Is dimissiones de is ministras Teresa Bellanova e Elena Bonetti e de su sutasegretàriu Ivan Scalfarotto, detzìdidas paris cun su capu de su partidu issoro Matteo Renzi, ant abertu sa crisi de guvernu.

Immoe Giuseppe Conte diat pòdere andare in Parlamentu pro bìdere si su guvernu tenet is nùmeros pro guvernare sena Itàlia Viva, semper chi calicunu non sigat s’esèmpiu de s’ex segretàriu de su PD.

Sa punna printzipale de Renzi est sa de donare vida a unu guvernu istitutzionale chi potzat arribbare finas a s’agabbu de sa legisladura sena Conte comente primu ministru.

Tra is papàbile ddoe est Luciana Lamorgese, atuale ministra de s’Internu. In s’ora su presidente de sa Repùblica Sergio Mattarella at pedidu una risolutzione lestra de sa crisi.

Fintzas pro ite cun su momentu istòricu chi semus bivende e cun totus is detzisiones importantes chi tocat a pigare, serbit unu guvernu unidu e chi funtzionet.

In su mentres, in custas oras, est essida a campu fintzas sa possibilidade de andare a su votu in mese de làmpadas, fintzas si pro is espertos custa est un’ipòtesi chi tocat a iscartare.

Ma s’opositzione est prus de acòrdiu pròpiu cun cust’ùrtima solutzione, màssimu Giorgia Meloni de Fratelli d’Italia, chi a bisu suo is eletziones giai si podent fàghere.

Ma in Forza Italia ddoe tenet chie allegat de unu possìbile guvernu istitutzionale, fintzas si in custu momentu est matanosu cumprèndere cale lìnia ufitziale at a pigare su partidu.

Is capos de su PD e de su M5S sunt galu disorientados dae su traimentu de Renzi e oe- a pustis chi finas a eris ant chircadu in ogni manera de evitare sa crisi de guvernu — ant fatu decraratziones graes a beru contra s’ex alleadu de guvernu.

Su capu de sa Lega, Matteo Salvini, intervenende in sa trasmissione L’Aria che tira de La7, at allegadu de su chi diat pòdere fàghere Conte: “O pigat atu de sa mancàntzia de sa majoria e andat a Quirinale giai dae custu merie, opuru si presentat a is Càmeras e referit a pitzu de sa situatzione in Parlamentu”. Ma Salvini no iscartat mancu un’àtera ipòtesi: “Conte o agatat un’àtera majoria cun s’agiudu de Mastella, opuru sa detzisione dda depent pigare is italianos in is urnas. Totu est in is manos de su presidente Mattarella, isperemus chi nos agiudet a nche cumprèndere calicuna cosa”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Eris s’11 de ghennàrgiu est incumentzadu, in Ogiastra, su segundu monitoràgiu sanitàriu contra su Covid-19, a pustis de sa proa de sa chida colada. E at a sighire finas a cras .

Ant torradu a repìtere is controllos totus is chi sunt resurtados negativos a su primu tampone de su 4 e de su 5 de ghennàrgiu, in prus ant a pòdere partetzipare puru, is persones chi non si sunt presentadas sa chida colada.

Custu est su segundu atopu de sa campagna de controllu sanitàriu aprontada dae sa Regione Sardigna “Sardi e Sicuri”, cun sa collaboratzione de su microbiòlogu e ordinàriu de s’Universidade de Padova Andrea Crisanti.

Pròpiu su professore romanu, pro custa ocasione, est lòmpidu a Lanusè e a Tortolì – duas biddas de is 23 comunos de s’Ogiastra- pro coordinare custa indàgine epidemiològica.

Ant a èssere impreados is tampones lestros nomenados “immunofluorescentes”, chi tenent una probabilidade prus arta de agatare eventuales positividades a su Covid-19.

S’adesione a su monitoràgiu de eris est istada arta: sunt istados fatos 14.700 tampones e sunt istados registrados 97 positivos a su virus.

Sa chida colada imbetzes sunt istados fatos 26.936 tampones e sunt istados registrados 142 positivos a su virus. S’isperat chi fintzas custa bia si potzat lòmpere a is matessi nùmeros.

Is resurtados de eris s’11 de ghennàrgiu ant bogadu a campu sa situatzione chi podimus osservare in custa tabella cun is datos de cada comunu ogiastrinu:

In custa prima die, podimus afirmare chi is sighentes biddas sunt resurtadas sena mancu unu casu de cundidura a su virus: Elini, Gelisuli, Osini e Talana.

A s’imbesse, s’indàgine epidemiològica, in Cardedu e in Seui, at cumproadu unu tassu artu de positivos in base a is proas fatas.

Is chi sunt resurtados positivos ant a èssere sutapostos a su tampone molecolare, e s’isperat comente s’àtera borta chi totus custas persones resurtent negativos a su virus.

Su monitoràgiu in Ogiastra est importante meda, pro ite a pustis at a èssere aviada sa campagna in larga iscala in totu sa Sardigna. Fatu fatu a s’Ogiastra, sa campagna de monitoràgiu s’at a ispostare in su Nugoresu e in su Campidanu de Mesu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”