A pustis de s’abertura de is duos caminos in su 2019, s’àtera die est istada torrada a asseliare comente fiat prima s’àndala curtza pro lòmpere a s’arenile de su Sirboni.

S’Amministratzione Comunale de Gàiru at torradu a acontzare, gràtzias a s’agiudu de is voluntàrios, s’andaledda isterrada longa 250 metros chi lompet finas a mare.

Tocat a andare a ddu bìdere custu logu ammajadore, unu logu ìnnidu de bellesa rara, una de is mègius prendas de su mare ogiastrinu.

Sa Marina de Gàiru est unu bìculu de terra chi est abarradu belle immaculadu, e nois in is dies coladas amus tentu sa sorte dae ddoe fàghere un’iscapada.

Ph: Roberto Anedda

S’arena de Su Sirbone est crara e fìniga, cun s’abba de su mare colore de chelu brillante, e a fàghere de cornitze ddoe sunt is matas e is erbas chi ddoe faghent a pre-sè. Custa plaja in prus est inghiriada dae iscòllios rujos, chi allichidint su logu, comente una collana pretziosa in su tzugru de una bella fèmina. Sa plaja est perfeta pro una vacàntzia in seguresa, pro evitare sa gente a muntone, bidu su perìgulu semper presente, de su coronavirus.

Ph: Roberto Anedda

Forsis custu sartu, paris a cussu de Baunei, est su logu prus agreste de su mare ogiastrinu. Difatis, bastat a lòmpere a Cocorroci, semper in sartu de Gàiru, pro cumprèndere su sentidu prus cuadu de is costeras de sa Sardigna. Su nùmene benit dae sa còtzula, inoghe mutida cocorròcia, chi si podet agatare mesturada in mesu a sa giarra de s’arenile.

Ph: Roberto Anedda

In custu logu, chi paret unu paradisu, si betant a mare is montes Ferru e Cartucedu e donant a s’abba su nuscu de su tzinìberu.

Is bisitadores chi bolent fàghere trekking, fotografias naturalìsticas e àteras atividades turìsticas noas, ant a agatare s’istentu issoro.

Ph: Roberto Anedda

At a bastare a lòmpere in is piscinas naturales istuvidas in sa pedra dae sa bena de Bacu de Àxina, a pagu tretu a pee dae s’arenile de Cocorroci.

Inoghe, in custas dies de austu caente meda, sa gente at a agatare una bella friscura in is abba lìmpidas, in mesu a su padente.

Prus de mesu millione de italianos traballant in vacàntzia, pro unu giru de afares de casi unu milliardu e mesu de èuros.

Cun medas ufìtzios pùblicos e privados cungiados pro more dae is limitatziones contra s’ispàinu su coronavirus, is tzitades italianas sunt bòidas.

Su traballu inteligente at àpidu una resèssida manna, e custu fenòmenu at a èssere un’ocasione importante pro su setore e is impresàrios de is servìtzios turìsticos.

Unu mercadu nou, cun casi su 25% dae is italianos chi ant a traballare collegadu dae remotu, ma in villegiatura.

Ph: Roberto Anedda

Una vacàntzia carculada in mèdia de unas baranta dies, paris cun totu sa famìlia. Sa cosa prus importante pro custos turistas noos est chi su servìtziu pro su collegamentu a internet siat bonu meda.

Sa destinatzione preferida est su mare, e sa regione italiana cun prus ofertas “workstation” – postòrgios de traballu — est sa Pùllia. Fatu fatu ddoe est Sardigna, cun Crabonaxa chi est resurtada sa localidade prus seberada dae is “traballadores in vacàntzia”.

Ph: Roberto Anedda

Custu pro ite sa bidda sarda est sa chi at ofertu prus solutziones de biàgiu aposta pro custa casta de clientela.

In custas dies coladas, semus andados a bisitare su tzentru tzitadinu e su sartu de Crabonaxa. In is carreras amus agatadu gente meda passigende, e ristorantes e tzilleris fiant prenos.

Ph: Roberto Anedda

Is areniles cun medas fileras de paracos pro su sole, sunt istados ocupados dae is turistas, innamorados de is colores de su mare cristallinu.

Ph: Roberto Anedda

Chie ddoe est giai istadu ischit de ite semus alleghende. Su mare est comente su chelu craru sena nues, e is areniles lughentes che s’oru. Tocat a andare a ddos bìdere custos logos, tra is prus bellos de sa Sardigna.

Ph: Roberto Anedda

Cussigiamus de bisitare is plajas de Portu Giunco, Punta Molentis, Proceddus, Simius e de Portu Sa Ruxi. Una prus bella de s’àtera.