Noas mannas in s’inchiesta pro sa morte de is duos frades calabresos. Davide e Massimiliano Mirabello, chi mancant de domo dae su 9 de freàrgiu, diant èssere istados mortos dae Joselito e Michael Marras.

Oe is carabineris de su Nùcleu Investigativu de su Cumandu Provintziale de Casteddu, ant arrestadu is bighinos de domo de Patiolla.

Is indàgines si sunt cuntzentradas in deretura subra babbu e fìgiu, pro ite fiant a briga cun is duos frades de ratza calabresa.

In passadu ddoe sunt istados chertos lègios meda tra issos, comentzados cando unu cane de is frades Mirabello est istadu agatadu impicadu.

Is calabresos ant semper imputadu de cust’afrontu is duos allevadores , acusados fintzas de ddis àere postu fogu a una barraca cun unu motocarru a intro.

Pustis custos fatos is frades Mirabello aiant detzìdidu de si vengare contra Joselito Marras iscudende·lu meda.

Pro more de custa carda lègia su bighinu nche fiat acabbadu a s’ispidale, acanta dd’aiant diagnosticadu medas feridas e curas pro baranta dies.

A su chi narant is investigadores, in s’ùltima briga de su 9 de freàrgiu, babbu e fìgiu patiollesos ant ochidu is calabresos.

A càrrigu de Joselito e Michael Marras is espertos de s’Arma de is Carabineris tenent medas indìtzios.

Is Ris de Casteddu e is incarrigados de is relievos dae su sostitutu procuradore Gaetano Porcu, ant esaminadu a sa minuda sa vetura de babbu e fìgiu in chirca de rastos e elementos pro acrarire s’òmitzidiu de is duos frades.

Sa proa prus importante est istada agatada in sa portiera de sa Fiat Panda de is bighinos de domo de Patiolla, in ue est istadu imbènnidu su sàmbene de Davide Mirabello.

Pròpiu su sàmbene de is duos frades, agatadu a presu de sa màchina brusiada e in s’istrada de Funtana Pirastu, at fatu pensare ca fiant mortos.

In su mentres is carabineris de sa bidda sunt sighende sa chirca de is càdaros de is calabresos in is sartos de Patiolla, agiudados dae is Cassadores de Sardigna, is militares de su Nonu Batallione, is unidades cinòfilas e moleculares, is pompieris e is subàcueos.

S’ispetant is resutados de is anàlisis de is proas regortas in sa màchina de is indagados in s’inchiesta pro dòpiu omitzìdiu de is duos carrales isparidos dae Patiolla, Massimiliano e Davide Mirabello. Is bighinos de is Mirabellos, chi cun is duos calabresos fiant a briga.

In is dies prima is investigadores aiant sighidu a interrogare connoschentes, amigos e parentes de is duos frades pro more de ischire de prus de sa vida issoro e pro cumprèndere si in passadu ddoe esserent istados chertos cun calicunu chi diat pòdere àere detzìdidu de si vengare.

Is indàgines ant tèntu una furriada a pustis chi est istadu atzertadu chi su sàmbene agatadu a presu de sa màchina brusiada de is duos frades fit pròpiu s’issoro.

Is Ris de Casteddu oe a traballu. In su mentres is carabineris de sa cumpangia de Partiolla e de su Nùcleu investigativu de su cumandu provintziale de Casteddu ant torradu a cumentzare is chircas, cun s’agiudu de is Cassadores de Sardigna, is militares de su Nonu Batallione, is unidades cinòfilas e moleculares, is pompieris e is subàcueos.

Si tratat de sa Fiat Panda de Joselito Marras, su bighinu de domo de is duos frades de orìgine calabresa, e de su fìgiu Michael.

Comente a aporrit s’Ansa, is espertos de s’Arma de is Carabineris, incarrigados dae is relievos de su sostitutu procuradore Gaetano Porcu, sunt esaminende sa minuda sa vetura de Marras in chirca de rastos e elementos chi potzant acrarire s’arcanu de s’isparimentu de is duos frades.

Eris, in s’ora, sunt cumintzadas is anàlisis de is àteros repertos secuestrados a babbu e fìgiu: una pariga de guantos, una càvana, unu marteddu, sabatas e unu bàculu.

Pro is resurtados tocat a ispetare unas cantas dies. Est possìbile chi is abogados de sa difesa nòminent unu consulente de parte. A s’imbesse, sa famìlia Mirabello, rapresentada dae s’abogadu Salvatore Sorbili, at detzisu de s’afidare a is Ris ebbia.