Cun s’ordinàntzia nùmeru 40, su Presidente de sa Regione Sardigna, rimèdiat a is faddinas presentes in su provedimentu de s’11 de austu coladu, chi permitiat s’abertura de is discotecas, ma non teniat contu de is vàrios eventos programmados in s’Ìsula.

In custu modu sunt istadas sarvadas is manifestatziones in programma pro is chidas sighentes – sagras, festas e professones a s’abertu – aparitzadas prus che totu in is biddas piticas.

Unu provedimentu arribbadu a tardu mannu de note, chi ponet a notu comente si depat rispetare in ogna modu – informatzione e vigilàntzia – s’istesiamentu sotziale, evitende ammuntonamentos de gente.

S’ordinàntzia at a intrare in vigèntzia dae oe, su 14 de austu, pròpiu in ocasione de sa festa de s’Assunta, ricurrèntzia meda sentida in Sardigna.

Su Guvernu in tantu ponet in guàrdia is Regiones, pro ite sa curva de su contàgiu sighit a s’ampulare e s’ìnditze Rt natzionale est de pagu superiore de unu.

In prus sutalìniat comente sa detzisione de lassare abertas is discotecas potzat èssere un’arriscu mannu pro s’ispàinu de su virus. Difatis, in custas dies, medas giòvanas s’ant pigadu sa maladia pròpiu durante is seradas in discoteca.

Su Comitadu tècnicu sientìficu est pensamentosu meda, e si diat arriscare de tènnere una situatzione grave a beru comente a in àteras natziones europeas.

Bastat a pensare a s’Ispagna, in ue ogni die is condiduras sunt prus de 3000. Si si deperet arribbare a un’iscenàriu comente a custu peri in Itàlia, diant pòdere èssere ordinadas serradas a livellu locale, giai a cumentzare dae cabudanni.

Custos provedimentos diant a creare dannos econòmicos e sotziales graves, in unu Paisu giai iscambadu de sa serrada longa a càusa de s’apretu sanitàriu de is meses colados.

In su mentres tempus, eris in Sardigna sunt istados registrados deghessete caos de persones chi s’ant pigadu su COVID-19.

Trèighi de custos sunt migrantes isbarcados dae unu barchita in is costas de su Sulcis, is àteros tres sunt turistas: duos de custos mama e fìgiu bènnidos de sa Germània, chi sunt ricoverados a su Santìssima Trinidade, e su de tres imbetzes est unu turista in autoisolamentu a Orosei.

In s’ora in s’Ìsula est intrada in vigèntzia s’ordinàntzia de su guvernadore Christian Solinas, chi retzende sa diretiva de su Ministeru de sa Salude, at postu s’òbligu de su tampone pro chie arribbat dae tzertas natziones, in particulare dae Croàtzia, Grètzia e Malta.

Si diat pòdere cùrrere impreende sa mascarina e carrende su santu rispetende sa distàntzia e sena de pùblicu? Custos cambiamentos a sa Cursa de is Iscurtzos, pro is devotos a Santu Sarvadore non sunt mancu de pensare.

Diat pàrrere unu ricatu, pro ite est dae sèculos chi s’antigu ritu de Crabas si faghet semper in sa pròpiu manera.

Una detzisione sufrida ma resonada, a sa cale sunt arribbados is curridoris a pustis de un’addòbiu de paritzas oras cunvocadu dae su diretivu de s’assòtziu.

Sa reunione fiat istada cuncordada pro chircare unu rimèdiu, a pustis de cussa fata in Prefetura de is dies coladas.

In cussa ocasione fiant presentes su prefetu Gennaro Capo, su sìndigu Andrea Abis e su prèide don Bruno Zucca. Sa bia si fiat detzisu chi diat èssere istadu mègius a no arriscare a fàghere sa cursa, essende ca s’apretu COVID-19 no est agabbadu.

Pro s’assòtziu at faeddadu Gianni Mancosu, unu de is betzos de sa cursa, chi at ispiegadu comente s’impositzione calicunu òbligu diat pòdere isnaturare sa cursa.

Difatis non si podet pensare de impreare totus sa mascaredda e de rispetare cussas distàntzias durante su trasportu de su Santu. In prus non si podet proibire a sa gente de si pònnere in s’oru de caminu pro assìstere a sa manifestatzione.

Mancosu at naradu chi custos imponimentos diant fàghere pèrdere a sa cursa s’ànima sua e duncas ocannu est mègius a lassare istare.

Su sèneghe de is iscurtzos at peri agiuntu chi no est mancu giustu a pònnere in perìgulu sa salude de is curridoris e de sa gente meda chi cada annu partètzipant a sa manifestatzione.

Ma pro s’antiga traditzione, in programma su 5 e 6 de cabudanni, ddoe tenet galu calicunu isperu. In custas dies est prevìdidu s’ùrtimu addòbiu in Prefetura, acanta s’at a pigare sa detzisione finale.

Mancosu at lassadu sa ghenna mesu aberta, e at naradu ca si is cosas deperet cambiare e si b’aeret s’autorizatzione a cùrrere, s’assòtziu diat èssere prontu e cuntentu.

Totus sunt de ispetu bonu. Si pensant difatis chi unu modu pro festare a Santu Sarvadore cun sa màssima seguresa, si diat dèpere agatare.