Is paràmetros sunt in lìnia cun custa fàscia.

Sa Sardigna isperat chi cantu prima potza essire dae sa zona arantzu.

S’assessore a sa Sanidade Mario Nieddu pro custu ispinghet pro fàghere intrare s’Ìsula in zona groga, cun prus pagas règulas.

S’esponente de sa Giunta Solinas at naradu: “Amus a pedire cun fortza sa revisione de cussos paràmetros chi nos ant fatu pònnere prima in zona arantzu e a pustis in zona ruja, acanta semus abarrados pro prus tempus de su chi serbiat, cunsideradu chi dae tres chidas is nùmeros nostros sunt de zona groga”.

Su polìticu at a espressare custa rechesta in sa cunferèntzia Istadu-Regiones de custu merie e at a insìstere subra de su fatu chi s’Ìsula bèngiat ammìtida in zona groga dae lunis imbeniente, su 10 de maju, tando una chida prima a su chi est revìdidu in s’ordinàntzia de su ministru de sa Salude Speranza.

S’assessore ischit chi pro su passàgiu antitzipadu in grogu serbit chi mudint is critèrios de definitzione de is colores, difatis pro como is ordinàntzias tenent balidesas de 15 dies.

Ma si andaret a portu su tentativu de s’assessore diat èssere de agiudu mannu pro is atividades econòmicas, massimamente ca est acurtziendesi s’istade.

Difatis unu sistema de classificatzione comente a custu de immoe diat arriscare fàghere pèrdere meda dinare a is impresas sardas in custu perìodu dìligu de s’annu.

Tocat ebbia a isetare e bìere su chi s’at a detzìdere, mancari medas guvernadores diant èssere punnados a sighire sa lìnia chi proponet sa Regione Sardigna.

De seguru in custas chidas, at a èssere a coitare de prus cun is vatzinatziones, chi in s’Ìsula, at tentu un’atzellerada manna.

Tocat a vatzinare prus che totu is categorias fràgiles, ma comente at afirmadu su generale Figliuolo, a pustis de sa populatzione cun prus de 65 at a èssere pretzisu vatzinare totu is àteros, sena castiare annos e data de nàschida.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Festa manna eris pro s’Internazionale chi est rèsessidu a bìnchere s’iscudetu nùmeru deghennoe de s’istòria sua.

Difatis gratziàs a su parègiu pro 1 a 1 tra Sassuolo e Atalanta, is nieddos-asulos sunt istados decrarados Campiones de Itàlia firmende su podèriu de sa Juventus, chi at bìnchidu pro noe annos de sighidu su màssimu campionadu natzionale de fùbalu.

Is òmines de Antonio Conte si sunt dimustrados is prus fortes e continos cun is resurtados prus de totus is àteros: in su girone de torrada ant superadu is “fradiles” de su Milan e a pustis ddos ant istrombulados pro 3 a 0.

Cuntentu meda pro sa vitòria de su tìtulu italianu su mere de s’iscuadra milanesa, su tzinesu Steven Zhang – primu presidente istràngiu a bìnchere in Sèrie A – chi pro s’ocurrèntzia est torradu in tzitade pro festare paris cun is giogadores e tifosos.

Tzertu, no est istada una cosa bella meda cussa chi est capitada in Pratza de su Duomo, in ue prus de trinta mìgias persones si sunt atopadas pro festare sa vitòria de s’iscudetu de is nieddos-asulos. Su Covid-19 non càstiat in cara a nemos e cun custu cumportamentu immoe s’at arriscare àteras cundiduras de custa pesta malaita. Nos preguntamus: fiat pretzisu a festare gosi? Creimus chi sa vida e sa salude de totus balet meda de prus de unu campionadu de fùbalu e tocat a rispetare is régulas gosi comente dd’ant fatu is butegheris chi sunt cungiados e sena traballare.

Su Casteddu imbetzes est rèsessidu a leare unu puntu contra su Napoli in s’istàdiu Diego Armando Maradona. A pustis de una partida istragosa meda pro is ruju-blu,su resurtadu est istadu de 1-1, cun is partenopeos chi ant fatu su primu gol gratziàs a Osimhen, e is casteddajos ant paregiadu a coa de sa partida – 94′ minutu – cun s’argentinu Nandez.

Immoe pro is sardos at a èssere importante meda, a bìnchere a ogna còstitu sa gara de sa giorronada benente contra su Benevento. In s’istàdiu Vigorito at a èssere unu beru isparégiu pro si sarbare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”