S’artèfitze de sa sarvesa insperata de su Casteddu est istadu esoneradu.

S’allenadore toscanu, Leonardo Semplici, est istadu bogadu dae sa ghia tècnica de s’iscuadra a pustis de àere fatu unu puntu ebbia in is primas tres dies de campionadu.

S’allenadore chi s’annu coladu aiat sostituidu a Eusebio De Francesco, pagat sa derrota in domo contra su Genoa, a pustis de èssere istadu in vantàgiu pro duos a zero finas a su 60’ e posca èssere istadu sorpassadu pro 2-3 in su finale.

Sa sotziedade no at cunsideradu is medas ausèntzias tra is giogadores de su Casteddu e su fatu chi Semplici no apat tentu mai totu is giogadores a disponimentu, comente sutaliniadu in su post iscritu in serada dae s’oramai ex allenadore.

Ma Semplici s’est dimustradu unu sennore, narende·si orgolliosu de àere rapresentadu su Casteddu e sa terra sarda. Immoe est ufitziale Walter Mazzarri, allenadore nou de su Casteddu. Su tècnicu ex Napoli, Inter e Torinu at firmadu unu cuntratu cun sa sotziedade finas a su 30 de làmpadas 2024.

Cun issu arribbant su vitze allenadore Claudio Bellucci, su preparadore atlèticu Giuseppe Pondrelli, su collaboradore tècnicu Claudio Nitti e s’analista de giogu Cristian Guerrini. Su cuntratu– segundu is primas informatziones ufitziosas – partit dae unu millione de èuros a istajone. Mazzarri, arribbadu a mangianu in su capulogu sardu, no at fatu decraratziones a is cronistas in s’aeroportu.

S’est limitadu a nàrrere chi at a faeddare prima de Làtziu-Casteddu, trasferta difìtzile meda, in prus chi connoschet sa mentalidade de is sardos e ant a contare is fatos, non is faeddos Custu merie at a dirìgere su primu allenamentu.

Pro issu una torrada in Sardigna, bidu chi cun is ruju-blu at esordidu in Sèrie A in su 1982, in s’ùrtimu cuartu de ora in una gara in domo contra s’Inter. Pro issu a fine carriera in su ’93-’94 un’istajone cun sa Torres in Sèrie C2.

Sa sotziedade de su presidente Tommaso Giulini, at iscritu chi is caraterìsticas de su diretore tècnicu nou sunt: giogu propositivu, ardera e carisma.

S’isperat chi custas calidades bèngiant postas in pràtica, is àteras iscuadras no ant a istare a pompiare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Derrota mala a ingùrtere pro su Casteddu a s’Unipol Domus, pro 2-3, contra su Genoa de Ballardini.

Delusu meda Leonardo Semplici: su Casteddu, in vantàgiu de duos gol in domo, est istada sighidu e sorpassadu dae is lìgures chi s’ant leadu a domo sa vitòria.

Intervistadu dae is giornalistas a s’agabbu de sa partida, su tècnicu casteddaju non chircat iscusas, ma ispiegat ma chircat de ispiegare chi chi est capitadu.

Difatis Simplici at sutaliniadu is vàrios problemas tentos a intre chida, a càusa de is medas ausèntzias e de is giogadores infortunados. Difatis una pariga de custos ant giogadu a pustis de pagos allenamentos e su tzentruainantis Pavoletti – fondamentale pro s’atacu de is sardos – no est istadu ischieradu.

In prus un’àtera iscumìniga durante sa partida est istada s’ingollidura de Walukiewicz chi est istadu sostituidu dae Caceres. Pro 60’ s’est bidu unu bonu Casteddu posca de is errores individuales ant portadu a sa derrota finale.

Sa partida si fiat posta bene pro is sardos giai a su 15’, cun su tiru de rigore assignadu a su Casteddu pro aterramentu de Sabelli in is cunfrontos de Keita: tirat Joao Pedro e tirat Sirigu pro su gol de su vantàgiu isulanu.

A su cumintzu de sa ripresa su Casteddu torrat a marcare rete cun unu corpu de conca de Ceppitelli servidu dae su tiru dae s’àngulu de Marin, ma calicunu minutu a pustis su Genoa incurtzat is distàntzias: travessa de Cambiaso, Caceres si perdet de vista a Destro chi de conca passat sa difesa de Cragno.

A binti minutos dae s’agabbu arribbat su parègiu de su Genoa cun unu corpu de conca de Fares sercidu dae su tiru dae s’àngulu de Rovella. Ma su corpu finale arribbat pagu a pustis, torra cun su de Fares, chi marcat de conca su 2 a 3 pro su Genoa.

S’assaltu finale de su Casteddu non donat perunu frutu, mancu su passàgiu de Pereiro pro Carboni. A s’imbesse, in su finale s’iscuadra lìgure arriscat de fàghere fintzas sa de bator retes.

Pro finire, in su recùperu su Casteddu isprecat unas cantas ocasiones: primu cun Marin chi tenet sa botza de su parègiu ma iscudet artu mancari in bona positzione. Matessi cosa a su 92’ Farias cun un’istamborrada tzentrale e unu minutu a pustis su Genoa ponet Joao Pedro in dae in antis a su portieri, ma su brasilianu tirat artu e sa botza nche agabbat a pitzu de sa traversa.

Est s’ùrtima atzione de sa partida chi cundennat su Casteddu a s’iscunfita.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22