Est mortu a 88 annos s’atore frantzesu Jean-Paul Belmondo. Belmondo est mortu in sa domo sua de Parigi, a s’edade de 88 annos.

Ispoderadu dae unu pagu de tempus, su legale suo at fatu a ischire chi s’est mortu serenu. Icona de su tzìnema frantzesu e europeu, Belmondo at giradu 80 film.

Lassat in eredade ruolos indimenticàbiles, comente cussu in ‘A bout de souffle’ (Fino all’ultimo respiro) de Jean-Luc Godard o bolende subra su chelu de Venètzia, apicadu a un’elicòteru, in ‘Le Guignolo’ (L’ucello di Piazza San Marco) de Georges Lautner.

Naschidu in Neuilly sur Seine, a sas ghennas de Parigi, ma de sàmbene italianu, sende ca su babbu fiat Paolo Raimondo, un’iscultore de bona fama.

A pustis de un’esòrdiu in teatru, Belmondo si faghet apretzare comente ‘jeune premier’ in ‘Peccatori in Blue Jeans’ de Marc Allegret (1958), ma dat fintzas fisùtzia a su giòvanu meda Claude Chabrol chi ddu dirighet in ‘A doppia mandada’ (1959). Dae cue cumentzat su percursu parallelu suo cun Alain Delon chi est conchistende su pùblicu gràtzias a sa pellìcula famada “Delitto in pieno sole” (regia de René Clement).

Ma ‘Bebel’ (gasi si faghet mutire pro sutaliniare s’istile istravagante e risulanu suo) est lestru a cambiare registru afidende·si a Jean-Luc Godard chi ddu bolet protagonista de ‘Fino all’ultimo respiro (1960) e posca de ‘Pierrot le fou’ (1965).

Traballare cun su mastru indiscussu de sa Nouvelle Vague rapresentat pro Belmondo unu disafiu: devet tènnere paris sos cànones de sa recitatzione clàssica e s’stravolgimentu issoro.

E ddoe resesset, contribuende a solu a sa resessida cummertziale de is duos film. Respetu a Delon, de duos annos prus giòvanu, Bebel tenet su vantàgiu de sa simpatia comunicativa, unu bellu nasu istrecadu de pugilista fallidu, una aprontadura naturale a ispantare, mentras su gemellu ‘suo’ giogat sa carta de su bellu tenebrosu, ingaddinadu dae is dilemmas interiores. Ant esordidu (o casi) cun su matessi maistru, Yves Allegret, ant giogadu ambos duos cun sa nouvelle vague, ant tentu fortuna cun is fèminas e cun sos ispetadores, si partzint su campu comente Coppi e Bartali.

In calicunu modu sunt unidos fintzas dae s’Itàlia, sende chi totu e is duos benint collidos comente fìgios de ànima dae su tzìnema italianu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Milan-Casteddu est acabbada 4-1 pro is òmines de Stefano Pioli, chi diant àere fintzas podidu bìnchere cun àteros gol de diferèntzia in prus.

Is ruju-blu sunt torrados a Sardigna a bértula bóida e dudos meda pro is partidas sighentes de su campionadu. Tzertu, is ruju-nieddos sunt una de is iscuadras chi s’ant a giogare s’iscudetu de custa istajone, ma pro comente ant pèrdidu, s’allenadore Semplici diat a dèpere pensare a calicuna cosa pro is partidas a pustis de sa pàsida pro is Natzionales.

Sa rete de Tonali, gràtzias a un’iscuta de pee de punitzione, at furriadu sa partida in favore de su Milan, e is lombardos ant agatadu in presse bonu giogu e fatzilidade pro sa manovra.

Is sardos però sunt resèssidos a agatare sa rete de su parègiu cun Deiola, chi at isfrutadu bene su passàgiu de su capitanu Joao Pedro.

Ma is òmines de Semplici no ant tentu mancu su tempus pro festare, ca su Milan est torradu a in antis cun unu gol de Leao, iscaminadu dae su cumpàngiu Diaz, chi a collionadu a su portieri ruju-blu.

A pustis at fatu sa parte de su lione su campione de su Mundu frantzesu, Giroud, chi prima at marcadu sa rete cun una bella calada de pee dae foras de s’àrea e a pustis cun unu rigore at firmadu su resurtadu a su 4-1.

Custu est istadu unu comintzu mannu pro su giogadore nùmeru noe de su Milan, chi est resèssidu a si nde pesare s’iscomìniga chi portaiat in pitzu in ùrtimus annos.

Su Casteddu dae custa partida nde essit a ossos segados, non pro su resurtadu, ma pro comente is aversàrios sunt resèssidos a lòmpere a sa rete, pro unu tzentrucampu chi no at fatu giogu e un’atacu chi est istadu pagu perigulosu.

A s’allenadore Semplici dd’at a tocare a traballare in is chidas chi benit pro fàghere torrare a giogare bene s’iscuadra e seguramente at a pedire àteros giogadores a su presidente Giulini. In custas dies su diretore isportivu Capozucca at a chircare is òmines chi serbint pro afortiare s’iscuadra.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22