Eris in Rai3 est andada in direta sa prima puntada de sa sèrie noa de su programma pensadu e conduidu dae Franca Leosini, “Storie maledette”. Sa giornalista at contadu a sa minuda su delitu de Dina Dore, acontèssidu su 26 de martzu de su 2008 in Gavoi. Leosini at intervistadu a su maridu de sa vìtima, Francesco Rocca, su dentista de Gavoi cundennadu a s’ergàstulu in tres grados de giudìtziu pro àere cummissionadu s’ochisura de sa pobidda.

Rocca, dae sa domo tzircundariale de S’Alighera at torradu a nàrrere a tantis bias de èssere innotzente, pro s’infundadesa de is decraratziones de Stefano Lai, su supertestimòngiu chi chimbe annos a pustis de su delitu at donadu una bortada a s’inchiesta concruida cun s’arrestu suo e de Pierpaolo Contu, a s’època de is fatos minorenne, cundennadu a 16 annos comente esecutore materiale de s’ochisura.

Stefano Lai aiat contadu a is incuirentes chi s’amigu Pierpaolo Contu l’aiat cunfessadu de àere mortu issu a Dina, mandadu dae Rocca cun sa promissa de 250 mìgia èuros.

In pràtica Rocca, at torradu a repìtere sa matessi lìnia de difesa chi at naradu a is giùighes, ma chi pro tres bias at tentu su matessi resurtadu: sa cundenna sua.

Su dentista at naradu chi in is indagas ddoe sunt istadas faddinas (at sutaliniadu chi in s’isparadrapa impreadu pro acapiare a Dina Dore ddoe teniat unu canteddu de Dna chi non fiat de Pierpaolo Contu e no est mai istadu iscobertu a chie apartenneret), at naradu chi at a pedire sa revisione de su protzessu e giustìtzia pro Dina. «Ddoe tenet una rasta biològica de sàmbene de Dina ammescradu a su DNA de una persone disconnòschida. Ma custu disconnòschidu no est istadu mai chircadu. Pro su casu de Gambirasio, pro esèmpiu, ant fatu mìgias de chircas. In una bidda pitica comente a sa nostra cun 700-800 campiones de DNA diant èssere arribbados a su resurtadu, o comente si siat a su tzipu parentale», at decraradu Rocca. Chi at agiuntu chi no at mai cumprèndidu su movente de su presupostu assassinu – “disconnòschidu 1” -, ipotizat si diat èssere tratadu de unu tentativu de secuestru o de fura acabbada male.

In prus, at decraradu, chi fìgia sua – oe dòighi annos – non diat èssere a su seguru, pro ite su presupostu mortore de sa mama diat èssere galu lìberu.

Una cosa chi in custos meses de barantena siguramente no est mancada a niunu sunt istados is medas intzidentes automobilìsticos, acontèssidos in passadu in is caminos isolanos. In is annos colados in Sardigna su nùmeru de is sinistros at fatu leare medas pensamentos, cun medas vìtimas interessadas.

Cun s’òbrigu de s’abbarre acorrados in domu e de limitare is ispostamentos, custu problema chi corpit sa regione Nostra est istadu minimadu meda.

S’ambiente nd’at tentu seguramente profetu e sa dibata subra formas noas de mobilidade, màssimu in tzitade, est torradu cun fortza a su tzentru de s’atentu de s’opinione pùblica. A nos cumbìnchere chi est pretzisu a torrare a pensare a una mobilidade noa in is tzentros urbanos nostros, peri s’ùrtimu un’intzidente istradale de custu merie in Casteddu.

In s’Asse Mesanu conca a su Poetu, difatis, a presu de su bighinadu de Genneruxi, ddoe est istada un’atapada manna chi at interessadu 7 veturas. Non si connoschent galu is càusas de s’intzidente istradale, in ue est abarradu fertu un’automobilista, chi est istadu sucùrridu dae su personale de su 118 e leadu de presse a s’Ispidale Marino, ma nudda de sèriu, pro fortuna. In su logu de s’intzidente sunt intervènnidos in deretura Politzia e Pompieris de Casteddu chi ant provididu a sa posta in seguridade de is veìculos interessados e de sa sede istradale. Ant interbènnidu fintzas is agentes de sa Politzia Locale de Casteddu pro torrare a ativare sa viabilidade istradale e pro fàghere totu is atzertamentos de lege.

In cuss’ora in s’istrada a iscurrimentu lestru s’est formada una filera longa de màchinas, chi at causadu calicunu discumbèniu a is automobilistas.

Pro seguru custu no est istadu unu bonu cumintzu de sa Fase 2, a pustis de is limitatziones impostas a is ispostamentos de is meses colados.

Tocat peri a nàrrere in prus chi s’abba de oe at torradu su mantu istradale lissinosu e perigulosu.