Su mundu est cambiende semper prus a sa lestra.

Como gràtzias a su Nft, su Non Fungible Token, unu tzertificadu digitale chi impreat su sistema de sa blockchain (cadena de blocos) si podet bèndere belle totu: comente unu cuadru fatu dae s’intelligèntzia artifitziale o animales virtuales.

Una frontera noa de s’autenticatzione chi diat pòdere agiuare s’economia de medas setores, comente s’arte, ma non cussa ebbia.

Una tecnologia de su 2017, chi dae pagu at tentu popularidade meda gràtzias a pessonàgios famados in su mundu de s’arta tecnologia, comente su mere de Tesla Elon Musk e s’amministradore delegadu de Twitter Jack Dorsey.

Musk at publicadu unu tweet cun unu canteddu de mùsica techno ispirada a su Nft. Dorsey, imbetzes, at postu a s’asta su primu tweet suo, una raridade tecnològica chi torrat de su 21 de martzu 2006 cun su cale aiat fatu comintzare s’aventura Twitter. Dd’at bèndidu in forma de Non Fungible Token in modu de ddu tzertificare comente ogetu de colletzione chi non podet èssere duplicadu. Su prètziu? No est pro totus, su balore difatis est de 2,5 milliones de dòllaros.

Pro cumprèndere sa mania de custos tzertificados digitales bastas pensare a su giogu ‘CryptoKitties’ chi permitiat de comporare mussitos virtuales cun unu cuntratu registradu in sa blockchain. Difatis una pariga de dies a oe sa domo de astas Christie’s at bèndidu un’òpera totu digitale de s’artista Beeple pro 69 milliones de dòllaros, fintzas custa registrada cun unu Nft, aberende su caminu in modu definitivu a custu sistema.

Tocat a nàrrere chi cun su Nft no est s’òpera in sese chi s’acuistat, ma unu tzertificadu: unu token, chi cunsentit de afirmare is deretos de s’òpera.

Su Nfl est un’evolutzione de sa blockchain – pensada pro cunsentire e tratzare is mudamentos munetàrios, una genia de libru mastru – cun modellos creados ad hoc in su 2017. Logu printzipale pro sa creatzione de custos Nft est Ethereum, una criptovaluta nàschida semper pro gestire ‘smart contract’ chi rapresentant unu bene ùnicu.

Su sistema est isvilupende∙si a sa lestra, bastat a pensare chi in Itàlia sa banda musicale Belladonna cun su sìngulu New Benidoras Travelogue sunt is primos artistas natzionales a bèndere unu petzu musicale comente Nft in còpia ùnica. Su mercadu est semper prus achistende balore.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Sardigna est colada totu paris dae biancu a s’aràngiu.

Unu corpu lègiu pro s’economia isulana pro ite is limitatziones noas chi sunt intradas in vigore dae oe ant a èssere severas a beru.

Bos ammentamus is printzipales:

Is iscostiamentos: in sa zona colore de aràngiu non si podet essire dae su Comunu de residèntzia o de su domitzìliu si non pro motivos chi depent èssere indicadas in s’autotzertificatzione de presentare in casu de controllu: salude, traballu o àteros apretos.

S’òbligu de retiru: dae is 22 a is 5 de su mangianu sighente at a èssere proibidu essire, pena sa santzione amministrativa finas a 1.000 èuros pro is chi non rispetant is inditos. Ùnicas etzetziones: motivos de salude, traballu e netzessidade. Sunt cunsentidas is bìsitas a domo de amigos e parentes non cunviventes cun calicunu lìmite: màssimu duas persones a sa die in intro de is làcanas de su comunu ebbia.

Normas pro is locales pùblicos: is tzilleris e is ristorantes depent abarrare cungiados a su pùblicu ogna die e a ogni ora, at a èssere cunsentidu s’asportu e s’intregu de sa cosa de papare e de bufare a domitzìliu. Est proibidu papare e bufare sa cosa foras dae is locales. Is àteras butegas imbetzes sighint a abarrare a abertas, fintzas cussa “no essentziales” ma rispetende is règulas ordinàrias de preventzione. Is tzentros cummertziales depent serrare su coa de chida, francu is supermercados e is potecarias a internu issoro. Abarrant abertos pelucheris, barbieri se tzentros estèticos.

S’Iscola: is iscolas de s’infàntzia, is elementares e is mèdias abarrant abertas in modu regulare cun mascaredda obligatòria pro is pipios dae is ses annos in susu. Imbetzes is istudiantes de is istitutos superiores ant a frecuentare pro metade in presèntzia e pro metade in Dad.

S’isport: sunt ammìtidos is isport a s’abertu comente cursa e tziclismu, chie ddos pràticat podet essire dae is làcanas comunales. Abarrant parcos e giardinos pùblicos – francu ordinàntzias prus limitativas de is sìndigos – mentras abarrant cungiadu palatzos de s’isport e palestras.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”