Calicunu connoschet sa risposta? Cale sunt is fràigos prus artos de sa Sardigna? In ue sunt? New York, Dubai, Londra, Singapore: totus logos nòdidos pro architeturas chi ant bintu sa fortza de gravidade pesende de terra pro chentinaias de metros.

In Sardigna, a comente est nòdidu, non nch’est nudda chi potzat in calicuna manera èssere paragonadu a is palatzos prus artos de su mundu, siat pro caraterìsticas urbanìsticas istòricas, sia ca ammancat pròpiu s’abbisòngiu de istruturas chi si nde pesent a chelu. Mancare no manchent edifìtzios artos meda, calicunu de custos ci passant is deghe pranos. Ma cale sunt is edifìtzios prus artos de s’Ìsula? Amus agatadu pro bois is primos bator. Alloddu.

PALATZU NOU DE TÀTARI

Progetadu de s’architetu Fernando Clemente e fraigadu intra su 1960 e su 1965, custu palatzu artu 19 pranos e sa bellesa de 80 metros de artesa (88 cun is antennas), est su prus artu de totu sa Sardigna. Est in pratza Castello, acanta de su Palatzu Betzu, de 12 pranos. A is duos palatzos ant fatu faeddare gente meda ca sunt fraigados in zona de importu istòricu e archeològicu de sa tzitade prus importante de Cabu de susu.

T-HOTEL – CASTEDDU

In segundu postu de custa ispetziale classìfica agatamus s’albergo 4 istellas de Casteddu. Su T-Hotel est unu fràigu abbandonadu torradu a cualificare de privados. Un’impresa sarda dd’aiat tramudadu in unu hotel cun 207 aposentos e 62 metros de artesa (73 contende su pinnone). Oe est parte de su skyline tzitadinu, nd’est giai unu sìmbulu.

In sa de tres positziones agatamus duos edifìtzios meda diversos intra issos pro istòria, impreu e tzitade in ue s’agatant. Semus faeddende de su palatzu prus artu de sa de bator tzitades de sa Sardigna pro populatzione, Terranoa, e de sa Crèsia prus manna de sa Sardigna. Sunt totus is duos artos 50 metros.

TURRI OVEST DE SU “PALAZZACCIO” – TERRANOA

Oe in fase de ristruturatzione, custu fràigu est su prus artu de sa tzitade marìtima de sa Gaddura.

TZIMBOINA DE SA BASÌLICA DE BONARIA

Chi essit sa Crèsia prus manna de sa Sardigna est nòdidu prus o mancu a totus. Ma non totus connoschent chi s’artesa de sa tzimbòina est de ispantu: 50 metros. Po cussu est su de tres fràigos prus artos de s’Ìsula.

 “Progetto finanziato con l’Avviso Pubblico IMPRENTAS annualità 2021-2022”

Dae su 30 de lampadas a su 4 de triulas, sos creadores de moda Domenico Dolce e Stefano Gabbana, ant a seperare s’iscrocca casteddaia po presentare sas propostas insoro de couture de Moda Arta, de Atelier e de Oreria Arta.

Pustis de aere seperadu sa Puglia s’istiu passadu, po presentare sas creassiones insoro, sa cropa Dolce e Gabbana, arribat cust’annu in Sardigna. Dae su 30 de lampadas a su 4 de triulas, su sinnu famosu de moda at a presentare sas collessiones novas de Moda Arta, de Oreria Arta e de Atelier.

Sas traditziones, sos colores e sos nuscos de sa Sardigna, ant essere su filu ruju de su “Gran Tour d’Italia”, su disignu firmadu Dolce &Gabbana chi, dae su 2012, tzelebrat sas regiones de s’Italia po mesu de s’artigianadu e sos produttos fattos a manu.

A faghere de guarnissa a sas isfartzosas isfiladas chi donzi istiu animant s’iscena de sa Moda Arta, at essere s’iscrocca casteddaia. Su geniu creativu chi non si podet chistionare de Dolce e Gabbana at duncas a donare po sa prima borta, a sa Sardigna, unu viaggiu istravanadu in su cale arte e abilidade si ant addobbiare, dande vida a cuadros de moda chi che bogant s’alenu, bortados a pesare in artu s’incantu de sa tradissione populare sarda. Donzi isfilada de sas collessiones haute couture firmadas Dolce e Gabbana non est unu simple defilé, ma unu beru e propriu ispettacolu, capatze de toccare emossiones unicas chi binchent s’immazinariu cumone.

Su seperu de sa Sardigna commente logu po custu abbenimentu de grandesa, no est occasionale. S’isula,apparat un’iscenariu perfettu po tzelebrare sa bellesa e s’originalidade de sas creassiones de Dolce e Gabbana. Sas isfiladas ant a bennere in logos de cona de s’iscrocca casteddaia, isseperados po su valore istoricu e culturale insoro, creande
un’unione perfetta de moda e patrimoniu locale.

E commente donzi appuntamentu D&G chi si rispettat, non ant a mancare de certu sos personaggios mannos de su Star system globale. Tzelebridades, influencer e figuras importantes de su mundu de sa moda, ant a arrivare in Sardigna po assistire a custu abbenimentu unicu, cuntribbuinde a rendere meda pius ischintiddosu su clima de sas isfiladas.

Po s’occasione, intro de su nomenadu Forte Village, at essere abbertu unu ispeciale pop-up store. Custa buttega chi abberit po pagu tempus at a presentare unu seperu unicu de sas creassiones pius de cona de Dolce e Gabbana, permittinde a sos istranzos pius fortunados de comporare cantos unicos e pretziosos, fruttu de s’ abilidade de sos artigianos e de sa creatividade chentza laccanas de sa cropa de istilistas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22