Pro is casteddajos s’aversàriu de sa partida benidora at èssere su Venezia, un’iscuadra chi est bessida ocannu in Sèrie A e est faghende bella figura in custu campionadu.

At èssere una partida istragosa meda pro su Casteddu, pro ite is venetzianos sunt giogadores chi gherrant e ant bìnchidu una partida contra s’Empoli e paregiadu contra su Torino sa chida colada.

Non sunt pagos is puntos pro un’iscuadra promóvida a nou in Sèrie A, chi at afrontadu giai Napoli e Milan, is iscuadras prus a in antis in classìfica. Tzertu at pérdidu male, pro 4-0, in una partida amistosa contra su Brescia de s’ex presidente ruju-blu Massimo Cellino, ma cussa non baliat pro su campionadu.

Su Casteddu at a lòmpere a custa partida cun s’intentzione de bìnchere sa primu gara de s’istajone, duncas at a proare a conchistare is tres puntos in is muros amigos de sa Unipol Domus.

Is òmines de Mazzarri diant dèpere fàghere ismentigare is ùrtimas partidas contra s’Empoli e su Napoli, mescamente cussa contra is toscanos chi non sunt tra is iscuadras prus famadas, ma ant postu in dificultade is ruju-blu in domo issoro etotu.

Diversa sa chistione contra in partenopeos, chi tenent sa defensa mègius de su campionadu e sunt primos in classìfica.

Tzertu a s’Istàdiu Maradona, su Casteddu no est resèssidu a fàghere nudda cun is òmines in atacu, ma contra su Venezia at a èssere un’àtera partida, cun is ruju-blu apretados de sa gana de fàghere puntos pro non ruinare s’istajone.

Pro arrenèschere a superare custa crisi de custu comintzu de campionadu, chi est costadu giai sa banchita a s’allenadore Leonardo Semplici, dae cras, is sardos ant a dèpere fàghere bìdere sa balentia issoro a is tifosos casteddajos.

S’isperàntzia pro su Casteddu est de torrare a fàghere innamorare is tifosos cun su giogu de su tempus coladu. In domo diat a èssere su logu mègius pro chi torret a capitare, isperamus bene.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su Casteddu at torra pérdidu, custa borta contra su Napoli.

Is sardos ant giogadu sa partida cun timòria dae su cumintzu, cun s’allenadore Mazzarri chi at postu a in antis un’atacante ebbia, Joao Pedro, chi est istadu dominadu dae is defensores aversàrios, mescamente dae Koulibaly.

Is asulos ant marcadu sa primu rete a su minutu 11, gràtzias a Osihmen, cun s’atacante nigerianu chi at collionadu is tzentrales de sa defensa ruju-blu.

Is casteddajos ant reagidu belle nudda, antzis sunt is napoletanos chi tenent àteras ocasiones de gol, ma pro bona sorte de is òmines de Mazzarri e pro mèritu de su portieri Cragno, no agatant sa rete.

S’iscuadra de Spalletti cumandat su giogu pro totu su primu tempus, cun grandu brègiu de is tifosos de domo chi ant festadu is giogadores issoro a s’essida dae su campu.

Su segundu tempus est aguale a su de prima fratzione de giogu, cun su Napoli a ghiare semper sa partida. Su Casteddu ispetat is aversàrios in defensa, ma sufrit su giogu de is partenopeos, e pròpiu in un’atzione a in antis de is meres de domo, s’àrbitru surbiadu su rigore.

Difatis, est su defensore Godin a cajonare su dannu, cun un’iscuta de pee a Osihmen bravu a ddu collionare cun una finta. Tzertu, curpa meda dda tenet su defensore argentinu puru, pro ite unu giogadore de s’isperièntzia sua non podet fàghere una cosa de gasi a presu de da porta sua.

Dae is ùndighi metros si presentat Insigne chi iscudet e faghet gol.

Colant pagu prus de deghe minutos dae su segundu tempus, e pro su Casteddu sa partida est belle acabbada, difatis in campu si biet su Napoli ebbia.

Is càmbios lompent bia sa fine de sa partida, cun s’atacante Keita Balde chi diat èssere dépidu intrare prima de tando in su retàngulu birde.

Tzertu su Napoli est una de is iscuadras prus balentes de su campionadu e no est pro de badas chi is òmines de Spalletti sunt primos in classìfica, ma su Casteddu at giogadu sena gherrare e pagu cumbintu. Amus a bìdere si at a agatare su coràgiu contras su Venezia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22