Òperas in benefitzèntzia: sa cooperativa SolidArteS in agiudu de sos alluvionados de s’Emilia Romagna
S'initziativa "SolidArteS" rapresentat un'oportunidade pro sa comunidade de Casteddu de dimustrare sa solidariedade sua e suportu cara a sas persones de s'Emìlia-Romagna.
Martis 4 de trìulas, a sas oras 18:30, s’Ispàtziu ArteS in bia de Castiglione 1 in Casteddu at a abèrrere sas ghennas suas a sa comunidade tzitadina pro “SolidArteS”, una collida fundos in favore de sas vìtimas de s’alluvione in Emìlia-Romagna. Custu eventu, organizadu dae sa cooperativa SolidArteS, mirat a ofèrrere un’agiudu cuncretu a sas persones corfidas dae sa reghente calamidade naturale in sa regione romagnola.
S’alluvione chi at corfidu s’Emìlia-Romagna at causadu disacatos graves a sas comunidades locales, lassende medas famìlias sena domo e distruende sas propiedade issoro. In unu momentu gasi difìtzile, sa solidariedade e s’agiudu retzìprocu devenint fundamentales pro permìtere a sas persones de torrare a costrùere sas vidas issoro.
SolidArteS, una cooperativa chi unit s’arte e sa solidariedade, at detzìdidu de pònnere a disponimentu sas risursas pròpias e cumpetèntzias pro suportare sos alluvionados de s’Emìlia-Romagna. S’obietivu printzipale de s’initziativa “SolidArteS” est collire fundos pro frunire assistèntzia lestra a sas persones corfidas dae s’alluvione, oferende suportu materiale issoro e morale. Durante s’eventu de regorta fundos, s’Ispàtziu ArteS at a acasagiare una sèrie de fainas, comente espositziones artìsticas, performance in biu e astas de òperas de arte. Sos “artesianos”, artistas e artisanos locales, ant a pònnere in mustra sas creatziones pròpias e ant a donare una partede sos ricavados de sas bèndidas pro contribuire a sa càusa. At a èssere un’ocasione pro sa comunidade tzitadina de apretziare s’arte e in su matessi tempus fàghere una bona atzione.
In prus, ant a èssere presentes istràngios ispetziales, testimòngios de custa initziativa de solidariedade, chi ant a cumpartzire sas esperièntzias issoro e ant a dare boghe a sas vìtimas de s’alluvione. S’obietivu est sensibilitzare su pùblicu subra de s’importu de s’unire pro sustentare cussos chi s’agatant in dificultade, dimustrende chi fintzas gràtzias a sa cultura e a s’arte est possìbile fàghere sa diferèntzia.
Sos fundos regortos durante s’eventu “SolidArteS” ant a èssere destinados a s’achistu de benes de prima netzessidade, comente màndigu, abba de bufare, bestires e allògios temporàneos pro sas famìlias corfidas. In prus, sa cooperativa SolidArteS at a traballare in collaboratzione cun organizatziones locales e istitutziones pro garantire una distributzione ecuànime e lestra de sos agiudos.
S’initziativa “SolidArteS” rapresentat un’oportunidade pro sa comunidade de Casteddu de dimustrare sa solidariedade sua e suportu cara a sas persones de s’Emìlia-Romagna chi sunt afrontende una situatzione de apretu. Ognunu podet contribuire in modu significativu partetzipende a s’eventu, acuistende òperas de arte.
“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”.
© RIPRODUZIONE RISERVATA