Est mortu a 80 annos Charlie Watts, su mìticu baterista e fundadore de is Rolling Stones.

Dd’at fatu a ischire sa Bbc, pro mèdiu de s’agente de su musitzista. S’artista in is dies coladas aiat dèvidu rinuntziare a s’ùrtimu giru de is Stones a càusa de s’agravamentu de cunditziones de salude. Sa morte diat èssere acontèssida a pustis de un’interventu apretosu a su coro.

A 18 annos sonaiat giai in is tzìrculu londinesos bestendesi giai cun cussa elegàntzia jazzìstica e a su pianoforte iscadenadu de Jerry Lee Lewis o a is mòvidas de ancas de Elvis preferiat su sonu de tzertos 78 giros de Jelly Roll Morton o Charlie Parker.

Charlie istaiat in ie in artu sena si lassare andare a un’assolo mai rechertu, afirmende chi no li praghiant is assolos de bateria. Naraiat de prefèrrere is bateristas chi sonant cun sa banda.

Cando issu bestiat una malliedda, Mick sfoderava unu capotu damascadu de sciantosa; si poniat giacheta e camisa e Keith Richards artziaiat in palcu imbusciadu cun unu pastranu casi deretu de essire dae sa naftalina. Yin e Yang, die e note. Epuru Charlie at semper sighidu a detzìdere issu su ritmu de is Stones.

Sa rivista “Rolling Stone” dd”aiat piatzadu a sa de dòighi positziones tra s bateristas de totu is tempos, ma Charlie, comente semper, non si dd’aiat pigada.

Pro issu is istimados frades Keith, Mick, Ronnie fiant prus a prestu una “banda blues”. Un’idea unu pagu diversa respetu a su mundu chi giraiat a fùrriu de is Stones.

Biviat in sa contea de Devon, pesaiat caddos àrabos e colletzionaiat ogetos de ogna genia: dae is repertos de sa gherra tzivile americana a diversas màchinas de època.

Unu cantu de Rock si nd’est andadu pro semper, a iscuse comente in s’istile suo, ma at a èssere difìtzile torrare a bìdere artistas de su livellu de Watts.

Semus seguros chi immoe at a èssere in su “paradisu” de is mannos de sa mùsica, mancari giai faghende unu cuntzertu cun calicunu àteru cantante famadu, comente a unu tempus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Pro su Casteddu sa prima partida de su campionadu est istada istragosa meda, pro more de su Spezia.

In s’istàdiu Unipol Domus, su disafiu est acabbadu 2-2, cun is lìgures de Thiago Motta a in antis pro duas bortas gràtzias a is retes de Gyasi e de Bastoni.

A cumintzu de sa gara is atacantes de su técnicu argentinu no ant donadu puntos de riferimentu a su Casteddu, faghende ammachiare is defensores ruju-blu.

Difatis Gyasi, gràtzias a una triangulatzione cun su cumpàngiu Verde, cun un’iscuta de pee at portadu in vantàgiu is ispetzinos. Is ruju-blu ant proadu a paregiare ma is lìgures ant fatu guàrdia bona, e su portieri Zoet at fatu una bella parada a sa coa de su primu tempus.

A pustis su cumintzu de sa segunda parte de gara, su Spezia est istadu capatzu de agatare sa rete de su duos a zero cun Bastoni, bravu a isfrutare unu passàgiu de Gyasi.

Ma pròpiu cando su Casteddu pariat ammortighinadu, est lòmpida sa reatzione de is sardos, ghiados dae su capitanu Joao Pedro.

Prima at acurtziadu is distàntzias cun unu gol serbidu dae su cumpàngiu de atacu, Pavoletti, e a pustis de una pariga de minutos at marcadu sa rete de su duos a duos, gràtzias a unu rigore.

Finas a s’acabbu de sa gara is meres de domo ant proadu a conchistare is tres puntos, ma su resurtadu de sa partida no at prus cambiadu.

Pro comente si fiat posta sa partida, a su Casteddu est andada meda bene, ma s’allenadore ruju-blu, Semplici, no at a èssere grandu cuntentu.

Una partida giogada male in sa zona de sa defensa pro is sardos e in prus de s’àteru sa reatzione est lòmpida a pustis de àere pigadu duos tzafos dae un’iscuadra chi no est tra is prus balentes de sa Sèrie A.

Joao Pedro s’at carrigadu a coddu s’iscuadra in s’ora de su peus istragu, ma custu no at a bastare semper. Si in sa partida sighente contra su Milan su Casteddu at a giogare comente a lunìs, seguru chi at a pèrdere in malu modu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22