Sa Natzionale italiana de fùbalu at bìnchidu contra s’Isvìtzera puru, cun su resurtadu de 3 a 0 in s’Istàdiu Olìmpicu de Roma.

Gràtzias a custos tres puntos s’Itàlia est istada sa primu iscuadra chi s’est cualificada pro is otavos de finale de s’Europeu. Immoe in sa partida benente contra su Galles, s’at a giogare sa possibilidade de lòmpere a su primu postu de su Girone A.

Sa gara contra is isvìtzeros at amostadu torra su giogu bonu de is òmines de Mancini, capatzos de cumandare in totu is noranta minutos e de apricare ogni botza.

Bastat a pensare chi is Asulos a pagu tempus dae su cumintzu de sa gara ant realitzadu sa rete de su vantàgiu cun su capitanu Chiellini, ma est istada annuddada pro ite at tocadu sa botza cun su bratzu.

Pròpiu su giogadore de sa Juventus in s’atzione sighente est dépidu essire a foras pro more de unu dolu a sa camba e est intradu in campu su latziale Acerbi.

Pagos minutos a pustis Berardi at pigadu botza in su tzentrucampu e s’est fuidu in sa fàscia de s’atacu binchende in velotzidade su tertzinu elvèticu Rodriguez, posca at serbidu in mesu pro Locatelli – cumpàngiu de iscuadra in su Sassuolo – e at marcadu s’unu a zeru.

S’Itàlia at àpidu s’ocasione de marcare àteros duos gol in su primu tempus, cun Immobile e Spinazzola, ma is duos asulos ant pecadu in sa mira.

In su segundu tempus est torra Locatelli a agatare sa segunda rete gràtzias a una punta de pee dae foras de s’àrea de rigore aversària. Mancari su resurtadu bonu, is òmines de Mancini ant sighidu a giogare pro fàghere àteros gol, e solu una bia ant arriscadu su contratacu de is elvèticos, ma su portieri Donnarumma s’est fatu agatare prontu.

Immobile puru at tentu su momentu suo de glòria, marchende su tres a zeru in sa parte finale de sa partida.

Sa partida sighente at a èssere contra su Galles de su capitanu Bale. Custa at a serbire a Mancini pro proare calicun’àteru giogadore chi no at galu giogadu, mancari sa gara at a èssere importante pro lòmpere primos in su girone.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Un’àteru feminitzìdiu at insambentadu s’Itàlia.

Unu male chi oramai interessat su Nord e Sud su Paisu nostru, e chi oramai càpitat prus a fitianu.

Tragèdias chi faghent pensare a comente si diant pòdere firmare custas violèntzias subra is fèminas, cummìtidas dae òmines italianos e istràngios.

De seguru b’at unu problema culturale, subra de su cale bisòngiat traballare, e un’ordinamentu normativu, ancora tropu lentu pro pòdere prevènnere custu tipu de reatos.

Cando essit una noa de una violèntzia o de una morte de una fèmina, est comente unu pùngiu a s’istògomo, ma in su matessi tempus si tenet unu sentidu de impotèntzia unidu a unu sentimentu de responsabilidade. Duncas custu nos depet ispronare a chircare de trasmìtere a is generatziones noas s’idea de bìnchere custu male chi corpit sa sotziedade nostra.

A dolu mannu est de custas dies sa noa de una giòvana de Maracalagonis chi est istada assassinada a Castelnuovo Magra, in provìntzia de La Spezia.

Sa pitzoca si mutiat Alessandra Piga e teniat bintighimbe annos, e diat èssere istada ochida dae s’ex cunvivente suo, unu marochinu de trint’annos.

Sa vìtima at pèrdidu sa vida pro more de unas canta gorteddas a is gangas a pustis de una briga. In s’apartamentu acanta est acontèssidu su delitu ddoe diat èssere istadu fintzas su fìgiu de un’annu e mesu de sa còpia. S’assassinu, arrestadu dae is carabineris a pustis de su delitu, est piantonadu in ispidale e is militares de Sarzana ant aviadu indàgines pro cumprèndere bene ite est capitadu.

In su mentres sa sìndiga de su comunu sardu, Francesca Fadda, at bòlidu regordare sa vìtima cun unu messàgiu in is retes sotziales, sutaliniende su dolore e s’arrenegu de Maracalagonis pro su chi est acontèssidu.

Faeddos fortes cussos de sa prima tzitadina chi at faeddadu de una morte acontèssida dae in antis su fìgiu de sa vìtima. In prus de totu s’arrenegu de sa tzitadinàntzia dipendet dae su fatu chi su mortore siat s’ex cumpàngiu, e chi si tratat de unu dolore chi però non devet fàghere abarrare in su mudìmene. Una tragèdia chi non si podet bagiulare, cun sa sìndiga chi at donadu is passièntzias a is familiares de sa giòvana, annuntziende su lutu tzitadinu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”