Sighit sa discussione in Consìgiu regionale a pitzu de s’interpretatzione autèntica de su Ppr, bòlida dae sa magioràntzia pro defensare su fràigu de sa Tàtari- S’Alighera a bator corsias.

Giòbia sa sèida s’est concruida a tardu mannu de note, e sena unu bia lìberu definitivu.

S’Àula at sighidu a traballare finas is 3.30, esaminende is emendamentos presentados dae is fortzas de opositzione.

In totale is propostas de modìfica fiant su bellu de 690, e prus de 500 sunt in fase de discussione. De pònnere a notu chi giòbia su Consìgiu at tentu su tempus pro nde botare e pro nde bullare isceti una bintina ebbia. Custu, pro ite a pitzu de ognuna ddoe sunt istados diversos interventos de is cussigeris de is Progressistas, LeU, M5s e Pd.

In prus sa lista de is emendamentos s’est reduida de belle una chentina, gràtzias a s’aprovatzione de una proposta presentada dae sa Giunta regionale.

Custu emendamentu, mutidu “tagliola” o “canguru”, at permìtidu de fàghere custa iscremadura, pro ite iscritu in modu chi sa discussione de is propostas de is fortzas de minoria esserent inùtiles.

Custas sunt in custu modu decadidas, e ant a cunsentire de impressire su traballu de is dies imbenientes, fintzas si est prevìdida un’àtera maratona isconchiosa.

Su personale de su Cussìgiu est istadu “liberadu” solu gràtzias a sa cunferèntzia de is capu-grupos, cunvocada a inghìriu a is 2.00 de note. In custu atopu s’est detzìdidu de protzedire pro un’àtera ora, e infines de acabbare pro cunsentire su recùperu giustu a is addetos impinnados in Àula e in is ufìtzios collegados.

Ma atentzione nche diant pòdere èssere isvilupos incredìbiles in sa sèida imbeniente programmada dae su Cussìgiu de is ministros, segundu s’opositzione.

Difatis su guvernu natzionale diat pòdere espressare unu pàrrere subra sa bator corsias chi diat superare cussu negativu de sa subrintendèntzia e de su Mibact.

Custa mediatzione de su Consìgiu de is ministros in base a su Ppr etotu, chi a s’artìculu 20 de is normas atuativas, previdet dèrogas a is vìnculos paesagìsticos s’in casu de sa realizatzione de òperas pùblicas de interessu regionale.

Cun custu interventu, afirmant is opositziones, diat eessere leadu a sa giunta de Christian Solinas s’argumentu fundamentale a difesa de s’aprovatzione de sa lege in discussione.

In un post pùblicu s’ex sìndigu de Casteddu Massimo Zedda at pubblicadu su cumentu indiritzadu a su Guvernadore Solinas in riferimentu a sa abertura sena controllos de portos e aeroportos sardos.

Un’atacu frontale, chi bullat sa lìnia polìtica tenta dae Christian Solinas in is ùrtimos meses.

«Su Presidente de sa Regione aberit totu, portos e aeroportos, sena controllu perunu – si leghet in su post- in su mentres chi in is televisiones e in is giornales naraiat de bòlere crastinare s’arribu de is turistas, pro contivigiare sa salude de is sardos cun passaportos, esàmines, anàlisis de su sàmbene, tampones e gosi sighende, in sa matessi ora iscriiat a su Ministru de is trasportos pro pedire de torrare a abèrrere totu. Est unu machiore: imbetzes de nd’aprofitare de su fatu chi s’Ìsula apat tentu unu nùmeru bassu de impestados e de traballare pro s’abertura in seguridade, a s’imbesse semus sa regione cun su livellu prus bassu de preventzione e organizatzione in su territòriu».

«S’autotzertificatzione non benit recherta a s’isbarcu in sos portos e aeroportos sardos – sighit Zedda – comente ant naradu diversos servìtzios giornalìsticos, s’aplicatzione pensada dae sa Regione no esistet e si peri si esisteret non diat serbire pro ite solu s’app Immuni de su Guvernu cunsentit de torrare a cumpònnere sos cuntatos de una persone positiva cun àteras persones, no esistent protocollos adotados e trasmìtidos a is istruturas ritzetivas, non ddoe at protocollos de seguridade pro is ispidales,a su puntu chi is bìsitas ordinàrias sunt firmas, unu muntone de sardos sunt isetende dae paritzos meses de pòdere prenotare una bìsita e non sunt istados predispostos prèsidios sanitàrios territoriales in is logos in ue ddoe at sa contzentratzione prus manna de turistas».

« Duos meses a oe diamus àere tentu sa possibilidade de inghitzare un’isperimentatzione pro torrare a abèrrere a pagu a pagu, cun trastos e at risursas frunidos dae su Guvernu, ma su presidente at pensadu chi esseret prus importante allegare de passaportos sanitàrios chi non esistint e de ddu contare in televisione – concruit s’ex sìndigu-. Diat àere dèpidu traballare, ma s’ischit, a traballare istracat».