Graziano Mesina, non s’agatat, si diat pòdere èssere in fuidu a pustis de s’ùrtima detzisione de sa Cassatzione.

A pustis de sa sentèntzia de s’arta Corte, chi at refudadu su ricursu de is abogados suos, pro “Gratzianeddu” si diant èssere dèpidas torrare a abèrrere is ghennas de su càrtzere.

Depet iscontare sa cundenna a trinta annos de reclusione pro assòtziatzione a delìncuere, istabilida in su mese de idas de su 2016.

Segundu sa Dda de Casteddu diat èssere istadu a capu de duos grupos criminales ativos in diversas zonas de sa Sardigna, chi operaiant in su tràficu internatzionale de droga.

Mesina, dae prus de un’annu fiat essidu dae su càrtzere de Badu de Carros pro unu vìtziu de forma, a pagas dies dae sa decurrèntzia de is tèrmines. Fiat torradu a bìvere a Orgòsolo, in ue s’agataiat in regìmene de semilibertade.

S’orgolesu, chi at coladu sa parte prus manna de s’esistèntzia sua a iscontare vàrias penas in càrtzere, oe tenet setantot’annos.

In su 2004 aiat retzidu sa gràtzia, cuntzèdida dae su Presidente de sa Repùblica de tando Carlo Azeglio Ciampi, e aiat incumentzadu a traballare comente ghia turìstica in su Supramonte.

Immoe cun su refudu de s’ùrtimu ricursu presentadu, nd’est rutu in bia definitiva su provedimentu individuale cuntzèdidu dae sa màssima càrriga de s’Istadu.

Perintantu Orgòsolo est torradu suta de assìtiu de is fortzas de s’òrdine, cun Politzia e Carabineris impinnados a chircare a pedras pesadas s’ex bandidu. Medas is postos de blocu, cun medas interrogatòrios e percuisitziones in ogni corratzu de sa bidda.

De Mesina perunu rastru in domo de is familiares. A su chi s’est ischidu, s’ùrtimu annu, s’òmine at bìvidu in domo de una de is duas sorres.

Ogni die – comente previdet sa lege in casu de regìmene de semilibertade – s’orgolesu andaiat a firmare in sa caserma de is Carabineris.

A diferèntzia dae is àteras dies, su primu merie de giòbia “Gratzianeddu”, non si diat èssere presentadu. Solu a pustis chi is fortzas de s’òrdine, a merie a tardu, si sunt presentadas in domo sua pro nde leare a Mesina a presone -a pustis de sa sentèntzia de sa Cassatzione – ant postu in contu sa possìbile fua sua.

Eris in Rai3 est andada in direta sa prima puntada de sa sèrie noa de su programma pensadu e conduidu dae Franca Leosini, “Storie maledette”. Sa giornalista at contadu a sa minuda su delitu de Dina Dore, acontèssidu su 26 de martzu de su 2008 in Gavoi. Leosini at intervistadu a su maridu de sa vìtima, Francesco Rocca, su dentista de Gavoi cundennadu a s’ergàstulu in tres grados de giudìtziu pro àere cummissionadu s’ochisura de sa pobidda.

Rocca, dae sa domo tzircundariale de S’Alighera at torradu a nàrrere a tantis bias de èssere innotzente, pro s’infundadesa de is decraratziones de Stefano Lai, su supertestimòngiu chi chimbe annos a pustis de su delitu at donadu una bortada a s’inchiesta concruida cun s’arrestu suo e de Pierpaolo Contu, a s’època de is fatos minorenne, cundennadu a 16 annos comente esecutore materiale de s’ochisura.

Stefano Lai aiat contadu a is incuirentes chi s’amigu Pierpaolo Contu l’aiat cunfessadu de àere mortu issu a Dina, mandadu dae Rocca cun sa promissa de 250 mìgia èuros.

In pràtica Rocca, at torradu a repìtere sa matessi lìnia de difesa chi at naradu a is giùighes, ma chi pro tres bias at tentu su matessi resurtadu: sa cundenna sua.

Su dentista at naradu chi in is indagas ddoe sunt istadas faddinas (at sutaliniadu chi in s’isparadrapa impreadu pro acapiare a Dina Dore ddoe teniat unu canteddu de Dna chi non fiat de Pierpaolo Contu e no est mai istadu iscobertu a chie apartenneret), at naradu chi at a pedire sa revisione de su protzessu e giustìtzia pro Dina. «Ddoe tenet una rasta biològica de sàmbene de Dina ammescradu a su DNA de una persone disconnòschida. Ma custu disconnòschidu no est istadu mai chircadu. Pro su casu de Gambirasio, pro esèmpiu, ant fatu mìgias de chircas. In una bidda pitica comente a sa nostra cun 700-800 campiones de DNA diant èssere arribbados a su resurtadu, o comente si siat a su tzipu parentale», at decraradu Rocca. Chi at agiuntu chi no at mai cumprèndidu su movente de su presupostu assassinu – “disconnòschidu 1” -, ipotizat si diat èssere tratadu de unu tentativu de secuestru o de fura acabbada male.

In prus, at decraradu, chi fìgia sua – oe dòighi annos – non diat èssere a su seguru, pro ite su presupostu mortore de sa mama diat èssere galu lìberu.