Incredìbile a is Olimpìades de Tòkyo: s’Itàlia est medàllia dae oro in sa prova 4×100 de atlètica ligera.

Lorenzo Patta, Lamont Marcell Jacobs, Eseosa Fostine Desalu e Filippo Tortu ant conchistadu un’istòrica vitòria in 37.50 a dae in antis de sa Bretagna Manna 37.51 e de su Canadà 37.70. Pro is asulos est su primadu natzionale nou.

Un’oro in sa velotzidade pustis de cuddu conchistadu dae Jacobs in sa gara individuale de is 100 metros, chi portat s’atlètica italiana a una dimensione noa.

Non si bidiant custos resurtados dae is tempos de Mennea, cando a Mosca in su 1980 si fiat impostu in is 200 metros, a pustis de àere conchistadu s’annu prima su primadu de su mundu.

Un’istafeta perfeta, cun un’atzelerada ispantosa de Jacobs in sa segunda fratzione e Tortu chi in su finale at recuperadu a s’ùrtimu metru superende s’aversàriu britànnicu.

Pro s’Itàlia est sa de chimbe medàllias dae oro in s’atlètica ligera in custa editzione de is Giogos, unu primadu.

In s’Istàdiu Olìmpicu de Tòkyo a pustis de su trìunfu in s’istafeta 4×100 maschile dae is altoparlantes est istada trasmìtida sa cantzone “Notti Magiche”.

Pro sa Sardigna sa satisfatzione de bìdere triunfare duos de is cumponentes de s’iscuadra, ligados a sa Ìsula. Difatis Patta est unu pitzocu de Aristanis – su babbos e sa mama de Samugheu – e Tortu, mancari milanesu, est fìgiu de un’emigradu de Tèmpiu e est acapiadu meda a sa terra de orìgine de su babbu. A sa concrusione de sa gara, totus e is duos sunt istados fotografados cun sa bandera de is bator moros.

Sa vitòria chi est faghende su giru de su mundu, rapresentat un’àteru atu de su “Rinaschimentu” de s’isport italianu de custa istade, a pustis de sa vitòria a is Europeos e is numerosas medàllias bintas finas a immoe dae sa rapresentàntzia asula in Tòkyo.

A custu puntu però tocat a fàghere un’apellu a is màssimas autoridades guvernativas italianas e a is vàrias federatziones isportivas: investire de prus subra is istruturas e subra is giòvanos, ca custas vitòrias sunt su frutu de impignu e annos de allenamentos. Duncas pro agatare talentos e dare sa possibilidade a totus cussos chi pràticant is isport mutidos “minores”, tocat a comintzare a progetare giai dae immoe su benidore.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Oe est istada iscrita una pàgina de istòria importante de s’isport italianu.

Difatis pro s’iscuadra italiana presente a is Olimpìades de Tokyo sunt arribadas duas medàllias de oro in is chentu metros e in su brìnchidu in artu. Is medàllias sunt arribbadas una in fatu a s’àtera, faghende cumòvere totu s’Itàlia.

Sa vitòria de Marcel Jacobs est sa prima pro s’atlética asula in custa ispetzialidade de is giogos a chimbe chircos. Su giòvani politziotu nàschidu a El Paso in Texas e pesadu dae sa mama a Desenzano de Garda, at curtu sa gara de sa semifinales in 9,85 segundos e sa finale pro s’oro in 9,80 segundos, fàghende su record europeu de ispetzialidade binchende sa medàllia de oro.

Su curridore de 26 annos est lòmpidu a in antis de s’americanu Kerley – 9.84″ — e de su canadesu De Grasse – 9,89″ -.

Male meda s’àteru asulu in gara in is 100 metros: Filippo Tortu. Su giòvunu curridore, fìgiu de unu sardu emigradu a Milanu, no est resèssidu a si cualificare pro sa finale, pro more de àere cùrtu cun unu tempus artu meda: 10,16″. Pro Tortu chi in su 2018 aiat fatu unu tempus de 9,99″ – primu italianu a calare a suta de is deghe segundos — abarrat s’istafeta de is 4×100 e in is pròssimas garas individuales.

S’àtera medàllia de oro italiana est istada bìnchida dae s’àtleta de su sartu in artu, Gianmarco Tamberi, chi at brincadu 2,37 metros de artia. Custa vitòria puru est istada sa prima pro is òmines in custa ispetzialidade. Pro is fèmonas Sara Simeoni fiat resessida a bìnchere in is Olimpìades de Mosca de su 1980.

Tamberi est lòmpidu a su primu postu, paris cun su qatarianu Barshim, difatis est istadu un’oro “ex equo”. Una bella istòria pro s’atleta asulu, chi si fiat segadu su cambutzu pagu prima de is giogos olìmpicos de Rio de Janeiro de su 2014. Is sacrifìtzios fatos in custos annos sunt istados premiados.

Amus a bìdere chi s’Itàlia at a bìnchere àteras medàglias in is dies benetes: nois dd’isperamus.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22