S’Itàlia sighit a iscrìere s’istòria de sa velotzidade in s’atlètica ligera.

Pag’ora a immoe in is 100 metros (cat. t63) a is Paralimpìades de Tòkyo, Ambra Sabatini at bìnchidu sa medàllia de oro in 14″11 – primados de su mundu – dae in antis a Martina Caironi (14″46) e a s’àtera asula Monica Contrafatto (14″73), realizende una tripleta fantastica.

Emotzionadas meda is tres pitzocas a pustis de àere segadu su traguardu, cussientes de àere fatu una marrania istòrica.

Ant finidu abbratzadas, imbussiadas in su tricolore, brinchende, riende e cantende. Una tripleta istòrica, tres banderas tricolores in su chelu, tres italianas subra su pòdiu, totus e tres cuntentas, totus e tres cummòvidas mentras Luca Pancalli ddas premiaiat.

A pustu is asulas in unu pòdiu ant cantadu s’innu de Itàlia cun sa manu in su coro.

«Nche semus renèssida, semus campiones de su Mundu», ant naradu a sa prima intervista. «Est su chi bisaìamus, est bellu meda», at naradu sa giòvana Sabatini. «S’est creadu un’ispìritu bellu, semus ditzosas meda. Cumplimentos a Ambra pro su primadu de su Mundu», at agiuntu Martina Caironi chi cussu primadu dd’at tentu prima de issa e chi s’at leadu a domo sa prata fintzas in su sartu in longu.

Est sa bergamasca Caironi sa chi at permìtidu custu pòdiu. Est sa 31enne de Artant Lombardo chi bivet a Bologna a àere abertu su caminu e a àere ispiradu is àteras. At pèrdidu una camba in un’intzidente in moto cando aiat 18 annos e at iscobertu s’atlètica. Mentras issa binchiat s’oro a Londra 2012, Monica Contrafatto dda castiaiat in tv dae unu letu de ispidale. Medàllia a su balore de s’esèrtzitu, at pèrdidu una camba in Afganistàn. Su de dd’àere bida a Londra dd’at cumbinta a si donare a s’atlètica.

Ambra Sabatini fiat una promissa de su mesufundu. In su 2019 fiat andende a s’allenare in motorinu cun su babbu cando una màchina at invàdidu sa corsia e issa s’est agatada cun s’anca de manca incarcada in is lamieras. Est istada male meda, ma Ambra ischit chi s’isport devet abarrare in sa vida sua. Bastat a bìere su chi ant fatu Bebe Vio o Alex Zanardi, ma est Martina Caironi sa reina de s’atlètica paralìmpica. «So semper istada un’isportiva, pro mene cùrrere est naturale. Sa grandu fortza dd’apo iscoberta a pustis. Non s’ischit mai cantu si podet èssere coragiosos finas a cando non ti sutzedent tzertas cosas».

Pro s’ispeditzione asula a is Giogos Paralìmpicos de Tòkyo, si tratat de sa de 69 medàllias in totale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Pro su Casteddu sa prima partida de su campionadu est istada istragosa meda, pro more de su Spezia.

In s’istàdiu Unipol Domus, su disafiu est acabbadu 2-2, cun is lìgures de Thiago Motta a in antis pro duas bortas gràtzias a is retes de Gyasi e de Bastoni.

A cumintzu de sa gara is atacantes de su técnicu argentinu no ant donadu puntos de riferimentu a su Casteddu, faghende ammachiare is defensores ruju-blu.

Difatis Gyasi, gràtzias a una triangulatzione cun su cumpàngiu Verde, cun un’iscuta de pee at portadu in vantàgiu is ispetzinos. Is ruju-blu ant proadu a paregiare ma is lìgures ant fatu guàrdia bona, e su portieri Zoet at fatu una bella parada a sa coa de su primu tempus.

A pustis su cumintzu de sa segunda parte de gara, su Spezia est istadu capatzu de agatare sa rete de su duos a zero cun Bastoni, bravu a isfrutare unu passàgiu de Gyasi.

Ma pròpiu cando su Casteddu pariat ammortighinadu, est lòmpida sa reatzione de is sardos, ghiados dae su capitanu Joao Pedro.

Prima at acurtziadu is distàntzias cun unu gol serbidu dae su cumpàngiu de atacu, Pavoletti, e a pustis de una pariga de minutos at marcadu sa rete de su duos a duos, gràtzias a unu rigore.

Finas a s’acabbu de sa gara is meres de domo ant proadu a conchistare is tres puntos, ma su resurtadu de sa partida no at prus cambiadu.

Pro comente si fiat posta sa partida, a su Casteddu est andada meda bene, ma s’allenadore ruju-blu, Semplici, no at a èssere grandu cuntentu.

Una partida giogada male in sa zona de sa defensa pro is sardos e in prus de s’àteru sa reatzione est lòmpida a pustis de àere pigadu duos tzafos dae un’iscuadra chi no est tra is prus balentes de sa Sèrie A.

Joao Pedro s’at carrigadu a coddu s’iscuadra in s’ora de su peus istragu, ma custu no at a bastare semper. Si in sa partida sighente contra su Milan su Casteddu at a giogare comente a lunìs, seguru chi at a pèrdere in malu modu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22