Un’àteru feminitzìdiu at insambentadu s’Itàlia.

Unu male chi oramai interessat su Nord e Sud su Paisu nostru, e chi oramai càpitat prus a fitianu.

Tragèdias chi faghent pensare a comente si diant pòdere firmare custas violèntzias subra is fèminas, cummìtidas dae òmines italianos e istràngios.

De seguru b’at unu problema culturale, subra de su cale bisòngiat traballare, e un’ordinamentu normativu, ancora tropu lentu pro pòdere prevènnere custu tipu de reatos.

Cando essit una noa de una violèntzia o de una morte de una fèmina, est comente unu pùngiu a s’istògomo, ma in su matessi tempus si tenet unu sentidu de impotèntzia unidu a unu sentimentu de responsabilidade. Duncas custu nos depet ispronare a chircare de trasmìtere a is generatziones noas s’idea de bìnchere custu male chi corpit sa sotziedade nostra.

A dolu mannu est de custas dies sa noa de una giòvana de Maracalagonis chi est istada assassinada a Castelnuovo Magra, in provìntzia de La Spezia.

Sa pitzoca si mutiat Alessandra Piga e teniat bintighimbe annos, e diat èssere istada ochida dae s’ex cunvivente suo, unu marochinu de trint’annos.

Sa vìtima at pèrdidu sa vida pro more de unas canta gorteddas a is gangas a pustis de una briga. In s’apartamentu acanta est acontèssidu su delitu ddoe diat èssere istadu fintzas su fìgiu de un’annu e mesu de sa còpia. S’assassinu, arrestadu dae is carabineris a pustis de su delitu, est piantonadu in ispidale e is militares de Sarzana ant aviadu indàgines pro cumprèndere bene ite est capitadu.

In su mentres sa sìndiga de su comunu sardu, Francesca Fadda, at bòlidu regordare sa vìtima cun unu messàgiu in is retes sotziales, sutaliniende su dolore e s’arrenegu de Maracalagonis pro su chi est acontèssidu.

Faeddos fortes cussos de sa prima tzitadina chi at faeddadu de una morte acontèssida dae in antis su fìgiu de sa vìtima. In prus de totu s’arrenegu de sa tzitadinàntzia dipendet dae su fatu chi su mortore siat s’ex cumpàngiu, e chi si tratat de unu dolore chi però non devet fàghere abarrare in su mudìmene. Una tragèdia chi non si podet bagiulare, cun sa sìndiga chi at donadu is passièntzias a is familiares de sa giòvana, annuntziende su lutu tzitadinu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su dóighi de làmpadas in is ùrtimos minutos de sa partida de s’Europeu tra Danimarca e Finlàndia, su giogadore Christian Eriksen at àpidu unu mancamentu chi at fatu a tìmere is cumpàngios e totus cussos chi fiant sighende sa partida in s’istàdiu e in televisione.

Su tzentrucampista de s’Inter, mentres chi fiat caminende in su campu de giogu, de suncuna est rutu a terra.

In deretura is cumpàngios ant cumpresu chi sa situatzione fiat sèria e su capitanu de sa Danimarca, Simon Kjaer, at pratigadu una manovra de primu sucursu e sarbende sa vida a Eriksen. Difatis, a càusa de un’infartu Eriksen nche at ingùrtidu sa limba e issu at tentu su prontu de dd’abèrrere sa buca e de nche dda torrare a su postu suo pro liberare su gùturu pro pòdere respirare e no allupare. A pustis sunt arribbados is méigos de s’istàdiu chi ant praticadu primu s’apàlpidu a su coro e posca ant impreadu su defibrilladore.

In prus de custu, Kjaer at fatu pònnere is giogadores de s’iscuadra sua totu a inghìriu de cumpàngiu chi fiat a terra pro ddu protègere dae is ogros de is telecàmeras in cussu momentu drammàticu. Posca, cando sa pobidda de Eriksen est intrada in campu pro ischire comente istaiat su maridu, su capitanu de sa Danimarca est andadu a dda indanimare paris cun su portieri Schmeichel.

Duncas su difensore tzentrale danesu at fatu bìere de èssere prus de unu capitanu, ma un’òmine balente, pro ite no est fàtzile in ocasiones comente cussa a fàghere su chi at fatu issu, peri ca is duos giogadores de sa Danimarca sunt amigos meda, e duncas s’emotzione fiat galu prus manna.

Una bia istabilizadu, Eriksen est istadu leadu a s’ispidale e solu cando is cunditziones suas sunt megioradas is duas iscuadras sunt torradas in campu pro acabbare sa partida.

Pro Kjaer però, a pustis de cussos momentos de tensione, fiat tropu istragosu a abarrare in campu in cun s’idea de s’amigu ricoveradu. S’allenadore at cumpresu in deretura e at l’at fatu essire a pustis de una pariga de minutos dae su cumentzu de su segundu tempus.

De su resurtadu de sa partida, bìnchida unu a zeru dae sa Finlàndia, no est importadu nudda a nemos, pro ite sa vitòria prus manna est istada cussa de àere sarbadu da vida de Eriksen: custu balet prus de totu s’Europeu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”