Unu servìtziu televisivu bellu a beru, chi at documentadu un’iscenàriu dae sa bellesa istremenda. De cale logu semus alleghende? De s’Ogliastra e de unu bìculu de terra, chi est abarradu belle immaculadu.

Cala Goloritzé, prenda baunesa, oe in su servìtziu de Anna Mazzone in su Tg2: s’aplicativu pro prenotare unu postu in su paradisu ogiastrinu – possìbiles 250 presèntzias ebbia – est andende bene meda cun unu muntone de prenotatziones.

Pro una bia sa modernidade agiudat sa cunservatzione, ma in su matessi tempus un’impreu intelligente de unu donu de sa Naturalesa e semper rispetende is mesuras contra s’ispainu de sa pesta de su Coronavirus.

«Sa tecnologia est agiudende·nos a beru» at naradu su vitzesìndigu de Baunei, Ivan Puddu, ispieghende comente cun s’aplicatzione si siat agatadu unu modu de acrobare a pare seguridade e turismu.

Meda apretziada dae is abisitadores chi sunt sighende a prenotare ogni die s’atzessu a custu tretu istravanadu de sa costa ogiastrina. S’aplicatzione est fàtzile o difìtzile de impreare?

Est intuitiva meda- comente ant naradu duos pitzocas intervistadas dae sa giornalista -, chi sunt abbarradas amaliadas dae su paesàgiu de Cala Goloritzé.

Unu bellu billete de bìsita pro su turismu e pro s’economia de su tzircùitu, chi est unu pagu in pistighìngiu pro ite non s’ischit comente ant a èssere s’istajone a pustis de s’abertura a is ispostamentos tra regiones.

Ma biende comente sunt andende is cosas s’ispetu est bonu, bidu fintzas s’ambiente e s’esperièntzia chi podet regalare sa zona. Unu rimèdiu perfetu a pustis de su perìodu de acorru chi italianos e europeos ant bìvidu finas a pagu tempus a oe.

In sa bella marina cun is abbas lìmpidas s’arribbat a nàdidu ebbia opuru a pee colende dae su monte. Nudda gente a incarcu duncas, pròpiu comente narant is disponimentos pro s’atrèmenu de su coronavirus. A pompiare chi is regulas siant rispetadas ddoe sunt is barratzellos chi tenent s’incàrrigu de costoire unu de in ungrones prus galanos de sa Sardigna.

Galu non s’ischit cando ant a èssere presentados. Ma calicuna boghe faeddat de s’atòngiu de ocannu, opuru, bìdidu s’apretu COVID-19, de su beranu de su 2021.

Semus alleghende de is otzeras pro sa realidade aumentada, progetados dae sa Apple, chi diant dèpere essire in su 2021 – màssimu in su 2022 -.

Su prètziu issoro at a èssere prus a mancu de 500 dollaros, non pròpiu pro is butzacas de totus, mescamente in custu perìodu de crisi econòmica.

Calicuna noa a pitzu de custos otzeras tecnològicas est istada difùndidas dae s’informadore Jon Prossler, chi at faeddadu fintzas de su funtzionamentu.

Unu progetu ambitziosu chi in is annos colados non est andadu in portu pro àteras aziendas, pensamus a is Google Glass. Comente si siat medas amantiosos de custos dispositivos, impossìbiles finas a unos deghe annos a oe, non bient s’ora de ischire si custas noas suant beras.

Pro s’ora s’azienda de Cupertino non bogat mutzu e s’ùnica cosa chi si podet fàghere est de immaginare.

Segundu is pagas cosas chi at iscoviadu Prossler, custos dispositivos diant pòdere tènnere lentes graduadas o puru nono, duncas ddos ant a pòdere portare fintzas a mìopes o astigmàticos. Ant a abarrare delùdidos imbetzes pro is amantes de is otzeras de sole: difatis pro su momentu custa versione non diat èssere istada istudiada.

Pro su chi interessat su funtzionamentu issoro, s’assimìgiat a cussu de is primos Apple Watch, paris cun s’iPhone.

Is otzeras a manu manca portant unu sensore Lidar chi at a permìtere sa gestione de sa realidade aumentada. Su materiale de custos protòtipos diat pòdere èssere in policarbonadu o metallu, inbetzes su disinnu at a èssere simpre e essentziale.

S’interfàtzia de custa prenda tecnològica noa, at a pigare su nùmene de “Starboard” e si diat dèpere bìdere diretamente in is lentes de s’aparatu. Pro los carrigare diat dèpere bastare a ddos pònnere in s’istùgiu issoro, acanta est presente unu sustegnu sena filos.

Nos abarrare solu a isetare pro ischire si fintzas custu dispositivu at a iscrìere una pàgina noa de istòria, e prus che totu si at a divenire in pagu tempus un’ògetu indispensàbile pro totus.

Benit de si fàghere però una dimanda: est a beru o a fàula? Chie dd’ischit.