Sa Natzionale italiana at cumintzadu cun su pee giustu s’abertura in sa manifestatzione de fùbalu Europeu.

In s’Istadiu Olìmpicu de Roma, is òmines de Roberto Mancini ant bìnchidu tres a zeru contra sa Turchia, gràtzias a una partida bella a beru.

S’iscuadra est calada in campu unida e at gherradu in ogni corratzu de su retàngulu birde, cumandadu su giogu pro totus in noranta minutos. Bene meda, in tzentrucampu, su sardu Nicolò Barella.

A pustis su primu tempus, chi est acabadu zeru a zeru, mancari medas ocasiones de gol, sa Natzionale at agatadu sa rete de su vàntagiu a su cumintzu de su segundu tempus gràtzias a un’autogol de su difensore turcu Merih Demiral. In s’atzione de s’unu a zeru est istadu bravu meda Domenico Berardi chi at iscutu sa botza a tzentru àrea e su giogadore de sa Juventus cun is petorras a malasciagura nche dd’at iscuta a palas de su portieri suo etotu.

Sa segunda rete est istada marcada dae Ciro Immobile, lestu a torrare a fàghere gol a pustis de sa respinta de s’ùrtimu defensore turcu chi at istesiadu dae sa porta unu tiru de Leonardo Spinazzola.

S’ùrtimu gol de sa partida est istadu mèritu de Lorenzo Insigne, chi at iscutu sa botza in s’àngulu de sa porta aversària, cun unu tiru pretzisu comente unu tiru de billiardu.

Mèritu mannu de custu resurtadu e pro sa bella figura de s’iscuadra ddu tenet s’allenadore Mancini chi est resèssidu a costrùere unu grupu de giogadores bellu a beru, chi solu solu duos annos a oe pariat impossìbile chi poderet otènnere custu giogu e tènnere s’ambitzione de fàghere un’Europeu bonu.

Sa gara imbeniente at a èssere contra sa Svitzera su séighi de làmpadas, seguru una gara prus istragosa de cussa contra sa Turchia. Prima de totu pro ite is elvèticos, a pustis de su parègiu contra su Galles, ant a chircare dae fàghere is tres puntos, e in prus pro ite sunt un’iscuadra prus forte.

In sa natzionale italiana at a mancare su tertzinu Alessandro Florenzi, chi s’est ingortu in s’ùrtima partida, e at a giogare Giovanni Di Lorenzo. Sa pròpiu cosa pro su regista Marco Verratti galu a riposu pro more de s’infortùniu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Semper de prus sa tecnologia est intrende in is vidas nostras.

Comente totu is cosas, si benint impreadas in su modu giustu e professionale, podet cunsentire unu megioramentu de s’istile de vida de ogni tzitadinu.

A custu propòsitu podet èssere pigada comente esèmpiu custa aplicatzione, chi podet intervènnere a illebiare o reconnòschere unu male malu comente est sa depressione.

Una problemàtica chi corpit semper prus persones, giòvanas e prus pagu giòvanas, in custa sotziedade chi curret semper prus a sa lestra e est semper prus pagu a mesura de òmine.

Unu programma basadu subra s’intelligèntzia artifitziale ”intendet” sa depressione dae sa boghe de is persones cunsentende de fàghere diàgnosi e avèrtere in tempus cando is istorbos depressivos sunt lòmpidos a livellos perigulosos.

Est s’innovatzione presentada a s’editzione nùmeru 180 de su Meeting of the Acoustical Society of Amèrica, de Carol Espy-Wilson, de s’University of Maryland.

S’algoritmu intendet sa depressione in sa boghe lenta de s’indivìduu: is istorbos depressivos s’assòtziant difatis a un’abrandamentu psicomotòriu de sa persone chi s’iscòviat peri dae sa boghe, cun faeddos pronuntziadas prus a bellu e cun prus pàusas.

Su programma diat pòdere devènnere un’aplicativu de iscarrigare in su telefoneddu pròpiu pro compidare s’umore de sa gente. In manera ideale, ispiegat Espy-Wilson, sos terapistas ant a dare s’aplicatzione a is malàidos prus depressos in is perìodos chi is sìntomos sunt prus reduidos, pro tratzare s’istadu issoro de salude mentale e is persones apropriadas podent èssere avisadas si esseret a marcare ingraviamentu de sa depressione”. “Aici — sighit Espy Wilson – si diat pòdere intervènnere in tempus cando sa depressione creschet a livellos perigulosos”.

Est craru chi pro reconnòschere custu problema sighit a èssere importante sa sensibilidade de is chi bivent a costadu de is persones chi sufrint de custa patologia. Un’aina chi si at a èssere posta a disponimentu de is malàidos, diat pòdere èssere unu trastu de non sutavalutare pro unu incras.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”