Sunt prus de 20 milliones is produtos bèndidos bia Amazon dae is impresas minores e mèdias italianas in is festas de Nadale.

Bonas noas, bidu chi, pro promòvere custas realidades econòmicas, in su 2020 sunt istados investidos a livellu globale 16 milliardos de èuros.

A ddu fàghere ischire in una nota ufitziale, est istadu su colossu de su cummèrtziu eletrònicu etotu, chi at fatu su puntu a pitzu de is atividades  de ocannu.

In pagos faeddos su comunicadu narat: “Custu Nadale est istadu su mègius in assolutu pro is impresas indipendentes chi bendent in Amazon, belle totus is impresas minores e mèdias cun unu faturadu mundiale in crèschida de su 59% subra base annuale in cunfrontu a su pròpiu perìodu in su 2019”.

In prus, agiunghet su colossu mundiale de Jeff Bezos: “Is cuntratos de traballu firmados, tra tempus prenu e a tempus partziale, sunt istados in totu 400 mìgia. Sunt de 10 milliardos is investimentos pro sa seguresa in su traballu e est de 2,5 milliardos s’ispesa pro bonus e premialidades pro is dipendentes”.

Resurtados bonos pro is impresas italianas piticas e mèdias, gràtzias a su programma “Accelera con Amazon” chi permitit sa crèschida e sa digitalizatzione de is aziendas.

Custu istrumentu est istadu cuncordadu dae su colossu de su cummèrtziu eletrònicu istadunidensu cun s’agiudu de ICE, MIP Politècnicu de Milanu, CONFAPI e Netcomm.

Una dimustratzione de comente  s’innovatzione e su de istare a su passu cun is tempos, potzat premiare is piticas realidades aziendales natzionales, permitende de cumpètere in su difìtzile mercadu econòmicu globale.

Unu modu pro torrare bentu in custu perìodu istòricu caraterizadu dae una crisi econòmica profunda, agravada dae sa pandemia de su Covid-19. Una possibilidade in prus pro medas de superare is limitatziones causadas dae su cunfinamentu e dae su ritiru obligatòriu, chi in modu diretu o in modu indiretu, ant provocadu pèrdidas a su faturadu de is impresas. Annotamala cussu de su cummèrtziu eletrònicu est una pràtica cummertziale chi podet cunvìvere paris cun is butegas traditzionales de su territòriu. Pro is impresas minores e mèdias de sa Sardigna si tratat de una bentana in su presente e in su benidore, a pitzu de su cale tocat a investire.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In fines est arribbadu s’annu nou, unu 2021 càrrigu de isperu e de disafios mannos chi nos abetant. Nos lassamus a palas unu 2020 chi rapresentat unu “trèmene” de s’istòria moderna.

S’annu “betzu” chi at ammustradu totu sa fragilidade umana, in ue is Guvernos si sunt agatados a parare fronte a su Covid-19: unu nemigu piticu piticu e invisìbile.

De repente sa tziviltade “Nostra” s’est abigiada de no èssere a tretu de afrontare ogni eventu cun lestresa e in manera eficatze. A s’imbesse: si sunt commitidos errores graves chi ant ammustradu is difetos de una seguridade aparente de s’òmine modernu.

Si su 2020 s’aberiat cun s’allarme de sa Tzina s’ùrtima die de su 2019 pro su su Covid-19, cando oramai su virus tzirculaiat giai dae tempus in  su mundu, ocannu s’aberit cun s’ isperu mannu de su vatzinu.

At a chessire sa sièntzia a nos nce tirare a foras dae custu “limbu” in ue semus intrados? Pròpiu in is dies coladas, in totu Europa, est incumentzada sa somministratzione de is primas doses de vatzinu a su cale s’est sutapostu su personale sanitàriu. Unu passu importante chi at a batire a sa vatzinatzione – voluntària – de totu sa populatzione.

Emmo, pro ite depimus chircare de nde essire cantu prima dae custa pandemia, pro ite posca at a bisongiare afrontare sa ricostrutzione econòmica, mescamente de s’Itàlia. Pensare a una “natzione noa”.

Su paisu Nostru, impinnadu cun su Recovery Fund – “unu fundu pro sa ripresa cun tìtulos europeos comunos pro finantziare sa ripresa de totus is Paisos prus corfidos” — depet donares rispostas subra disafios mannos pro lantzare torra  s’economia. Sunt medas is setores in ghenugru a càusa de sa pandemia, e in medas ant pèrdidu su traballu, cun famìlias a arriscu poberesa.

Ddu mèritant totus cussos chi ant fatu sacrifìtzios durante is meses de acorru e e de medidas restritivas. Ma mescamente tocat afrontare  is disafios de su benidore pro cussos chi ant pagadu cun sa vida s’arribu de custa epidèmia, e pro is levas prus piticas, is pitzocheddos, chi non ant pòdidu prus andare a iscola.

Amus a èssere capasso, torra, de dimustrare is capatzidades infinitas nostras in is momentos de dificultades? S’isperu est chi su coràgiu siat ghiadu dae sa sabiore de  is guvernantes, pro s’àteru preparemus•nos comente sardos a afrontare ogni dificultade, comente nos at imparadu s’istòria millenària nostra.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”