Roma s’aprontat a su grandu eventu e giai s’isetat su bolu de is Fritzas Tricolore chi, in antis de su cumentzu de sa partida, ant a surcare su chelu romanu cun is colores de sa bandera italiana.

S’Istàdiu Olìmpicu, allichididu a festa, at a èssere teatru de sa tzerimònia de abertura de sa manifestatzione Uefa chi, a càusa de sa pandemia de Covid-19, est brincadu a ocannu.

Sa tzerimònia at a comintzare cun unu vìdeu cun unu contu a s’imbesse chi ammustrat is ùrtimos 60 annos de su campionadu de fùbbalu continentale. Dae s’ischermo s’at a colare a sa su campu, acanta duos ex campiones de su Mundu italianos sìmbulos de su fùbbalu de sa capitale, Alessandro Nesta e Francesco Totti, ant a retzire is tifosos de Euro 2020.

A pustis su pùblicu at a pòdere ammirare su bolu de is Fritzas Tricolores, s’iscuadra acrobatica italiana famada in totu su mundu. Posca sa banda musicale de sa Politzia de Istadu italiana at a sonare unu petzu de unu composidore italianu famadu, e in s’ora is 24 atletas ant a imbucare in campu cadaunu cun 1 botza, manna cun is sìmbulos de is paisos partetzipantes, isfilende acanta a sa guàrdia de onore de sa Politzia italiana a caddu.

Posca, ballerinos e giòvanos atletas de su grupu isportivu Fiamme Oro, ant a creare una coreografia verticale lughente cun botzas de èliu, istabilende unu diàlogu visivu cun 12 percussionistas aèreos postos a inghìriu a su cobertura de s’istàdiu: sa 24 Teams Celebration, unu tributu dinàmicu e gioiosu a s’ispìritu de sa cumpetitzione paghiosa e a sa bellesa de s’isport.

Pro su finale, a s’Olìmpicu ddoe at a èssere su Maistru Andrea Bocelli chi at a esecutare s’àera “Nessun Dormat”, in s’ora chi 24 palloneddot ant a formare un’ùnicu budrone, chi in manera simbòlica ant a artziare a chelu s’ispìritu de Europeu, inghiriadu dae un’esplosione de efetos pirotècnicos colorados chi ant a ocupare totu sa cobertura de s’istàdiu.

In fines at a calare in campu sa Natzionale chi contra sa Turchia at a chircare de comintzare in su mègius modu possìbile s’aventura a Euro 2020, chirchende de dare satisfatzione a is tifosos issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Natzionale Italiana de fùbalu at bìnchidu s’ùrtima partida amistosa contra sa Repùblica Tzeca, prima de su comintzu de sa manifestatzione de s’Europeu, chi s’at a abèrrere in is dies imbenientes.

Sa gara giogada a Bologna est acabbada bator a zeru pro is asulos, gràtzias a is gol de Immobile e Barella a su primu tempus, e is àteras retes marcadas dae Insigne e Berardi in su segundu tempus.

Is òmines de Mancini cun custu resurtadu e una partida giogada bene meda, ant dimostradu de tènnere gana e chi sunt prontos a fàghere una cumpetitzione bona aberu.

S’iscuadra at fatu bìdere bonas cosas in atacu, e at ispassiadu is tifosos cun bellas atziones de giogu. Sa difesa puru est dae partidas meda chi no est pighende prus gol.

Mèritu mannu est de s’allenadore marchigianu e ex giogadore famadu de sa Sampdoria, chi est resèssidu a costrùere una Natzionale chi solu solu duos annos a oe pariat impossìbile chi poderet otènnere custos resurtados e tènnere s’ambitzione de fàghere un’Europeu dae protagonista.

Tzertu sa gara de incomintzu de s’Europeu contra sa Turchia, chi s’at a giogare s’ùndighi de làmpadas, at a èssere un’àtera chistione. Prima de totu pro s’emotzione de s’eventu chi s’annu coladu est brincadu pro more de sa pesta de su Covid-19 e in prus contra is turcos no at a èssere un’isfida amistosa.

Bona sa prima partida in natzionale pro Raspadori: su giogadore de su Sassuolo at fatu bìdere chi est balente a beru e at a podere èssere una carta bona in prus pro Mancini.

Pro custu gióvanu, medas espertos de fùbalu sunt prontos a iscomìtere chi at a pòdere èssere su “Paolo Rossi” de su Mondiale de Ispagna 1982.

Ma mancari Raspadori apat fatu meda bene in custa istajone de Sèrie A, pro s’ora est mègius a non fàghere custos paragones cun sa bonànima de su campione chi est mancadu s’annu coladu. Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”