Ite narant is sondàgios polìticos in Itàlia in s’ùrtimu annu?

Cun su Parlamentu in vacàntzia finas a su cumintzu de cabudanni, ocannu is fèrias de sos onorèvoles ant a durare belle unu mese, nos podimus fàghere un’idea cunfrontende sa rilevatzione fata dae s’istitutu Swg in sa data de su 3 de austu 2020 cun cussa de su 2 de austu 2021, cust’ùrtima publicada dae su Tg La7.

Castiende is duos sondàgios, essit a campu comente in is ùrtimos dòighi meses Giorgia Meloni apat balangiadu votos in is cunfrontos de Matteo Salvini, cun sa crèschida de in prus de ses puntos pertzentuales de Fratelli d’Italia chi est istada belle aguale a su calu atribuidu a sa Lega.

Belle unu puntu pertzentuale de mancu imbetzes pro su Movimentu 5 Isteddos, mentras su Partidu Democràticu at pèrdidu calicunu votu. In s’ùrtimu annu diat èssere imbetzes megiorada Forza Italia, gràtzias cun probabilidade de sa nàschida de su guvernu Draghi.

In su campu de is moderados su cunfrontu tra is duos sondàgios nde essit pregiadu Carlo Calenda, cun Itàlia Viva de Matteo Renzi chi imbetzes làssinat a suta de su limenàrgiu de isbarramentu de su 3%.

In s’ùrtimu annu Giorgia Meloni diat àere isciaddidu a Matteo Salvini cun duos milliones de votos in prus. Custu est su chi nde istupat a foras cunfrontende su sondàgiu polìticu fatu dae Swg in data 3 de austu 2020 e cussu, realizadu semper dae su matessi istitutu, publicadu su 2 austu coladu.

Sa crèschida de Fratelli d’Italia, craru giai in su 2020, diat àere cumentzada giai dae beranu, cando Giorgia Meloni at detzìdidu de tènnere su partidu suo foras de sa majoria chi sustentat su guvernu Draghi.

In su matessi tempus si diat èssere abrandada sa crisi de sa Lega, sende chi in is ùrtimas dies Matteo Salvini e Silvio Berlusconi ant fatu cumprèndere de bòlere atzellerare in su progetu de federatzione tra su Carroccio e Forza Italia.

Su passàgiu de incàrrigos tra Nicola Zingaretti e Enrico Letta diat pàrrere àere firmadu sa pèrdida de cunsensos atestada a su Partidu Democràticu, mentras su cunfrontu tra is duos sondàgios tzertìficat sa crisi de cunsensos de su Movimentu 5 Isteddos respetu a is eletziones polìticas de su 2018.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Nues nieddas torrant a ameletzare is Olimpìades de Tokyo.

Giai si diant dèpere èssere fatas in s’istade 2020, ma pro more de su Covid-19 sunt istada istransidas a ocannu. Però immoe, comente at naradu su capu de su sótziu organizadore, nch’est s’arriscu chi cun s’aumentu de is cundiduras de custa pesta malaita, s’avenimentu isportivu prus importante de su mundu diat pòdere èssere cantzelladu a s’ùrtimu minutu.

Is faeddos de Toshiro Mutu, a pagos dies dae su cumentzu de is giogos a chimbe tzìrculos – su 23 de argiolas, ant fatu su giru de su Mundu e donant pensamentu. Difatis finas a pagu tempus a oe, mancari in Giapone fiant torrende a aumentare is cundiduras, is rapresentantes de su sótziu organizadore aiant garantidu chi non diant a èssere fatos àteros rinvios.

Immoe nch’est istadu custu càmbiu de positzione, chi est fàghendu cumprèndere chi in su Paisu asiàticu is cosas sunt andende male ca peus. In prus de s’àteru, agiumai totus is tzitadinos giaponesos – s’80% de sa populatzione – sunt contràrios a is Olimpìades.

Però, at a èssere difìtzile a beru chi ddoe siant àteros rinvios, pro duos motivos: pro ite is delegatziones de is 200 Paisos sunt giai lòmpidas e in prus sunt andende a in antis is cómpudos pro is atleta de 33 isport pro 50 disciplinas chi ant a partetzipare a is giogos finas a su 8 de austu.

Tzertu, chie at a èssere agatadu positivu a su Covid-19 nche at a pèrdere 4 annos de allenamentos e de sacrifìtzios.

Giai in custas dies calicunu atleta est resurtadu positivu e at a pòdere bìdere is garas in televisione ebbia, pròpiu comente ant a fàghere is amantiosos de is isport olìmpicos, sende chi no est permìtida s’intrada de su pùbblicu in is istàdios.

Sa rapresentativa de s’Itàlia at a proare a conchistare a su mancu 28 medàllias – comente cussas bìnchidas a Rio de Janeiro 2016 – ma no at a èssere aici fàtzile.

Duncas, chènabura amus a bìdere si is Olimpìades s’ant a fàghere e si is atletas, comente narat su ditzu nou de is giogos ant a tènnere sa possibilidade de mustrare a su mundu de andare “Prus a lestru, prus in artu, prus forte, in paris”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”