Usa e Tzina arribbant a pònnere sas firmas in una trègua cumertziale.

Su presidente Donald Trump e su vitze primu ministru tzinesu Liu He ant incarreladu sa gasi mutida Fase 1 chi discinit carchi crititzidade de sa pelea cumertziale tra Washington e Pechinu.

A fundamentu de s’intesa ddoe est s’impinnu de Tzina a comporare àteros 200 milliardos de mertzes e servìtzios «fatos in Usa», a no isvalutare sa muneda sua e a respetare is deretos de sa propiedade intelletuale.

Is Istados Unidos imbetzes si sunt impinnados a nde bogare sos dàtzios noos a su 15% chi diant èssere dèpidos intrare in vigèntzia su 15 de mese de idas 2019 (firmados in bista de su patu) pro casi 160 milliardos de dollaros de produtos fatos in Tzina, a is cales Pechinu diat àere torradu sa presta cun su pròpiu provedimentu a pitzu de 3.300 prodùidos americanos.

Abarrant però galu is dàtzios a su 25% a pitzu de 250 milliardos de dollaros de importatziones tzinesas, ma ant a èssere abbassadas a su 7,5% is tarifas a pitzu categorias residuales de produtos fatos in Tzina, pro belle 120 milliardos de dollaros. A su chi at naradu Trump, in sa Fase 2, custos puru nd’ant a èssere bogados.

Su presidente americanu at allegadu ora meda sena pasu, torrende gràtzias a s’iscuadra sua e a su presidente tzinesu Xi Jinping, descriende·lu comente s’amigu mannu suo.

Trump at naradu chi in su benente at a andare de persona a Tzina. In prus, at agiuntu chi si tratat de un’acòrdiu istòricu, chi at favorèssere raportos prus istàbiles e echilibrados tra is duas potèntzias mundiales.

Bregiosu meda pro s’acòrdiu peri su primu ministru tzinesu Xi chi cun una lìtera at postu a notu comete s’intesa siat importante pro totu su mundu.

In su mentrestempus Wall Street at antitzipadu sa firma lompende a màssimos istòricos noos, chi però sunt istados moderados dae s’essida de is detàllios de s’intesa. Medas analistas ant descritu s’acòrdiu de pagu sustàntzia cunforma a sos annùntzios initziales. Calicunu espertu de su setore at afirmadu chi pro sa Tzina no at a èssere cosa de pagu contu a mantènnere sa promissa de achistu de is benes Usa.

A ogna contu su presidente americanu Trump, gràtzias a custa mòvia polìtica, podet torrare unu pagu de sùlidu, a pustis de sa protzedura de incriminamentu aviada dae su Senadu.

Tres campiones de tres malàidos ricoverados sunt resurtados positivos a su virus.

S’influèntzia est lòmpida in Sardigna e sos primos campiones positivos a su virus de ocannu sunt istados agatados unas cantas die a oe dae su laboratòriu de Virologia Ispetziale de s’Aiensa Ospedaliera Universitària de Tàtari.

Su virus est istadu identificadu in duos malàidos ricoverados in sos repartos de s’Aou de Tàtari e unu in unu malàidu chi s’agatat in un’ispidale gadduresu.

Totus e tres sos campiones – faghet ischire su laboratòriu de Virologia Ispetziale – sunt resurtados positivos a su virus influente de tipu A sutatipu “H1N1 pdm09”. Pro s’ora non sunt istados identificados campiones positivos pro virus influente de tipu A sutatipu H3N2, e de tipu B giai signalados a livellu natzionale.

Su laboratòriu de Virologia Ispetziale, chi faghet parte de s’istrutura cumplessa de Microbiologia e Virologia dirìgida dae su professore Salvatore Rubino, est coordinadu dae sa professora Callina Serra.

«In Sardigna – at naradu Salvatore Rubino, diretore de sa Microbiologia e Virologia de s’Aou de Tàtari – s’istajone influente incumentzat pro su prus unu pagu a trigadiu cunfrontu a s’Itàlia. Finas a immoe, a livellu natzionale, s’istajone influente est istada caraterizada dae una tzirculatzione moderada de sos viros A/H3N2, A/H1N1 pdm09 e B, comente resurtat peri dae s’ùrtimu raportu Influnet pro sa vigilàntzia virològica. In Sardinga sa punta màssima l’amus a tènnere tra ghennàrgiu e metade de freàrgiu».

Sa regorta de sos campiones de analizare benit fata dae sos mèdicos “guardianos”, chi s’agatant in totu su territòriu de sa Sardigna. In prus s’agiunghent sos dotores de sos ispedales regionales.

Pro immoe su prus de sos campiones benit dae sos dotores de sos repartos de sos ispidales. Pretzisamente: Pediatria, Meighina e Terapia intensiva. Sos tres campiones positivos a su virus influente fiant de unu pipiu e de duos adultos.

«Sos campiones clìnicos impreados pro sa chirca de su virus influente o de sos cumponentes suos – ispiegat sa professora Callina Serra de su laboratòriu de Virologia Ispetziale – sunt istados testados cun metòdicas molecolares pro individuare tipu e sutatipu de su virus influente tzirculante. Sos datos otentos benint imbiados ogna chida, pro bia telemàtica, a su Tzentru de coordinamentu natzionale de s’Istitutu Superiore de Sanidade pro compudare s’eficatzidade de sa campagna vatzinale e s’essia de possìbiles mudaduras virales».

A livellu natzionale, sos primos duos campiones positivos a su virus influente sunt: unu de tipu A sutatipu “H1N1 pdm09” e unu de tipu B, lineàgiu Victoria, sunt istados signalados pro mèdiu de su portale InfluNet a s’acabbu de onnisantu.

In su perìudu a in antis de su cumintzu de sa vigilàntzia virològica (chida 46/2019), calicunu laboratòriu de riferimentu ant signaladu casos isolados de infetzione de virus influente in Itàlia. Mescamente, sunt istados cunfirmados tres casos de influèntzia: unu virus B/Victoria identificadu a s’acabbu de cabudanni (chida 39/2019) dae s’Azienda ospedaliera universitària de Parma in una pitzinna de 6 annos; unu virus A (H1N1) pdm09 identificadu a metade de mese de ladàmine (chida 42/2019) in su repartu de Maladias Infetivas de s’ispidale pediàtricu Giovanni XXIII de Bari in una pitzinna de 6 annos; unu virus B/Victoria identificadu a fine de mese de ladàmine (chida 43/2019) a s’IRCCS “Lazzaro Spallanzani” de Roma in unu sugetu de 24 annos contoniadu dae s’istràngiu.