Una bera gara de solidariedade pro agiuare is persones chi ant tentu disacatos a càusa de is fogos, prus che totu in s’Aristanesu.

Tra is personàgios prus famados ddoe est su rapadore de Terranoa Salmo, est a nàrrere Maurizio Pisciottu, chi in unu vìdeu publicadu in su profilu suo de Instagram at annuntziadu unu cuntzertu e una regorta de fundos pro agiudare is pastores e is àteros traballadores dannificados dae is fogos: “Ddoe at famìlias in dificultade, pastores chi ant pèrdidu su traballu e su bestiàmene. Tenent bisòngiu de nois”, at afirmadu.

Ma ddoe at fintzas allevadores de àteras zonas de sa Sardigna chi ant a rinnovare su ritu antigu de sa “Paradura”, chi previdit de donare bestiàmene a is collegas corfidos dae s’apretu, de manera chi potzant torrare a formare su tàgiu issoro.

Ddoe at assòtzios chi ant promìtidu de achistare sa proenda de cunsignare a is allevadores mentras in àteras zonas sunt predisponende depòsitos acanta at a èssere possìbile donare ballas de fenu.

Àteros sunt creende fundos pro regòllere ofertas dae destinare a sa càusa e is manifestatziones de istima e de partetzipatzione ativa non si contant prus, fintzas in is retes sotziales.

Giai a mangianu sunt arribbados a Cùllieri is primos agiudos a is pastores e a is aziendas agrìculas iscalabradas. Deghinas de autocarros e tratores sunt lòmpidos in su Montiferru dae is bidda a presu, pro cunsignare sa proenda. In primu lìnia sa Coldiretti de Aristanis, chi est gestende sa màchina de is agiudos, ma fintzas is àteros assòtzios e medas voluntàrios sunt in campu. Agiudos sunt in arribu fintzas dae is collegas allevadores de àteras Regiones italianas.

Cuntentu mannu Antonello Inzis, presidente de Coldiretti Cùllieri, Giuseppe Cottino, presidente Coldiretti de Tresnuraghes, Antonio Obinu, presidente Coldiretti de Iscanu, e Giommaria Scano, presidente Coldiretti Santu Lussùrgiu pro is lassas chi sighint arribbare. Is esponentes de Coldiretti ringratziant totus pro sa solidariedade is sèrias dificultades dèpidas a s’arribu non coordinadu de is agiudos. Ma ddoe at a èssere tempus pro megiorare custos mecanismos.

In s’ora, a pustis de su fogu, totu custa solidariedade prenet a beru su coro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Sunt istados medas a beru is dannos causados dae su fogu in is dies coladas in provìntzia de Aristanis, tra su Sinis e su Montiferru.

Is pampadas ispintas dae su bentu ant brusiadu campos, buscu, padentes e àrbores seculares. Medas is aziendas agrìculas distruidas e is domos tocadas dae su fogu, chi at custrintu gente meda a lassare is abitatziones issoro.

Seguru una de is cosas chi nos at abarrare in sa mente pro semper, chi est essida in totu is televisiones, giornales e mèdios sotziales, est s’imàgine de s’ogiastru millenàriu brusiadu de sa Tanca Manna, in Cùllieri. Un’àrbure chi est istadu testimòngiu de s’istòria de custa cussòrgia, chi durante is sèculos at fatu umbra a òmines meda. A suta de is cambos suos sunt lòmpidos betzos e gióvanos, ricos e pòberos, malos e bonos. Chie dd’ischit totu su chi at bidu totus custos annos de vida…

Ma forsis s’istòria de s’ogiastru, sìmbulu de Cùllieri e unu de is àrbores prus connotos de Sardigna, no est acabbada. Difatis ddoe est sa possibilidade chi is raighines suas si siat sarbadas e duncas su truncu chi no est istadu tocadu de su fogu diat pòdere torrare a bogare.

Su professore Gianluigi Bacchetta, diretore de s’Ortu Botanicu de s’Universidade de Casteddu, chi est andadu a bìdere su dannu, at naradu chi su calore no at tocadu is partes de intro de sa mata. Est istadu meda importante, s’interventu de is Vìgiles de su Fogu chi ant iscutu abba meda totu a inghìriu de s’àrbore faghende calare sa tèmpera.

S’ogiastru de Tanca Manna no at a èssere prus imponente comente a prima, ma chi s’at a sarbare at a abarrare comente esèmpiu de resistèntzia. A bellu a bellu a torrare mannu e in su benidore at a sighire a donare umbra a is chi ant a chircare su friscu a suta de is naes suas.

S’augùriu chi nos faghimus est chi is sardos de is sèculos chi ant a lòmpere siat prus rispetosos de s’ambiente de is sardos de oe.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22