Is Natzionales italianas de Pallavolo de is òmines e de is féminas chi ant bìnchidu is ùrtimos europeos sunt istados retzidos a su Palatzu Cuirinale dae su Presidente de sa Repùblica, Sergio Mattarella.

Pro s’ocasione sunt intervénnidos su presidente de su Comitadu Olìmpicu Natzionale Italianu, Giovanni Malagò, su presidente de sa Federatzione Italiana de Pallavolo, Giuseppe Manfredi, su cummissàriu tècnicu de sa Natzionale Italiana de is fèminas, Davide Mazzanti e su cummissàriu tècnicu de sa Natzionale de is òmines, Ferdinando De Giorgi, sa Vitze Capitana de sa Natzionale Italiana de is féminas, Ofelia Malinove e su Capitanu de sa Natzionale Italiana de is òmines, Simone Giannelli.

Pròpiu custos ùrtimos duos ant regaladu a su Presidente de sa Repùblica duas botzas firmadas dae totus is giogadores de is duas seletziones e in prus duas mallieddas cun su nùmeru unu e cun su numène de Mattarella.

Su Capu de s’Istadu at naradu chi is Natzionales Italianas de Pallavolo de is òmines e de is fèminas ant onoradu su Paisu e chi custas vitòrias sunt istadas importantes meda pro sa gente, pro ite balet comente unu singiale bonu a pustis su Covid-19.

Mattarella a naradu puru chi custu iscuta de tempus est istada ispantosa pro s’isport italianu e at auguradu chi non si firmet ma chi sigat peri in is annos benentes.

A beru est istada un’istade chi nos at fatu bisare, cun is atletas asulos si sunt fatos bàlere totus is atopos isportivos. Pensamus a is Olimpìades, a is Europeos de fùbalu e a is Paralimpìades. Sa cosa bella est chi comente semper, a su cumentzu is italianos non sunt favoridos, ma posca, is su momentu giustu, resessent a agatare sa fortza pro bìnchere.

Custa est una calidade chi est in intro de su pópulu italianu, chi nche dd’at fata a si torrare a pesare dae is rutòrgias in medas ocurrèntzias, comente a pustis de sa Gherra Manna e de sa Segundu Gherra Mundiale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su Casteddu at torra pérdidu, custa borta contra su Napoli.

Is sardos ant giogadu sa partida cun timòria dae su cumintzu, cun s’allenadore Mazzarri chi at postu a in antis un’atacante ebbia, Joao Pedro, chi est istadu dominadu dae is defensores aversàrios, mescamente dae Koulibaly.

Is asulos ant marcadu sa primu rete a su minutu 11, gràtzias a Osihmen, cun s’atacante nigerianu chi at collionadu is tzentrales de sa defensa ruju-blu.

Is casteddajos ant reagidu belle nudda, antzis sunt is napoletanos chi tenent àteras ocasiones de gol, ma pro bona sorte de is òmines de Mazzarri e pro mèritu de su portieri Cragno, no agatant sa rete.

S’iscuadra de Spalletti cumandat su giogu pro totu su primu tempus, cun grandu brègiu de is tifosos de domo chi ant festadu is giogadores issoro a s’essida dae su campu.

Su segundu tempus est aguale a su de prima fratzione de giogu, cun su Napoli a ghiare semper sa partida. Su Casteddu ispetat is aversàrios in defensa, ma sufrit su giogu de is partenopeos, e pròpiu in un’atzione a in antis de is meres de domo, s’àrbitru surbiadu su rigore.

Difatis, est su defensore Godin a cajonare su dannu, cun un’iscuta de pee a Osihmen bravu a ddu collionare cun una finta. Tzertu, curpa meda dda tenet su defensore argentinu puru, pro ite unu giogadore de s’isperièntzia sua non podet fàghere una cosa de gasi a presu de da porta sua.

Dae is ùndighi metros si presentat Insigne chi iscudet e faghet gol.

Colant pagu prus de deghe minutos dae su segundu tempus, e pro su Casteddu sa partida est belle acabbada, difatis in campu si biet su Napoli ebbia.

Is càmbios lompent bia sa fine de sa partida, cun s’atacante Keita Balde chi diat èssere dépidu intrare prima de tando in su retàngulu birde.

Tzertu su Napoli est una de is iscuadras prus balentes de su campionadu e no est pro de badas chi is òmines de Spalletti sunt primos in classìfica, ma su Casteddu at giogadu sena gherrare e pagu cumbintu. Amus a bìdere si at a agatare su coràgiu contras su Venezia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22