Bonas noas pro su Litzeu Sientìficu Alberti de Casteddu chi a su mancu pro bator annos podet istare trancuillu sena perìgulu de trasferimentu. Difatis est istada cuntzèdida un’etzetzionale pròroga pro sa permanèntzia in sa sede sua de arburada de Colombo finas a sa concrusione de s’annu iscolàsticu 2026-2027.

Sa detzisione de annoare sa cuntzessione demaniale marìtima de s’edifìtziu est istada su resurtadu de sos addòbios fatos gràtzias a sa mesa interistitutzionale chi at interessadu sa Tzitade Metropolitana de Casteddu, s’Autoridade de sistema portuale de su mare de Sardigna, s’assessoradu a sa Pùblica Istrutzione de sa Regione Sardigna e s’Ufìtziu Iscolàsticu Provintziale.

Sa proposta de istituire custa mesa pro tratare sa permanèntzia de su Litzeu in custa sede, cumentzada in su mese de martzu coladu gràtzias sa sa voluntade de sa Tzitade Metropolitana, at dimustradu de èssere sa s’istrategia mègius pro lòmpere a una solutzione cumpartzida dae totu. Su sìndigu de sa tzitade metropolitana, Paolo Truzzu, at cummentadu: “Nche tèngio a torrare gràtzias de coro a totu sas partes interessadas chi cun grandu sentidu de responsabilidade si sunt postas a disponimetu pro agatare  totu sos sas solutzione possìbiles pro more de garantire sa continuidade didàtica in sa sede  fintzas pro sos annos imbenientes. Est unu resurtadu importante meda pro sa tzitade e pro su Litzue e pro su chi rapresentat”.

Su cussigeri metropolitanu delegadu a sa Pùblica Istrutzione e a s’Edilìtzia Iscolàstica, Alessandro Balletto, at naradu de èssere satisfatu a beru de custa solutzione cumpartzida dae totus sos atores chi sunt interbènnidos in sos addòbios de sa mesa istitutzionale.

Custu perlongamentu at a cunsentire a sos istudiantes giai iscritos de cumpletare su tziclu formativu, donende a su matessi tempus a s’amministratzione su tempus netzessàriu pro agatare una collocatzione definitiva noa pro s’istitutu iscolàsticu.

Sa detzisione rapresentat unu passu significativu pro garantire istabilidade e continuidade a sas fainas educativas de s’importante litzeu sientìficu in s’atuale sede sua.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sardigna contra sas macchissias in Gaza: proposta po suspendere sa cooperatzione cun Israele.

Sa presidente de sa Regione Sardigna, Alessandra Todde, partetzipat cun determina e craresa supra su diligu atzocchiu chi bi est in Gaza, poninde supra de sos social sa proposta depositada deris in Cunsizzu regionale e firmada dae casi trinta cunsizzeris de sa majoria.

Su documentu , chi est bessidu a pizu pustis de unu cunsensu internu , dimandat in manera uffitziale a sa Regione de cundennare sas violatziones de sos dirittos umanos in sa tzira de Gaza e de leare mesuras tzertas, intre sas cales sa suspensione de donzi forma de cooperatzione cun s’Istadu de Israele, fintzas a cando no at essere torradu a essere rispettadu du dirittu internatzionale e sos dirittos fundamentales.

Alessandra Todde at cherfidu ammentare comente sa Sardigna si siat giai espressada in manera crara e detzisa in su tempus passadu po su reconnoschimentu de s’Istadu de Palestina. In manera particulare, at evidentziadu comente su Cunsizzu Regionale eppat aderidu a sa positzione de pius de 140 istados chi faghent parte de sas Natziones Unidas, reconnoschinde in manera uffitziale sa Palestina comente Istadu soberanu. Custu passu, importante meda a livellu de cona, no si est alindadu a addurare supra su pabilu, ma si est traduidu in assiones importantes dae parte de sa Regione. Diffattis, sa Sardigna at poderadu in su tempus, paritzos disignos de cooperassione cun entes e organissassiones tzviles de sa Palestina chi si cuntzentrant supra campos istrategicos e vivos comente s’ambiente, sa salude e s’istrussione.

Sa presidente Todde at pustis evidentziadu comente, mancari custos importantes resuratdos, siat arrivadu su momentu de faghere un’atteru passu chi siat detzisivu. Sa Sardigna no podet e no si deppet bortare dae s’attera parte in daenanti de sa gravidade de sos abbenimentos chi si sunt cossumande in tzira de Gaza. Est de fundamentu, at evidentziadu, chi sa Regione pichet una posissione crara e chentza dudas, chi andet addia sa simple issida de solidariedade, ma chi si bortet in d’una posissione politica e istitutzionale bera.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22