Crisi de guvernu, Conte oe a sa proa de su votu in Senadu

Su guvernu Conte a sa chirca – difìtzile chirca ma no impossìbile – de sa majoria a Palatzu Madama

A pustis de àere otentu sa majoria assoluta a sa Càmera cun 321 votos – su plenum de s’assemblea est de 630 – su primu ministru Giuseppe Conte at a dèpere superare sa proa de su Senadu, acanta is nùmeros a favore de su guvernu sunt contados.

Su partidu “Itàlia viva”, a pustis de àere lassadu su guvernu, at annuntziadu chi s’at a astènnere in su votu finale e custu at a permìtere a s’esecutivu de otènnere sa fidùtzia cun una majoria relativa.

Difatis non serbit unu quorum mìnimu e at a bastare a superare s’opositzione fintzas cun unu votu ebbia.

Medas però sutalìniant chi si Conte non superaret sa cuota de 161 a Palatzu Madama — est a nàrrere sa majoria assoluta, su plenum est de 315 prus 6 senadores a vida – diant dèpere presentare is dimissiones.

Totu custu dae unu puntu de bista mescamente polìticu, ma no est obligatòriu. Difatis diat bastare a torrare in segus in s’istòria republicana pro bìere chi sunt istados dòighi is guvernos de minoria, in una o in totu e is duas is Càmeras, tra custos fintzas su primu guvernu De Gasperi e in is annos prus reghentes su primu Berlusconi.

Is prepostos a is traballos narant chi a favore de su guvernu atuale ddoe diat tènnere unu nùmeru de senatore( tra 152 e 159) prontos a donare sa fidùtzia. A is votos de is esponentes de M5S, Pd e Leu si diant pòdere agiùnghere tra 12 e 15 votos de su grupu Mistu o de is foressidos de àteros grupos, e àteros 7 de su grupu de is Autonomias.

Ma si tratat petzi de previsiones. Custu mangianu si sunt abertos is traballos in Senadu. Su guvernu at retzidu s’apògiu de is Senadores Monti, De Falco e Casini, cun custu ùrtimu chi at sotadu a Conte de torrare a dialogare cun Renzi remonende peri a Aldo Moro: “Mègius faddire paris chi tènnere resone a solos”.

In su mentres in custas oras is Senadores sunt istados partzidos in tres categorias: is responsàbiles – meda apensamentados pro is efetos de una crisi de guvernu, is traitores – chi sunt isetende postos ebbia, e is isfinges – is chi finas a s’ùrtimu non si esponent. Sunt pròpiu custos chi ant a poderare is italianos in riolu, e non pro sa subravivèntzia de su Conte-bis ebbia.

S’apuntamentu est pro custu sero, cando a pustis de su votu s’at a cumprèndere cale at a èssere su guvernu chi — francu imprevistos improvisos – in is meses sighentes s’at a dèpere fàghere càrrigu de gestire s’apretu sanitàriu e econòmicu de s’Itàlia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Is dimissiones de is ministras Teresa Bellanova e Elena Bonetti e de su sutasegretàriu Ivan Scalfarotto, detzìdidas paris cun su capu de su partidu issoro Matteo Renzi, ant abertu sa crisi de guvernu.

Immoe Giuseppe Conte diat pòdere andare in Parlamentu pro bìdere si su guvernu tenet is nùmeros pro guvernare sena Itàlia Viva, semper chi calicunu non sigat s’esèmpiu de s’ex segretàriu de su PD.

Sa punna printzipale de Renzi est sa de donare vida a unu guvernu istitutzionale chi potzat arribbare finas a s’agabbu de sa legisladura sena Conte comente primu ministru.

Tra is papàbile ddoe est Luciana Lamorgese, atuale ministra de s’Internu. In s’ora su presidente de sa Repùblica Sergio Mattarella at pedidu una risolutzione lestra de sa crisi.

Fintzas pro ite cun su momentu istòricu chi semus bivende e cun totus is detzisiones importantes chi tocat a pigare, serbit unu guvernu unidu e chi funtzionet.

In su mentres, in custas oras, est essida a campu fintzas sa possibilidade de andare a su votu in mese de làmpadas, fintzas si pro is espertos custa est un’ipòtesi chi tocat a iscartare.

Ma s’opositzione est prus de acòrdiu pròpiu cun cust’ùrtima solutzione, màssimu Giorgia Meloni de Fratelli d’Italia, chi a bisu suo is eletziones giai si podent fàghere.

Ma in Forza Italia ddoe tenet chie allegat de unu possìbile guvernu istitutzionale, fintzas si in custu momentu est matanosu cumprèndere cale lìnia ufitziale at a pigare su partidu.

Is capos de su PD e de su M5S sunt galu disorientados dae su traimentu de Renzi e oe- a pustis chi finas a eris ant chircadu in ogni manera de evitare sa crisi de guvernu — ant fatu decraratziones graes a beru contra s’ex alleadu de guvernu.

Su capu de sa Lega, Matteo Salvini, intervenende in sa trasmissione L’Aria che tira de La7, at allegadu de su chi diat pòdere fàghere Conte: “O pigat atu de sa mancàntzia de sa majoria e andat a Quirinale giai dae custu merie, opuru si presentat a is Càmeras e referit a pitzu de sa situatzione in Parlamentu”. Ma Salvini no iscartat mancu un’àtera ipòtesi: “Conte o agatat un’àtera majoria cun s’agiudu de Mastella, opuru sa detzisione dda depent pigare is italianos in is urnas. Totu est in is manos de su presidente Mattarella, isperemus chi nos agiudet a nche cumprèndere calicuna cosa”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”