Is ùrtimos traghetos sunt partidos eris a note

Firmos fintzas is collegamentos bia mare tra Casteddu e Civitavecchia.

A note ant mòvidu us ùrtimos traghetos Tirrenia e pro immoe non sunt in calendàriu àteros biàgios. Tra unu mese, in prus, arriscat de si firmare fintzas sa continuidade territoriale aèrea ca Alitalia at a garantire is bolos finas a su 14 de mese de ladàmine ebbia.

Pro varare su bandu cun sa protzedura de apretu sa Regione abetat inditos dae Roma. Eris sero est partida s’ùrtima nave de is 20 dae Casteddu cara a Civitavecchia.

Dae immoe sa lìnia, istituida unu sèculu a oe, si firmat. Sa cunventzione de Tirrenia cun s’Istadu est iscadida in argiolas e immoe si sighint is règulas de su lìberu mercadu, ma pro medas cumpangias non cumbenit. In su cabulogu at a restare sa Grimaldi, chi immoe gestit sa lìnia Casteddu-Napoli-Palermo ma – pro s’ora – non paret intentzionada a estèndere su traficu sua in sa rota cara a Civitavecchia.

Dae s’assessoradu regionale a is Trasportos, sunt faghende totu su possìbile ca su 15 de mese de ladàmine non b’apat peruna interrutzione de is bolos Ma sa regione est isetende is indicos dae Roma, in antis de protzedire cun s’afidamentu – cun protzedura de apretu – de is collegamentos intre is aeroportos de s’Ìsula e is de Fiumicino e Linate.

Pro immoe est istadu detzìdidu chi Ita no at a dèvere rimbursare s’Istadu pro su prèstidu illegale a Alitalia. Ma dae Bruxelles ant fintzas torradu a nàrrere chi sa sotziedade noa no at a pòdere surbire is rotas garantidas finas a immoe dae sa cumpangia in amministratzione istraordinària.

Est istadu ispiegadu chi is òbrigos de servìtziu pùblicu de Alitalia no ant a èssere trasferidos a Ita. Is cuntratos relativos ant a èssere agiudicados subra in base a garas de apaltu abertas, trasparentes, non discriminatòrias e incunditzionadas. Duncas serbit una protzedura pùblica. Inoghe diat pòdere intrare in giogu Ita, o peri àteras cumpangias.

Una situatzione pagu pragheros pro s’Itàlia e unu grandu discumbèniu pro is sardos, chi bident torra non rispetadu su deretu issoro a sa mobilidade.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Derrota mala a ingùrtere pro su Casteddu a s’Unipol Domus, pro 2-3, contra su Genoa de Ballardini.

Delusu meda Leonardo Semplici: su Casteddu, in vantàgiu de duos gol in domo, est istada sighidu e sorpassadu dae is lìgures chi s’ant leadu a domo sa vitòria.

Intervistadu dae is giornalistas a s’agabbu de sa partida, su tècnicu casteddaju non chircat iscusas, ma ispiegat ma chircat de ispiegare chi chi est capitadu.

Difatis Simplici at sutaliniadu is vàrios problemas tentos a intre chida, a càusa de is medas ausèntzias e de is giogadores infortunados. Difatis una pariga de custos ant giogadu a pustis de pagos allenamentos e su tzentruainantis Pavoletti – fondamentale pro s’atacu de is sardos – no est istadu ischieradu.

In prus un’àtera iscumìniga durante sa partida est istada s’ingollidura de Walukiewicz chi est istadu sostituidu dae Caceres. Pro 60’ s’est bidu unu bonu Casteddu posca de is errores individuales ant portadu a sa derrota finale.

Sa partida si fiat posta bene pro is sardos giai a su 15’, cun su tiru de rigore assignadu a su Casteddu pro aterramentu de Sabelli in is cunfrontos de Keita: tirat Joao Pedro e tirat Sirigu pro su gol de su vantàgiu isulanu.

A su cumintzu de sa ripresa su Casteddu torrat a marcare rete cun unu corpu de conca de Ceppitelli servidu dae su tiru dae s’àngulu de Marin, ma calicunu minutu a pustis su Genoa incurtzat is distàntzias: travessa de Cambiaso, Caceres si perdet de vista a Destro chi de conca passat sa difesa de Cragno.

A binti minutos dae s’agabbu arribbat su parègiu de su Genoa cun unu corpu de conca de Fares sercidu dae su tiru dae s’àngulu de Rovella. Ma su corpu finale arribbat pagu a pustis, torra cun su de Fares, chi marcat de conca su 2 a 3 pro su Genoa.

S’assaltu finale de su Casteddu non donat perunu frutu, mancu su passàgiu de Pereiro pro Carboni. A s’imbesse, in su finale s’iscuadra lìgure arriscat de fàghere fintzas sa de bator retes.

Pro finire, in su recùperu su Casteddu isprecat unas cantas ocasiones: primu cun Marin chi tenet sa botza de su parègiu ma iscudet artu mancari in bona positzione. Matessi cosa a su 92’ Farias cun un’istamborrada tzentrale e unu minutu a pustis su Genoa ponet Joao Pedro in dae in antis a su portieri, ma su brasilianu tirat artu e sa botza nche agabbat a pitzu de sa traversa.

Est s’ùrtima atzione de sa partida chi cundennat su Casteddu a s’iscunfita.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22