Pàliu de Siena, binchet sa Selva: Giovanni Atzeni intrat in s’istòria
Sa de chimbe vitòrias de fila de pare pro Tittia, intre deghe: su cadderi de orìgine sarda, de Nurri, como est in s’istòria.
Giovanni Atzeni lompet a deghe, cun su caddu Violenta da Clodia, donat a sa Selva a sa vitòria de su Pàliu de Siena. Pro “Tittia” est sa de chimbe vitòrias de sighidu in Piazza del Campo, unu resurtadu sena pretzedentes cuddu otènnidu dae su fantinu de orìgine sarda. Una cursa ispantosa, dae su cumentzu finas a sa fine, chi at poderadu su pùblicu sena sùlidu pro duos minutos: petzi sa Torre est resèssida l’abarrare fatu, ma posca, in su finale, s’est dèvida arrèndere. Pro sa Selva est su Pàliu nùmeru 40, pro Atzeni una marrania sena paragones.
Sa partèntzia de sa cursa est acontèssida a pustis de 45 minutos dae s’intrada de sos caddos in Piazza del Campo, cun unu alliniamentu perfetu in su canape, cun sa Contrada de sa Chiocciola de “rincursa”. Bator sos caddos “scossi” lòmpidos a s’arribbu: sunt rùidos a terra sos fantinos de s’Istrice, de sa Chiocciola, de sa Giraffa e de s’Onda. Sa vitòria a su traguardu de sa Selva est istada retzida dae sa festa de sos contradaiolos in pratza, chi ant conchistadu su Drappellone pintadu dae s’artista molisanu Roberto De Jullo. Su caddu Violenta da Clodia cun Tittia sunt istados acumpangiados a sa basìlica de Santa Maria in Provenzano pro festare su trìunfu cun su Te Deum. Sas deghe cussòrgias chi ant batalladu in pratza del Campo fiant Istrice, Drago, Torre, Chiocciola (de rincursa), Aquila, Giraffa, Selva, Onda, Nicchio e Tartuca.
Comente ischimus totus, su numìngiu “Tittia” benit dae s’espressione chi Atzeni, cando fiat lòmpidu a Toscana dae sa Sardigna, narait pro more de su fritu chi faghiat a cunfruntu de sa Sardigna. E titia, como lu naramus finas nois, bidende sos resurtados de custu campione chi nos faghet acrichiddare sa carena a totus.
“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”
© RIPRODUZIONE RISERVATA