In un post pùblicu s’ex sìndigu de Casteddu Massimo Zedda at pubblicadu su cumentu indiritzadu a su Guvernadore Solinas in riferimentu a sa abertura sena controllos de portos e aeroportos sardos.

Un’atacu frontale, chi bullat sa lìnia polìtica tenta dae Christian Solinas in is ùrtimos meses.

«Su Presidente de sa Regione aberit totu, portos e aeroportos, sena controllu perunu – si leghet in su post- in su mentres chi in is televisiones e in is giornales naraiat de bòlere crastinare s’arribu de is turistas, pro contivigiare sa salude de is sardos cun passaportos, esàmines, anàlisis de su sàmbene, tampones e gosi sighende, in sa matessi ora iscriiat a su Ministru de is trasportos pro pedire de torrare a abèrrere totu. Est unu machiore: imbetzes de nd’aprofitare de su fatu chi s’Ìsula apat tentu unu nùmeru bassu de impestados e de traballare pro s’abertura in seguridade, a s’imbesse semus sa regione cun su livellu prus bassu de preventzione e organizatzione in su territòriu».

«S’autotzertificatzione non benit recherta a s’isbarcu in sos portos e aeroportos sardos – sighit Zedda – comente ant naradu diversos servìtzios giornalìsticos, s’aplicatzione pensada dae sa Regione no esistet e si peri si esisteret non diat serbire pro ite solu s’app Immuni de su Guvernu cunsentit de torrare a cumpònnere sos cuntatos de una persone positiva cun àteras persones, no esistent protocollos adotados e trasmìtidos a is istruturas ritzetivas, non ddoe at protocollos de seguridade pro is ispidales,a su puntu chi is bìsitas ordinàrias sunt firmas, unu muntone de sardos sunt isetende dae paritzos meses de pòdere prenotare una bìsita e non sunt istados predispostos prèsidios sanitàrios territoriales in is logos in ue ddoe at sa contzentratzione prus manna de turistas».

« Duos meses a oe diamus àere tentu sa possibilidade de inghitzare un’isperimentatzione pro torrare a abèrrere a pagu a pagu, cun trastos e at risursas frunidos dae su Guvernu, ma su presidente at pensadu chi esseret prus importante allegare de passaportos sanitàrios chi non esistint e de ddu contare in televisione – concruit s’ex sìndigu-. Diat àere dèpidu traballare, ma s’ischit, a traballare istracat».

Nudda prus autotzertificatzione pro is ispostamentos tra is Regiones, custu su primu puntu tocadu dae su presidente de su Cussìgiu Giuseppe Conte durante sa direta de immoe pagora.

Sa situatzione, tenta semper suta controllu, donat isperas bonas. Is frutos de sa longa cuarantena, duncas, si bident. Unu detzisione chi non est istada leada a coro ligeri- at naradu su primu ministru – ma a cale s’est arribbados a pustis de s’anàlisi de is nùmeros.

«So bidende meda prègiu e cuntentesa» sighit Conte «pro sa bella istajone. Nos meritamus, a pustis de chidas de sacrifìtzios, allegria e divertimentu».

Non tocat ismentigare però s’importu de is ùnicos duos trastos chi nos podet agiudare in custa fase de abertura: is aparatos de protetzione individuale e su distantziamentu sotziale.

Àtera novidade: s’arribu de turistas europeos in Itàlia sena chi siant sutapostos a cale si siat genia de cuarantena. Medas is Ministros chi sunt traballende sena pasu – ispiegat Conte — pro more chi s’Itàlia si potzat torra istantargiare.

«Sa bellesa de s’Itàlia no est mai andada in cuarantena».

Ma bisòngiat a fàghere is contos cun un’àteru apretu, cussu econòmicu e sotziale. 80 is milliardos postos dae su Guvernu finas a immoe.

«M’iscuso pro is ritardos,» agiunghet «ma non fìamus prontos pro custas erogatziones».

Unu pagu a coromalu su presidente de su cussìgiu at faeddadu de is setores in tribulia manna, comente cussu de s’ispetàculu, su cummèrtziu e su turismu.

Su benidore però est prenu isperu: si traballat in manera contina – agiunghet – pro torrare a promòvere e rinnovare s’Itàlia dae is fundamentas. Unu cumintzu nou: custu est su progetu chi su Guvernu cheret atuare.

Modernidade, digitalizatzione, lestresa: custos is faeddos crae de una ripresa, cussa italiana, chi s’isperat torret a istantargiare totu su sistema, dannificadu meda pro s’apretu coronavirus.

Reduire sa burocratzia, fàghere a manera chi sa banda larga siat sa règula in totu Itàlia. Investire, andare a in antis, segare in ue si podet pro fatzilitare is protzeduras e is tempos mortos. Riformare su sistema fiscale. Cuntrastare is disugualidades e sustentare is persones aorradas.

«Sa summa chi s’Europa at a pònnere a disponimentu de s’Itàlia no at a dèpere abarrare su tesoreto de su Guvernu in càrriga» ispiegat «ma at a èssere una risursa pro totus».

Pro is dies sighentes a Palatzu Chigi sunt istadas medas mentes brillantes, assòtzios, sindacados e gosi sighende: serbint ideas e cussìgios pro atuare custu progetu rivolutzionàriu.