fintzas a s’abertu e su ritiru dae is 23.30 a is 5 de su mangianu finas a su 30 làmpadas.

In su tzentru-sud Sardigna su pesu est galu bassa, respetu a sa variante dominante e devènnida endèmica – cussa Alfa, ex inglesa – ma tocat a donare prus cura in is tratzamentos de is cuntatos e in sa preventzione.

S’ùnica cosa de fàghere pro limitare is contàgios est cussa de aumentare is controllos in portos e aeroportos. Is ùrtimos casos de variante Delta individuados dae su laboratòriu de Casteddu sunt istados agatados sàbadu: una giòvana de 22 annos de Tertenia e una fèmina de 96 annos casteddaja.

Sa situatzione si podet galu gestire, ma is noas chi arribbant dae s’èsteru, cun una crèschida de is casos a càusa de sa variante noa e is vatzinatziones chi no ant interessadu totu is categorias de edade, creat meda pensamentu. Pro custu est pretzisu a coitare cun s’immunizatzione de totu sa populatzione.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Comente aìamus naradu a in antis de sa partida, sa gara contra is austrìacos est istada traballosa meda. Difatis sunt serbidos is tempos suplementares pro detzìdere cale iscuadra si diat èssere cualificada a is cuartos de finale de is Europeos.

Una gara a ue is austrìacos ant fatu de totu pro istorbare su bellu giogu de is Asulos, betendesi a pitzu de ogna botza e serrendesi in difesa ma prontos a su contratacu.

Is aversàrios sunt resèssidos a marcare una rete puru, cun Arnautovic – su giogadore prus balente de sa natzionale austrìaca – ma su VAR at annulladu su gol pro ite fiat foras de giogu.

A pustis de is noranta minutos de is tempos regulares, sa gara est abarrada in ecuilìbriu finas a is tempos suplementares, cando su tertzinu Spinazzola at serbidu una botza a Chiesa chi fiat lìberu in s’àtera banda de su campu. Su giogadore italianu est istadu bravu meda a firmare sa botza cun su pè e a marcare sa rete.

Su duos a zero pro is Asulos est lòmpidu unos deghe minutos a pustis, cun su tzentrucampista Pessina, chi at aici fatu duos gol in duas partidas.

Mèritu mannu però est istadu de s’allenadore Mancini, chi at intzertadu is càmbios de is duos giogadore, paris cun s’atacante Belotti chi at pigadu a pala s’iscuadra contra sa defensa austrìaca.

Is aversàrios ant donadu pensamentu a s’Itàlia finas a s’ùrtimu minutu, sena s’arrèndere mai, marchende sa rete de su 2-1 cun Kalajdzic e chirchende su parègiu pro lòmpere a is rigores, ma pro de badas.

Is òmines de Mancini immoe ant agatare su Bèlgiu, una de is iscuadras prus fortes de is Europeos. Chi podet bantare giogadores comente Lukaku, Hazard, De Bruyne e Curtois, giustu pro nde remonare calicunu ebbia.

Ma s’Itàlia at fàghere sa parte sua e at a chircare de bìnchere: unu bellu regalu pro is immigrados italianos in Bèlgiu e pro is fìgios issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”