At telefonadu su 113 sa fèmina chi eris sero, orròschida de is minetzas de morte e de is ofesas grae de su cumpàngiu cunvivente suo, fatas in presèntzia de sa fìgia issoro

Is Volantes de su Cummissariadu de Cuartu Sant’Aleni sunt lòmpida a sa lestra in sa domo. Comente sunt arribbados is politziotos ant agatadu sa fèmina iscunsertada, chi chircaiat de apaghiare sa fìgia pitica assustada.

Sa mama de sa pipia at contadu a is Agentes chi su cunvivente suo, giai dae su cumintzu de sa relatzione issoro, incumentzada in su 2012, at semper tentu in is cunfrontos suos unu ghetu violentu, cun vitupèrias e agressiones fìsica continas, ma issa no at mai fatu denùntzia pro ite timiat is minetzas de s’òmine.

Sa cunditzione de acorru in domo dèpida a custu perìodu de apretu sanitàriu at agravadu is cosas. Is violèntzias e is maltratamentos sunt aumentados fintzas dae in antis sa pitzinna issoro. Oe, a pustis de un’àtera minetza de mortas, sa fèmina at pedidu agiudu a sa Politzia.

Is politziotos ant arrestadu s’òmine, unu pluripregiudicadu de 40 annos de Biddaspitziosa, chi est istadu inserradu in sa Domo Tzircundariale de Uda, a disponimentu de s’Autoridade Giuditziària.

In custu perìodu de apretu sanitàriu sa Politzia de Istadu est donende cura meda a is situatziones in ue sa cunvivèntzia fortzada e longa diat pòdere influire in modu negativa in is cuntestos familiares prus problemàticos, agravende realidades giai delicadas e determinende episòdios de violèntzias e de maltratamentos.

In custos cuntestos diat pòdere èssere prus difìtzile pro sas vìtimas de violèntzia a avèrtere is Fortzas de Politzia o a mutire is tzentros anti-violèntzia petzi pro unu cunfortu chi potzat serbire a afrontare una crititzidade.

Pro custu, oe est ancora prus importante garantire sa disponibilidade màssima de sa Politzia de Istadu e unu sistema fàtzile e lestru pro pedire agiudu.

Ma gràtzias a s’ùrtimu agiornamentu de YouPol, s’App de sa Politzia de Istadu contra su bullismu, ispatzu e oe fintzas violèntzia domèstica, is vìtimas tenent unu trastu in prus pro pedire agiudu, sinnalende fintzas sa positzione issoro.

Cun s’aplicativu YouPol, fintzas chie est istadu testimòngiu diretu o indiretu de una violèntzia – pro esempru is bighinos de domo – podet denuntziare custos episòdios imbiende signalatziones in anonimadu puru, fintzas cun fotos e vìdeos.

«In una situatzione ordinària no andat bene a pònnere in pùblicu tzertas esperièntzias e difatis no ddu dia àere mai fatu. Oe imbetzes, su de m’abbarrae a sa muda mi diat fàghere intèndere responsàbile s’incasu custa pràtica deperet divenire sa norma». Est cun custa premissa importante chi Giulia Lai, abogada de Cuartu, at postu a craru is riflessione sua a pitzu de is cunsighèntzias chi diat pòdere tènnere una giustìtzia amministrada in lìnea.

«Sunt coladas unas cantas dies dae sa prima esperièntzia cun su “protzessu a distàntzia”, si trataiat de una modalidade chi apo acunsentidu essende una càusa apretosa. Difatis sa matessi càusa tenet a ogetu interessos e deritos uguales a is chi oe legìtimant s’aplicatzione de custas mesuras – iscriet s’abogada – est istadu lègiu meda».

S’udièntzia chi si diat èssere dèpida fàghere in su tribunale de Bergamo, teniat a ogetu su trasferimentu de unu traballadore portadore de handicap ex lege 104, dae sa Lombardia a sa Sardigna. «S’assistidu meu s’agataiat a testu dae ue fia eo – sighit Giulia Lai – in domo sua, e non podia comunicare cun issu comente dia àere pòdidu fàghere in su dibatimentu: mancari pedinde a su giùighe 5 minutos pro allegare a sa sola cun issu pro segudare in custu modu un’acòrdiu cun sa contraparte. No est istadu possìbile fàghere nudda de totu custu».

«Sa contraparte est abbarrada sena sa presèntzia de s’assistida sua pro belle totu su dibatimentu pro ite sa connessione no fiat bastante forte pro poderare totu cussas persones in vìdeu. Duncas ,in s’àteru còigiu de tempus chi abbarraiat, s’udièntzia est andada a in antis cun sa contraparte chi allegaiat a boghe arta pro more chi poderet rispòndere a is dimandas de su Giùighe».

Un’aspetu fundamentale a pitzu su cale s’est firmada s’abogada Lai est cussu chi interessat s’achirimentu de is depositziones de is testimòngios: «Su Giùighe nos at preannùntziadu chi su protzessu, mancari cunsideradu apretosu, francu is provedimentos provisòrios assuntos foras de udièntzia, at a pòdere sighire solu a pustis de mese de argiolas pro ite, comente est giustu, no at a pòdere assùmere is testimoniàntzia in lìnia, no essende possìbile a si nde segurare de sa presèntzia de àteros sugetos a s’internu de s’aposentu e tando possìbiles meletzos o impòsitos».

S’abogada concruit su resonu suo espressende pessamentu mannu pro su benente de una giustìtzia chi bèngiat amministrada in custu modu: «In custu cuadru, peri si siant coladas diversas dies dae s’udièntzia, m’intendo nerviosa, impotente, pagu satisfata. Cumbìnchere unu Giùighe de sa fundadesa de is dimandas tuas non si podet fàghere cun unu vìdeu in ue si bidet sa cara ebbia sena sa possibilidade de ammustrare documentos ,e cun un’àudiu chi andat e benit. So iscorada pro sa limitatzione a sa funtzione sotziale chi apo assùmidu ma so fintzas apensamentada meda pro is sortes de sa Giustìtzia o a su mancu de cussu pagu chi nd’abarrat».