Pustis de sa cunfessione de Joselito Marra, ca at trogadu de àere mortu a Davide e a Massimiliano Mirabello, sunt istados agatados is càdaros de is frades calabresos.

Est istadu su mortore etotu chi at inditadu a sa giustìtzia su logu in ue fiant cuados is corpos de is bighinos, in su sartu de Patiolla, non meda a tesu dae Funtana Pirastu.

S’esàmene de s’autopsia at cunfirmadu ca is duos frades sunt istados mortos sa die etotu chi sunt mancados dae domo, su 9 de freàrgiu.

A su chi narant is resultados de s’anàlisi subra is càdaros, Davide – su frade mannu – est istadu bochidu cun una fusilada a isfatzadura isparada dae presu. Massimiliano – su frade minore – est istadu mortu cun unu corpu a conca, si pensat cun sa càscia de su fusile.

Sa dinàmica cunfirmat sa confessione fata dae s’imputadu, chi si nd’at boddidu totu sa curpa de is mortes, iscagionende a su fìgiu Michael. Joselito Marras at nadu ca sa die chi at mortu is bighinos pro si difèndere, fiat solu.

Is indàgines de is carabineris de su Nùcleu Investigativu de su Cumandu Provintziale de Casteddu sunt sighende: est possìbile chi ant a èssere motivadas peri àteras personas.

Is investigadores si sunt cuntzentrados in deretura a pitzu de babbu e fìgiu, essende ca fiant a briga istèrrida cun is duos frades Mirabello.

In passadu ddoe sunt istadas brigas meda tra issos, comentzadas cando unu cane de is frades Mirabello est istadu agatadu impicadu. Is calabresos ant semper imputadu de cust’afrontu is duos allevadores, acusados peri de ddis àere postu fogu a una barraca. Pustis custos fatos is frades Mirabello aiant detzìdidu de si vengare cun Michael Marras iscudende·lu meda e lassende·ddu pro mortu.

A càrrigu de is patiollesos is espertos de s’Arma de is Carabineris ant agatadu medas indìtzios.

Is Ris de Casteddu e is incarrigados de is relieves ant esaminadu a sa minuda sa vetura de Michael in chirca de rastos e elementos pro acrarire is òmitzidios.

Una proa importante est istada agatada in sa portiera de sa Fiat Panda, in ue est istadu imbènnidu su sàmbene de Davide Mirabello.

Un’àtera prova est istada agatada is guantos prenos de sàmbene de is mortos e elementos biològicos de su bochidore.

In su mentres, a pustis de s’autopsia, is sorres de is calabresos mortos ant pedidu agiudu pro nde torrare is corpos de is frades a Calàbria, pro ddos interrare in bidda insoro, San Gregorio d’Ippona, in provìntzia de Vibo Valentia.

Noas mannas in s’inchiesta pro sa morte de is duos frades calabresos. Davide e Massimiliano Mirabello, chi mancant de domo dae su 9 de freàrgiu, diant èssere istados mortos dae Joselito e Michael Marras.

Oe is carabineris de su Nùcleu Investigativu de su Cumandu Provintziale de Casteddu, ant arrestadu is bighinos de domo de Patiolla.

Is indàgines si sunt cuntzentradas in deretura subra babbu e fìgiu, pro ite fiant a briga cun is duos frades de ratza calabresa.

In passadu ddoe sunt istados chertos lègios meda tra issos, comentzados cando unu cane de is frades Mirabello est istadu agatadu impicadu.

Is calabresos ant semper imputadu de cust’afrontu is duos allevadores , acusados fintzas de ddis àere postu fogu a una barraca cun unu motocarru a intro.

Pustis custos fatos is frades Mirabello aiant detzìdidu de si vengare contra Joselito Marras iscudende·lu meda.

Pro more de custa carda lègia su bighinu nche fiat acabbadu a s’ispidale, acanta dd’aiant diagnosticadu medas feridas e curas pro baranta dies.

A su chi narant is investigadores, in s’ùltima briga de su 9 de freàrgiu, babbu e fìgiu patiollesos ant ochidu is calabresos.

A càrrigu de Joselito e Michael Marras is espertos de s’Arma de is Carabineris tenent medas indìtzios.

Is Ris de Casteddu e is incarrigados de is relievos dae su sostitutu procuradore Gaetano Porcu, ant esaminadu a sa minuda sa vetura de babbu e fìgiu in chirca de rastos e elementos pro acrarire s’òmitzidiu de is duos frades.

Sa proa prus importante est istada agatada in sa portiera de sa Fiat Panda de is bighinos de domo de Patiolla, in ue est istadu imbènnidu su sàmbene de Davide Mirabello.

Pròpiu su sàmbene de is duos frades, agatadu a presu de sa màchina brusiada e in s’istrada de Funtana Pirastu, at fatu pensare ca fiant mortos.

In su mentres is carabineris de sa bidda sunt sighende sa chirca de is càdaros de is calabresos in is sartos de Patiolla, agiudados dae is Cassadores de Sardigna, is militares de su Nonu Batallione, is unidades cinòfilas e moleculares, is pompieris e is subàcueos.