Su dóighi de làmpadas in is ùrtimos minutos de sa partida de s’Europeu tra Danimarca e Finlàndia, su giogadore Christian Eriksen at àpidu unu mancamentu chi at fatu a tìmere is cumpàngios e totus cussos chi fiant sighende sa partida in s’istàdiu e in televisione.

Su tzentrucampista de s’Inter, mentres chi fiat caminende in su campu de giogu, de suncuna est rutu a terra.

In deretura is cumpàngios ant cumpresu chi sa situatzione fiat sèria e su capitanu de sa Danimarca, Simon Kjaer, at pratigadu una manovra de primu sucursu e sarbende sa vida a Eriksen. Difatis, a càusa de un’infartu Eriksen nche at ingùrtidu sa limba e issu at tentu su prontu de dd’abèrrere sa buca e de nche dda torrare a su postu suo pro liberare su gùturu pro pòdere respirare e no allupare. A pustis sunt arribbados is méigos de s’istàdiu chi ant praticadu primu s’apàlpidu a su coro e posca ant impreadu su defibrilladore.

In prus de custu, Kjaer at fatu pònnere is giogadores de s’iscuadra sua totu a inghìriu de cumpàngiu chi fiat a terra pro ddu protègere dae is ogros de is telecàmeras in cussu momentu drammàticu. Posca, cando sa pobidda de Eriksen est intrada in campu pro ischire comente istaiat su maridu, su capitanu de sa Danimarca est andadu a dda indanimare paris cun su portieri Schmeichel.

Duncas su difensore tzentrale danesu at fatu bìere de èssere prus de unu capitanu, ma un’òmine balente, pro ite no est fàtzile in ocasiones comente cussa a fàghere su chi at fatu issu, peri ca is duos giogadores de sa Danimarca sunt amigos meda, e duncas s’emotzione fiat galu prus manna.

Una bia istabilizadu, Eriksen est istadu leadu a s’ispidale e solu cando is cunditziones suas sunt megioradas is duas iscuadras sunt torradas in campu pro acabbare sa partida.

Pro Kjaer però, a pustis de cussos momentos de tensione, fiat tropu istragosu a abarrare in campu in cun s’idea de s’amigu ricoveradu. S’allenadore at cumpresu in deretura e at l’at fatu essire a pustis de una pariga de minutos dae su cumentzu de su segundu tempus.

De su resurtadu de sa partida, bìnchida unu a zeru dae sa Finlàndia, no est importadu nudda a nemos, pro ite sa vitòria prus manna est istada cussa de àere sarbadu da vida de Eriksen: custu balet prus de totu s’Europeu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Natzionale italiana at cumintzadu cun su pee giustu s’abertura in sa manifestatzione de fùbalu Europeu.

In s’Istadiu Olìmpicu de Roma, is òmines de Roberto Mancini ant bìnchidu tres a zeru contra sa Turchia, gràtzias a una partida bella a beru.

S’iscuadra est calada in campu unida e at gherradu in ogni corratzu de su retàngulu birde, cumandadu su giogu pro totus in noranta minutos. Bene meda, in tzentrucampu, su sardu Nicolò Barella.

A pustis su primu tempus, chi est acabadu zeru a zeru, mancari medas ocasiones de gol, sa Natzionale at agatadu sa rete de su vàntagiu a su cumintzu de su segundu tempus gràtzias a un’autogol de su difensore turcu Merih Demiral. In s’atzione de s’unu a zeru est istadu bravu meda Domenico Berardi chi at iscutu sa botza a tzentru àrea e su giogadore de sa Juventus cun is petorras a malasciagura nche dd’at iscuta a palas de su portieri suo etotu.

Sa segunda rete est istada marcada dae Ciro Immobile, lestu a torrare a fàghere gol a pustis de sa respinta de s’ùrtimu defensore turcu chi at istesiadu dae sa porta unu tiru de Leonardo Spinazzola.

S’ùrtimu gol de sa partida est istadu mèritu de Lorenzo Insigne, chi at iscutu sa botza in s’àngulu de sa porta aversària, cun unu tiru pretzisu comente unu tiru de billiardu.

Mèritu mannu de custu resurtadu e pro sa bella figura de s’iscuadra ddu tenet s’allenadore Mancini chi est resèssidu a costrùere unu grupu de giogadores bellu a beru, chi solu solu duos annos a oe pariat impossìbile chi poderet otènnere custu giogu e tènnere s’ambitzione de fàghere un’Europeu bonu.

Sa gara imbeniente at a èssere contra sa Svitzera su séighi de làmpadas, seguru una gara prus istragosa de cussa contra sa Turchia. Prima de totu pro ite is elvèticos, a pustis de su parègiu contra su Galles, ant a chircare dae fàghere is tres puntos, e in prus pro ite sunt un’iscuadra prus forte.

In sa natzionale italiana at a mancare su tertzinu Alessandro Florenzi, chi s’est ingortu in s’ùrtima partida, e at a giogare Giovanni Di Lorenzo. Sa pròpiu cosa pro su regista Marco Verratti galu a riposu pro more de s’infortùniu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”