Pompieris e Corpus Forestale sunt intervenende in diversas zonas de s’Ìsula pro chircare de nde ochìere is fogos.

Custos is interventos printzipales:

1 – Sighimentu de su fogu in su sartu de su comunu Bonorva localidade “S’Ena ‘e Sunigo”, acanta sunt intervènnidos vàrios elicòteros lòmpidos dae is bases de su Corpus Forestale de Alà, Anela, Bosa, e Fenosu (Super Puma e Eli Fenosu) e tres canadair. Pro s’ora si pensat chi siant istados brusiados 2000 ètaros de terrenu.

2 – Sighimentu de su fogu in su comunu de Orgòsolo in localidade “Mariane”, acanta sunt intervènnidos is elicòteros de is bases de su Corpus forestale de Santu Còsomo, Fàrcana, Sòrgunu e unu Canadair. Su fogu at corpidu una superfìtzie de belle 100 ètaros, assiende peri is domos.

3 – Sighimentu de su fogu su sartu de su Comunu de Sarule, in localidade “M.Mureddisonno”, in ue sunt ant intervènnidu is elicòteros bènnidos de is bases de su Corpus forestale de Fàrcana, Fenosu e Santu Còsomo e duos canadair. Su fogu si nche at papadu unu tretu de belle 50 ètaros de buscu, lompende finas a is domos.

4 -Sighimentu de su Fogu in su sartu de su Comunu de Uri, localidade “Marroso”, acanta sunt intervènnidos 3 elicòteros bènnidos dae is bases de su Corpus forestale de Fenosu (Super Puma), Bosa e Limbara e unu canadair. Su fogu interessadu belle 400 ètaros de buscu, arribende a is domos.

5- Fogu su sartu de su Comunu de Boruta/Thiesi,localidade “Binza Manna”, in ue sunt intervènnidos 2 elicòteros de sa base de su Corpus forestale de Fenosu (Super Puma e Eli-Alà), un’elicòteru bènnidu dae sa base de Bosa e unu canadair.

6 – Fogu in su sartu de su Comunu de de Ùssana, localidade “Su Meriagu”, acanta est intervènnidu un’elicòteru bènnidu dae sa base de su Corpus forestale de Bidda de Sartu. Su fogu at caminadu fatu fatu de unu cannedu torrende a chinisu unu tretu de belle 1 ètaru.

7- Fogu in su sartu de su Comunu de de Genuri, in localidade “Zinnigas”, acanta est intervènnidu un’elicòteru bènnidu dae sa base de su Corpus forestale de Fenosu. Su fogu at brusiadu 10 ètaros de campos e unu padentinu de linnarba.

8 – Fogu in su sartu de su comunu de de Sarrocu, in localidade “Coddu de sa crèsia”, acanta est intervènnidu un’elicòteru lòmpidu dae sa base de su Corpus forestale de Pula. Su fogu nd’at boddidu 4 ètaros.

9 – Fogu in su sartu de su Comunu de de Masuddas, in localidade “Pranu Bàsciu”, acanta est intervènnidu un’elicòteru bènnidu dae sa base de su Corpus forestale de Fenosu. Su fogu at tocadu is domos foras de sa bidda.

10 – Fogu in su sartu de su Comunu de Igrèsias, in localidade “Cuccu Mannu”, in ue ant intervènnidu 2 elicòteros bènnidos dae sa base de su Corpus forestale de Pula e Marganai.

Graziano Mesina non s’agatat. Mancari is chircas a pedras pesadas de sa giustìtzia in Orgòsolo e in totu s’ìsula, de issu non s’ischit prus nudda dae tres chidas.

No at donadu perunu resurtadu su traballu de is Carabineris de su Cumandu provintziale de Nùgoro e de sa Politzia de Istadu chi l’ant chircadu in is domos e in is cuiles de is persones chi ddu diant àere pòdidu agiudare.

Is fortzas de s’òrdine at fatu inchesta peri in Gaddura, in is domos de is nebodes de Mesina, ma est comente chi nche dd’apa ingurtidu sa terra.

Gratzianeddu mancat dae su 2 de mese de argiolas, cando una sentèntzia de sa Corte de Cassatzione at cunfirmadu sa cundenna a 30 annos pro tràficu de droga.

Difatis cando is carabineris si sunt presentados a domo de sa sorre in Orgòsolo pro dd’acapiare — in ue Mesina biviat a pustis chi in su mese làmpadas 2019 fiat essidu dae presone pro decurrèntzia de tèrmines — issu non ddoe fiat.

Immoe est lòmpidu su decretu firmadu dae su presidente de sa prima setzione de sa Corte de Apellu de Casteddu Giovanni Lavena chi decrarat s’orgolesu in modu ufitziale “latitante”. Est istada duncas atzetada sa recherta de sa Procuradora generale Francesca Nanni.

S’àutu est istadu notificadu a is legales de Mesina: Beatrice Goddi e Maria Luisa Vernier.

A custu puntu is boghes chi is abogados de Mesina esserent in tratativa cun is incuirentes non tenent prus perunu fundòriu.

S’est naradu chi Gratzianeddu èsseret dispostu a acabbare su bandidòngiu in càmbiu de una pena prus lèbia, ma custas noas no ant tentu mai una cunfirma ufitziale.

Is chircas sighint a andare a in antis e non solu Sardigna, ma peri in s’istràngiu. Is incuirentes pensant chi Mesina, a pustis de sa sentèntzia de sa Cassatzione, si nche siat fuidu de presse a Còrsica cun unu gommone, ma non benit trascurada nemmancu sa pista africana: su latitante diat pòdere èssere arribbadu fintzas in is costas de sa Tunisia.

Una cosa est segura però: comente a prus de 50 annos a oe, a belle otanta annos, Mesina torrat a èssere unu bandidu pregonadu in totu su Mundu.