Derrota mala a ingùrtere pro su Casteddu a s’Unipol Domus, pro 2-3, contra su Genoa de Ballardini.

Delusu meda Leonardo Semplici: su Casteddu, in vantàgiu de duos gol in domo, est istada sighidu e sorpassadu dae is lìgures chi s’ant leadu a domo sa vitòria.

Intervistadu dae is giornalistas a s’agabbu de sa partida, su tècnicu casteddaju non chircat iscusas, ma ispiegat ma chircat de ispiegare chi chi est capitadu.

Difatis Simplici at sutaliniadu is vàrios problemas tentos a intre chida, a càusa de is medas ausèntzias e de is giogadores infortunados. Difatis una pariga de custos ant giogadu a pustis de pagos allenamentos e su tzentruainantis Pavoletti – fondamentale pro s’atacu de is sardos – no est istadu ischieradu.

In prus un’àtera iscumìniga durante sa partida est istada s’ingollidura de Walukiewicz chi est istadu sostituidu dae Caceres. Pro 60’ s’est bidu unu bonu Casteddu posca de is errores individuales ant portadu a sa derrota finale.

Sa partida si fiat posta bene pro is sardos giai a su 15’, cun su tiru de rigore assignadu a su Casteddu pro aterramentu de Sabelli in is cunfrontos de Keita: tirat Joao Pedro e tirat Sirigu pro su gol de su vantàgiu isulanu.

A su cumintzu de sa ripresa su Casteddu torrat a marcare rete cun unu corpu de conca de Ceppitelli servidu dae su tiru dae s’àngulu de Marin, ma calicunu minutu a pustis su Genoa incurtzat is distàntzias: travessa de Cambiaso, Caceres si perdet de vista a Destro chi de conca passat sa difesa de Cragno.

A binti minutos dae s’agabbu arribbat su parègiu de su Genoa cun unu corpu de conca de Fares sercidu dae su tiru dae s’àngulu de Rovella. Ma su corpu finale arribbat pagu a pustis, torra cun su de Fares, chi marcat de conca su 2 a 3 pro su Genoa.

S’assaltu finale de su Casteddu non donat perunu frutu, mancu su passàgiu de Pereiro pro Carboni. A s’imbesse, in su finale s’iscuadra lìgure arriscat de fàghere fintzas sa de bator retes.

Pro finire, in su recùperu su Casteddu isprecat unas cantas ocasiones: primu cun Marin chi tenet sa botza de su parègiu ma iscudet artu mancari in bona positzione. Matessi cosa a su 92’ Farias cun un’istamborrada tzentrale e unu minutu a pustis su Genoa ponet Joao Pedro in dae in antis a su portieri, ma su brasilianu tirat artu e sa botza nche agabbat a pitzu de sa traversa.

Est s’ùrtima atzione de sa partida chi cundennat su Casteddu a s’iscunfita.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Bebe Vio at bìnchidu un’àtera bia sa medàllia de oro a is Paralimpìades de Tokyo, a pustis de sa vitòria a Rio 2016.

Sa gióvana venetziana at arropadu, in sa finale de su fioretu individuale categoria B, sa tzinesa Zhou cun su resurtadu de 15 a 9.

In sa gara at tentu prima 5 puntos de vantàgiu e a pustis chi s’aversària s’est torrada a acostiare, s’atleta italiana at cungiadu s’isfida cun tres istocadas de sighidu.

Un’àtera proa de fortza de Bebe, chi custa istajone at tentu unu dannu lègiu, chi at fatu arriscare sa partetzipatzione a is giogos paralìmpicos e fàghere acabbare sa carriera in s’ischerma.

Difatis, pro more de un’infetzione de istafilococo at tentu sa mutzadura de un’àtera parte de su bratzu mancu e si s’esseret pèrdidu àteru tempus diat èssere morta.

Duncas gràtzias a custu interventu s’est sarbada, ma at tentu duos meses ebbia pro si preparare a is Paralmpìades. Però Bebe est brullana e mancari a malagana, est resèssida fintzas a si nde rìere: difatis at naradu ca s’ortopédicu chi dd’at curada est su dotore Accetta. Unu nùmene chi, a dolu mannu, si deghet a custa istòria.

A pustis sa premiatzione s’atleta italiana s’est cummóvida meda paris cun is allenadores e sa gente sua. Custa gióvana est un’esèmpiu pro totus is generatziones pro sa capatzitade de gherrare e de andare a in antis, mancari sa mala sorte. Bebe est semper cun su rìsitu in sa cara, e custa est una cosa bella meda pro ite resesset a donare a totus coràgiu e allegria.

Persones aici balentes, chi totu su Mundu nos imbìdiat, sunt unu bantu pro s’Itàlia e diant dèpere èssere tzelebrados meda prus de comente fàghimos immoe.

In custas dies, sa rapresentativa natzionale est fàghende bella figura a is giogos de Tokyo, cun degheoto medàllias giai in su cadàsciu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22