At bìnchidu su Benevento. Su Casteddu no est renèssidu a riscatare sa partida pèrdida in malu modu contra su Nàpoli.

In sa Sardinia Arena est acabbada 1-2 pro is campanos cun is goal realizados dae su tonaresu Marco Sau e Alessandro Tuia. Pro is casteddajos goal de Joao Pedro.

Eusebio Di Francesco a pustis de sa partida at naradu ca is giogadores ruju-blu sunt un’iscuadra ispaurida e est abarradu delusu meda pro su resurtadu.

A su Benevento ddis serbiant puntos pro s’istesiare galu de prus dae sa zona retrotzessione e at merèssidu de bìnchere pro sa gana dimustrada.

Su primu goal de sa partida est istadu marcadu dae su Casteddu cun Joao Pedro, cun unu tiru lestru a su 20′ minutu de su primu tempus.

S’iscuadra campana est renèssida a adderetare su resurtadu cun Marco Sau – ex giogadore casteddaju – a su 41′ minutu.

Pròpiu su tonaresu est istadu su protagonista de sa vitòria de su Benevento, mustrende totu cussu valore chi dd’at permìtidu de giogare in s’iscuadra sarda dae s’istajone 2012/2013 a su mese de ghennàrgiu 2019.

Pustis pagu tempus, a coa de su primu tempus, Tuia at marcadu sa rete de sa vitòria de is istràngios cun cuntentesa manna de is giogadores allenados dae Pippo Inzaghi.

Cun custas ùrtimas partidas pèrdidas su Casteddu at cungiadu male su 2020 e at cumentzadu male s’annu nou, mancari cun calicuna bona proa, donende pensamentos meda is tifosos isulanos.

Sa giorronada chi benit su Casteddu at a giogare contra sa Fiorentina. Una partida difitzile meda cussa in s’Istàdiu Franchi cun is toscanos, chi sunt chirchende puntos pro artziare in sa classìfica comente a is sardos etotu.

Is ruju-blu tenent sa possibilidade de mustrare su valore issoro e de torrare a fàghere a sonniare is tifosos issoro.

At a mancare su tzentrucampista Nandez chi in sa Sardinia Arena est istadu bogadu a foras dae s’àrbitru, cun su cartellinu ruju. Ant a torrare is giogadore ausentes pro more dae su Covid e s’isperat finas calicunu de is infortunados. Immoe est importante meda a torrare a fàghere puntos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In fines est arribbadu s’annu nou, unu 2021 càrrigu de isperu e de disafios mannos chi nos abetant. Nos lassamus a palas unu 2020 chi rapresentat unu “trèmene” de s’istòria moderna.

S’annu “betzu” chi at ammustradu totu sa fragilidade umana, in ue is Guvernos si sunt agatados a parare fronte a su Covid-19: unu nemigu piticu piticu e invisìbile.

De repente sa tziviltade “Nostra” s’est abigiada de no èssere a tretu de afrontare ogni eventu cun lestresa e in manera eficatze. A s’imbesse: si sunt commitidos errores graves chi ant ammustradu is difetos de una seguridade aparente de s’òmine modernu.

Si su 2020 s’aberiat cun s’allarme de sa Tzina s’ùrtima die de su 2019 pro su su Covid-19, cando oramai su virus tzirculaiat giai dae tempus in  su mundu, ocannu s’aberit cun s’ isperu mannu de su vatzinu.

At a chessire sa sièntzia a nos nce tirare a foras dae custu “limbu” in ue semus intrados? Pròpiu in is dies coladas, in totu Europa, est incumentzada sa somministratzione de is primas doses de vatzinu a su cale s’est sutapostu su personale sanitàriu. Unu passu importante chi at a batire a sa vatzinatzione – voluntària – de totu sa populatzione.

Emmo, pro ite depimus chircare de nde essire cantu prima dae custa pandemia, pro ite posca at a bisongiare afrontare sa ricostrutzione econòmica, mescamente de s’Itàlia. Pensare a una “natzione noa”.

Su paisu Nostru, impinnadu cun su Recovery Fund – “unu fundu pro sa ripresa cun tìtulos europeos comunos pro finantziare sa ripresa de totus is Paisos prus corfidos” — depet donares rispostas subra disafios mannos pro lantzare torra  s’economia. Sunt medas is setores in ghenugru a càusa de sa pandemia, e in medas ant pèrdidu su traballu, cun famìlias a arriscu poberesa.

Ddu mèritant totus cussos chi ant fatu sacrifìtzios durante is meses de acorru e e de medidas restritivas. Ma mescamente tocat afrontare  is disafios de su benidore pro cussos chi ant pagadu cun sa vida s’arribu de custa epidèmia, e pro is levas prus piticas, is pitzocheddos, chi non ant pòdidu prus andare a iscola.

Amus a èssere capasso, torra, de dimustrare is capatzidades infinitas nostras in is momentos de dificultades? S’isperu est chi su coràgiu siat ghiadu dae sa sabiore de  is guvernantes, pro s’àteru preparemus•nos comente sardos a afrontare ogni dificultade, comente nos at imparadu s’istòria millenària nostra.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”