Su futuru est semper prus a probe.

Custu nos benit de nàrrere a pustis chi su Diretore amministrativu de Tesla Elon Musk at presentadu su progetu de unu robot umanòide chi at a esordire in forma de protòtipu “s’annu chi benit”.

Su Tesla Bot – segundu su chi narant is mèdios de comunicatzione – at a isfrutare s’esperièntzia de s’azienda cun is màchinas automatizadas, e fintzas hardware e software ant a èssere ligados a is isvilupos de su sistema Autopilota pro s’assistèntzia a sa ghia.

Segundu una nota de su situ de sa sotziedade, sustos robot ant a èssere progetados pro gestire còmpitos non seguros, ripetitivos o isconchiosos.

Musk, presentende su progetu nou durante s’eventu ‘Al Day’ cuncordadu dae Tesla e dedicadu a s’Intelligèntzia artifitziale at naradu chi pensat in su benidore su traballu fìsicu at a èssere unu sèberu ebbia.

Un’arresonu chi de seguru at a pòdere fàghere chie at a tènnere risursas finantziàrias e preparatzione. Fintzas ca creimus chi su costu de custos robots ant a èssere pro is butzacas de pagos, bidu fintzas su nùmeru limitadu chi at a pòdere èssere fraigadu e postu in su mercadu.

De seguru però su mundu de sa robòtica rapresentat su benidore e medas logos de traballu ant a èssere assistidos dae custos robots. Su disafiu pro s’òmine est de tènnere una preparatzione semper prus agiornada e de ispèndere in su mercadu de su traballu. Ma inoghe intramus in sa chistione printzipale: ddoe at a èssere unu sistema chi at a cunsentire a totu is persones de atzèdere a custas formatziones artas?

Ddoe at galu medas disegualidades sotziale, chi non cunsentint a totus de tènnere is matessi possibilidades e ocasiones in su mundu de s’imparu, mescamente in su campu de s’iscièntzia e de sa tecnologia.

Custos duas ramos de su connoschimentu si impreadas e isvilupadas in su modu giustu diant pòdere permìtere de limitare custas disegualidades.

S’isperu nostru est chi custos progetos noos comente a is robot umanòide potzant portare a custu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

In Sardigna custu coa de chida torrat s’antitziclone “Lucifero”

Responsàbile de s’undada de calore in is dies coladas at a torrare a interessare s’ìsula nostra, cun sa chi at a devènnere sa prus caente de Itàlia.

Difatis is temperaduras in is zonas internas meridionales ant a lòmpere a 37 grados. Belle in totu s’Itàlia su termòmetru che at a isciaddire is 34 grados: s’andat dae is 36 de s’Emilia a is 35 de unas cantas zonas de su Vènetu, de sa Lombardia, de sa Pùglia, de sa Sitzìlia e de sa Basilicata.

Custa bia però s’antitziclone at a durare prus pagu. A su mancu in su Nord, acanta dae lunis s’arribu de abba prus frisca at a favorire temporadas mannas, chi a pustis de martis ant a corpire fintzas Marche e Umbria.

In Sardigna a dolu mannu abarrat artu fintzas su perìgulu pro is fogos, a su mancu pro sa die de sàbadu 21 de austu. S’arriscu interessat fintzas sa zona de Casteddu. Sa Protetzione tzivile regionale at publicadu un’avisu de colore arantzu.

Ma comente rimediare a custa undada noa de calore? Chie at a pòdere s’at a chircare unu pagu de friscura in is localidades de mare.

In custa chida a pustis de Mesaustu s’est assistidu a una bera invasione de is marinas sardas dae banda de residentes e turistas.

Chie no at a pòdere andare a mare e at a èssere custrintu a s’abarrare in bidda o in tzitade, balent semper is matessi cussìgios: evitare de essire dae domo a forru de sole, bufare e papare fruta meda.

A totus si racumandat de tènnere cuidadu de is betzos e de is prus dèbiles, unu gestu piticu podet èssere fundamentale.

Si si biet unu fogu tocat a avèrtere deretu is autoridades cumpetentes. In medas ocasiones su fatore tempus est determinante a firmare unu fogu e limitare is disacatos.

Est galu biu su regordu de su fogu chi at brusiadu su Monteferru e unas cantas zonas de s’Aristanesu chi ant bisestradu sartos e aziendas agrìculas, pagu mancu de unu mese a oe. Duncas tocat a ammentare semper de donare cura e de collaborare totu paris a sa difesa de su patrimòniu ambientale nostru.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22