Comintzat a apessamentare sa crèschida de is casos de Covid-19 in s’Ìsula.

Cun 16 persones positivas a su Covid, de is cales una deghina contagiadas dae sa variante Delta, e 50 in cuarantena, a Usini, in provìntzia de Tàtari, su livellu de atentzione restat artu e su sìndigu Antonio Brundu pròrogat is limitatziones finas a su 19 de onniasantu.

A su presente abbarrant firmas note e die totus is atividades de ispetàculu, musica, dantza e teatru, siat in logos serrados siat as’abertu, e abbarrat proibida sa suministratzione de cosa de bufare alcòlicas de asportu a pustis de is 22, mesuras adotadas su 5 de argiolas coladu a pustis de s’iscoberta de un’epitzentru epidèmicu de sa variante Delta de su virus in bidda.

In acòrdiu cun s’Ats Sardigna est istada fata in deretura una campagna de controllu, cun 537 tampones chi ant iscoviadu duos positivos noos.

Comente at ispiegadu su sìndigu usinesu, tentu contu de s’iscassa tzirculatzione virale e de èssere resèssidos a atremenare pro s’ora sa cadena de su contàgiu, s’at a pòdere evitare de impreare àteras mesuras graes e dannosas in custu momentu de dificultade.

Su pesu de is infetziones de virus SarsCoV2 est creschidu belle in totu is regiones – 19 – e, in oto de custas sa crèschida de cada chida est istada de prus de su 50%: est sa mapa chi nde istupat dae is balores postos in su giassu CovidTrends, chi dae meses sighit s’andamentu de s’epidèmia de Covid-19 in Itàlia.

Nde essit a campu una mapa s’Itàlia in biancu e nieddu in ue sa situatzione est diversa meda. Segundu is datos, agiornados a s’11 de argiolas, in s’ùrtima chida est istadu su Molise a registrare sa crèschida majore, cun su 257%, posca sa Sardigna (+146%) e su Vènetu (123%); sighint a distàntzia, cun balores superiores a su 50%: Làtziu (+84%), Ligùria (+71%), Emìlia Romagna,Toscana e Campània (+56%).

Àteras sete regiones ant registradu una crèschida cumprèndida tra su 20% e su 50%: provìntzia autònoma de Boltzanu (+48%), Lombardia (+43%), Calàbria (+40%), Sitzìlia (+36%), Marche (+33%), Umbria (+32%), Piemonte (+26%). Su pesu in s’ùrtima chida est istada inferiore a su 20% in Friuli-Venètzia Giùlia (18%), Pùglia (+17%), Abrutzu (13%) Basilicata (+8%), cun sa provìntzia autònoma de Trentu e sa Badde de Aosta, chi registrant crèschidas negativas de -24% sa prima e de -46% sa segunda.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Is Asulos sunt is Campiones de Europa.

Custa est sa segunda vitòria de su torneu pro natziones de su continente, a pustis de cussa de su 1968 a is tempos de Fachetti, Mazzola, Riva e Rivera, giustu pro nomenare calicunu giogadore balente de tando.

Una copa chircada in su 2000 contra sa Francia e in su 2012 contra s’Ispagna, ma totu e is duas is bortas s’Itàlia at perdidu sa finale.

Non custa bia però, cun is òmins de Mancini chi sunt renèssidos a bìnchere contra s’Inghilterra a Wembley.

Una partida istragosa meda, cun sa rete marcada de is inglesos, a pustis una pariga de minutos dae su frùsciu de s’àrbitru. Difatis su terzinu Shaw, a pustis de tres minutos, at fatu gol pro more de Di Lorenzo chi no dd’at frimadu e Donnarumma no at cungiadu bene su primu palu.

Gràtzias a su vàntagiu de 1-0, is meres de domu ant istronadu s’Itàlia, chi casi pro totu su primu tempus no est renèssida a intrare in partida e a portare is òmines suos a in antis.

Pro bona sorte sua s’Itàlia at mantèsiu sa defensa, cun Chiellini e Bonucci chi no ant lassadu tretu a su capitanu inglesu Kane, semper prontu pro fàghere gol. S’allenadore Mancini s’est ispramadu candu s’est ingortu su regista de s’iscudra asula, Jorginho. Imbetzes su giogadore de su Chelsea at istrintu is dentes e est abbaradu in campu.

Su segundu tempus est istadu un’àtera partida pro sa natzionale italiana, cun Mancini chi in s’ispozadòrgiu est istadu capatzu de tocare is cordas giustas de is giogadore, chi sunt torrados in su rètangulu birde comente dimónios. Sunt serbidos is càmbios puru: cun Belotti chi est intradu a su postu de Immobile e Cristante chi at remplassadu a Barella.

Difatis ant cungiadu is inglesos in s’area issoro e a pustis de medas ocasiones, Bonucci est renèssidu a marcare sa rete de su parègiu un’atzione in mìscia.

A pustis de custu gol su resurtadu però no est cambiadu, si non cun is rigores chi ant decraradu s’iscudra binchidora.

Dae is ùndighi metros, gràtzias a Donnarumma chi at paradu duos tiros, sa Natzionale est torrada Campione de Europa a pustis de 53 annos, e in Itàlia est cumintzada sa festa.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”