Si diat pòdere cùrrere impreende sa mascarina e carrende su santu rispetende sa distàntzia e sena de pùblicu? Custos cambiamentos a sa Cursa de is Iscurtzos, pro is devotos a Santu Sarvadore non sunt mancu de pensare.

Diat pàrrere unu ricatu, pro ite est dae sèculos chi s’antigu ritu de Crabas si faghet semper in sa pròpiu manera.

Una detzisione sufrida ma resonada, a sa cale sunt arribbados is curridoris a pustis de un’addòbiu de paritzas oras cunvocadu dae su diretivu de s’assòtziu.

Sa reunione fiat istada cuncordada pro chircare unu rimèdiu, a pustis de cussa fata in Prefetura de is dies coladas.

In cussa ocasione fiant presentes su prefetu Gennaro Capo, su sìndigu Andrea Abis e su prèide don Bruno Zucca. Sa bia si fiat detzisu chi diat èssere istadu mègius a no arriscare a fàghere sa cursa, essende ca s’apretu COVID-19 no est agabbadu.

Pro s’assòtziu at faeddadu Gianni Mancosu, unu de is betzos de sa cursa, chi at ispiegadu comente s’impositzione calicunu òbligu diat pòdere isnaturare sa cursa.

Difatis non si podet pensare de impreare totus sa mascaredda e de rispetare cussas distàntzias durante su trasportu de su Santu. In prus non si podet proibire a sa gente de si pònnere in s’oru de caminu pro assìstere a sa manifestatzione.

Mancosu at naradu chi custos imponimentos diant fàghere pèrdere a sa cursa s’ànima sua e duncas ocannu est mègius a lassare istare.

Su sèneghe de is iscurtzos at peri agiuntu chi no est mancu giustu a pònnere in perìgulu sa salude de is curridoris e de sa gente meda chi cada annu partètzipant a sa manifestatzione.

Ma pro s’antiga traditzione, in programma su 5 e 6 de cabudanni, ddoe tenet galu calicunu isperu. In custas dies est prevìdidu s’ùrtimu addòbiu in Prefetura, acanta s’at a pigare sa detzisione finale.

Mancosu at lassadu sa ghenna mesu aberta, e at naradu ca si is cosas deperet cambiare e si b’aeret s’autorizatzione a cùrrere, s’assòtziu diat èssere prontu e cuntentu.

Totus sunt de ispetu bonu. Si pensant difatis chi unu modu pro festare a Santu Sarvadore cun sa màssima seguresa, si diat dèpere agatare.

Càmbiant is datas de su Fèstival de is Tacos 2020: sa rassigna cumintzat su 6 de austu (e non su 5 comente fiat prevìdidu) e si concruit su 10, in suta de su chelu isteddadu de sa note de Santu Larentzu.

Presentada a s’imprenta su 12 de làmpadas coladu, immoe sunt istados definidos fintzas is ùrtimos particulares de sa rassigna. Sa cumpangia de Cada Die Teatro est pronta a acollire su pùblicu tra is tacos ispantosos de Ogiastra in su respetu de is normas contra su Covid e duncas de sa salude de totus. A su pùblicu si pedit solu de agafare sa mascaredda; a fàghere ispassiare, emotzionare, riflètere e bisare nch’ant a pensare, comente a semper, is organizadores e is artistas in iscena.

Protagonistas de is ispetàculos de su sero, in s’ispàtziu a s’abertu de sa Cantina Antichi Poderi, Moni Ovadia, Andrea Pennacchi, Giuseppe Cederna, Max Paiella, Luca Radaelli e Alessandro Lay cun su suo Riva Luigi ’69 ’70 – Cagliari al dì dello scudetto.

Novidade de custa editzione nùmeru 21 ant a èssere is APUNTAMENTI DA FAVOLA, una genia de narratzione dedicada a is prus piticos. Is meres de domo afòrtiant galu de prus s’oferta cun un’atentu chi in is annos at crèschidu semper de prus, su ligàmene cun is pitzinnos e cun sa comunidade jersesu chi dae prus de binti annos acasàgiat su fèstival: «Una comunidade chi cun su colare de su tempus intendimus semper prus còmplitze pro unu teatru chi bivet de addòbios, sentidos e coladòrgios» sutalìniat su diretore artìsticu Giancarlo Biffi. Is pipios tra 4 e 11 annos (e is genitores issoro) chi disìgiant de èssere carrados in su mundu de sa fantasia, ant a pòdere assistire a is contos de is atores Silvestro Ziccardi e Francesca Pani in unu logu màgicu de su territòriu, mutende, durante su fèstival, a su nùmeru 328.3135034. Ant a èssere donados is inditos a pitzu de su logu e de s’oràriu chi ant a pòdere cambiare die cun die. Semper pro afortigare s’acàpiu cun su territòriu e is abitantes suos, s’at a pòdere assistire a is leturas literàrias cun protagonistas is autores de is libros e is atores dischentes jersesos de is seminàrios chi sa cumpangia contivigiat durante totu s’annu.

A mangianu ddoe ant èssere medas initziativas collaterales: su yoga in su padente de Sant’Antoni, s’apicurrada in is tacos, cunsiderados tra is prus amaliadores de Europa, is cursos de tessìngiu, sa cassa a su siddadu e is passigiadas tra is erbas ofitzinales, is percursos in bitzicleta e is bìsitas ghiadas a sa cantina Antichi Poderi.

Su Fèstival de is Tacos est sustentadu dae Comuna de Jersu, dae sa Cantina Sotziale Antichi Poderi, dae s’Assessoradu a sa Cultura e a su Turismu de sa Regione Sardigna, dae sa Fundatzione de Sardigna e dae su Mibact.