Sa giostra de su Grèmiu de is Mastros de Linna puru est andada bene meda. In totale sunt istadas degheoto is istellas boddidas dae sos cadderis.

Martis in Aristanis ispantosas meda sunt istadas is caladas de is Componidoris – Cristian Matzutzi -, de su Segundu – Andrea Cinus – e de su Tertzu – Graziano Pala -.

Difatis prima su capucursa est resèssidu a intzertare s’istella e sighi sighi sunt arrenèschidos is cumpàngios de sa parìglia de conca.

Custas caladas initziales sunt istadas agradèssidas meda dae is ispetadores cun sa gente emotzionada.

In prus s’istella de oro – tres in totale – pro su Segundu pro ite nd’at boddidu duas, sa prima domìniga, in sa giostra de su Grèmiu de is Massajos.

Tocat a signalare ca de is degheoto tzentros intzertados martis dae is cadderis, duos sunt de duas fèminas: Antonella Rosa e Carmen Murru – assessore a is servìtzios sotziales in su Comunu de Aristanis.

A diferèntzia de domìniga, su Componidori e su Segundu non sunt arrenèschidos in sa marrania de infichire cun s’istocu s’isteddu.

Custa borta is parìglias sunt istadas sena rùidas e no ant fatu apensamentare su pùblicu. Ispantosa meda sa parìglia de is cadderis chi ant realizadu sa piramide, cun un’acrobatzia difìtzile e perigulosa.

Sa gente at festadu meda custos tres cadderis e is caddos issoro, chi ant donadu proa de atza e abilesa in sa caminera Mazzini.

Is duos cadderis chi sunt istados leados domìniga a s’ispidale de Aristanis istant bene. A su cadderi Salvatore Montisci chi est ruidu faghende un’evolutzione cun is cumpàngios suos de parìglia, dd’ant diagnosticadu bator costas segadas e curas pro trinta dies.

Sa Sartìglia 2020 at abarrare in su coro de sa gente e in s’istòria de sa manifestatzione de s’antiga capitale de su Giudicadu de Arborea.

S’ispera de totus est chi at a giuare sa beneditzione de su Componidori cun sa pipia de maju, pro chi ocannu siat un’annu fortunosu.

In Aristanis est istada una domìniga bella a beru, cun unu pùblicu in festa chi at acudidu a tropa pro assìstere a s’antiga manifestatzione a caddu de carrasegare.

Comente a semper sa tzitade istòrica s’est fata agatare bronta e ospitale, cun sa bellesa medievale incantosa de sa capitale de su Giudicadu de Arborea.

Su Componidori – Ignazio Lombardi – at donadu a su Grèmiu de is Massajos una Sartiglia de no iscarèscere.

Sunt istadas bintiduas is istellas pitzigadas dae is cadderis, contende peri is duas boddidas dae su capucursa etotu. Difatis Lombardi est resèssidu in sa marrania de infichire cun s’ispada s’isteddu in sa calada initziale, e cussu a oto puntas in su finale cun s’istocu.

Sighi sighi, cun sa matessi arma fintzas su Segundu – Corrado Massidda – nd’at boddidu s’istella, festadu dae su pùbblicu bregiosu e cuntentu.

Bella a beru fintzas sa remada, cun su Componidori corcadu in gropas de su caddu Reinos, chi at donadu proa de s’abilesa sua in totu sa giostra.

Comente traditzione durante custa calada, su capucursa poderaiat in sa manu sa pipia de maju – su dòpiu iscetru de violas chi tenet medas significados; atzinnichende·lu at beneitu sa gente emotzionada.

Ispantosas in fines is parìglias de is cadderis chi si ant istentadu su pùbblicu ativende·si in acrobatzias difìtziles e perigulosas.

Duas rùidas ant fatu apensamentare su pùblicu: duos cadderis sunt istados leados de presse a s’ispidale de Aristanis. Mescamente sa segunda ruta, cun su cadderi Salvatore Montisci chi faende un’evolutzione cun is cumpàngios suos de parìglia, at fughidu e nde dd’est rutu a pitzu caddu.

Ditza sua sa ruida non dd’at causadu dannos graves, in su nosocòmiu dd’ant diagnosticadu unu tràuma toràtzicu ligeri. Su capucursa- istella de oro pro is duos tzentros –at cungiadu sa serada cun sa parìglia de conca, agradèssida meda dae is ispetadores.

Martis at a tocare a su Grèmiu de is Maistros de Linna, ghiada dae su Componidori Cristian Matzutzi cun sa traditzione semper protagonistas e s’ispetàculu garantidu pro totus