Martis a merie in Ogiastra, s’est concruida sa campagna de controllu sanitàriu aprontada dae sa Regione Sardigna “Sardi e Sicuri”, cun sa collaboratzione de su microbiòlogu e ordinàriu de s’Universidade de Pàdova Andrea Crisanti. Ant leadu parte a su progetu totu is 23 comunos de su territòriu.

Is proas ant a èssere torradas a repìtere a pitzu de totus is chi sunt resurtados negativos a su primu tampone tra una chida, s’11 e su 12 de ghennàrgiu. In Ogiastra in custas duas dies sunt istados fatos 26.936 tampones e sunt istados registrados 142 positivos. Eris a note però est lòmpida sa noa dae su repartu Covid de su Laboratòriu de Anàlisi de s’Ispidale Santu Frantziscu de Nùgoro, chi ant curretu calicunu datu, comente su de Irbono, acanta is 6 positivos sunt resurtados a sa segundu controllu totu negativos.

S’adesione a su monitoràgiu est istada arta, prus de su 50% de is residentes de is biddas ogiastrinas at fatu su tampone. In custas duas dies sunt istados fatos 26.936 tampones e sunt istados registrados 142 positivos.

Nùmeros artos in Tertenia (29) e in Tortolì (30).

Ma ite nde essit a campu dae is resurtados de su monitoràgiu a pitzu de s’ispàinu de su virus in sa zona? Osservemus cun atentu is nùmeros de cada comunu:

Talana 2,28 %

Tertenia 1,57 %

Elini 1,26 %

Seui 1,23 %

Lotzorai 0,77 %

Biddamanna 0,71 %

Cardedu 0,69 %

Irbono 0.63 %

Tortolì 0.56 %

Gelisuli 0,56 %

Baunei/Santa Maria 0,47 %

Lanusè 0,39 %

Foghesu 0,38 %

Àrthana 0,25 %

Triei 0,15 %

Ulassa 0,12 %

Barì 0,06 %

Nissunu casu cumproadu in is comunas de: Gàiru, Jersu, Loceri, Osini, Orthullè e Ussassa.

Pro su chi interessat s’adesione a sa campagna de controllu aparitzada dae sa Regione Sardigna, podimus afirmare chi prus de su 50% de is residentes de is sighentes biddas at fatu su tampone: Triei, Ussassa, Loceri, Elini, Seui, Biddamanna, Orthullè, Gelisuli, Ulassa, Lotzorai, Foghesu, Baunei e Cardedu.

A s’imbesse, meda bassa sa partetzipatzione a s’indàgine epidemiològica de is abitantes de Talana, in ue comente giai naradu in pretzedèntzia s’est cumproadu un’artu tassu de positivos in base a is proas fatas.

De sutaliniare chi podiant partetzipare a su monitoràgiu solu is residentes dae is deghe annos in susu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In fines est arribbadu s’annu nou, unu 2021 càrrigu de isperu e de disafios mannos chi nos abetant. Nos lassamus a palas unu 2020 chi rapresentat unu “trèmene” de s’istòria moderna.

S’annu “betzu” chi at ammustradu totu sa fragilidade umana, in ue is Guvernos si sunt agatados a parare fronte a su Covid-19: unu nemigu piticu piticu e invisìbile.

De repente sa tziviltade “Nostra” s’est abigiada de no èssere a tretu de afrontare ogni eventu cun lestresa e in manera eficatze. A s’imbesse: si sunt commitidos errores graves chi ant ammustradu is difetos de una seguridade aparente de s’òmine modernu.

Si su 2020 s’aberiat cun s’allarme de sa Tzina s’ùrtima die de su 2019 pro su su Covid-19, cando oramai su virus tzirculaiat giai dae tempus in  su mundu, ocannu s’aberit cun s’ isperu mannu de su vatzinu.

At a chessire sa sièntzia a nos nce tirare a foras dae custu “limbu” in ue semus intrados? Pròpiu in is dies coladas, in totu Europa, est incumentzada sa somministratzione de is primas doses de vatzinu a su cale s’est sutapostu su personale sanitàriu. Unu passu importante chi at a batire a sa vatzinatzione – voluntària – de totu sa populatzione.

Emmo, pro ite depimus chircare de nde essire cantu prima dae custa pandemia, pro ite posca at a bisongiare afrontare sa ricostrutzione econòmica, mescamente de s’Itàlia. Pensare a una “natzione noa”.

Su paisu Nostru, impinnadu cun su Recovery Fund – “unu fundu pro sa ripresa cun tìtulos europeos comunos pro finantziare sa ripresa de totus is Paisos prus corfidos” — depet donares rispostas subra disafios mannos pro lantzare torra  s’economia. Sunt medas is setores in ghenugru a càusa de sa pandemia, e in medas ant pèrdidu su traballu, cun famìlias a arriscu poberesa.

Ddu mèritant totus cussos chi ant fatu sacrifìtzios durante is meses de acorru e e de medidas restritivas. Ma mescamente tocat afrontare  is disafios de su benidore pro cussos chi ant pagadu cun sa vida s’arribu de custa epidèmia, e pro is levas prus piticas, is pitzocheddos, chi non ant pòdidu prus andare a iscola.

Amus a èssere capasso, torra, de dimustrare is capatzidades infinitas nostras in is momentos de dificultades? S’isperu est chi su coràgiu siat ghiadu dae sa sabiore de  is guvernantes, pro s’àteru preparemus•nos comente sardos a afrontare ogni dificultade, comente nos at imparadu s’istòria millenària nostra.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”