Bufòngiu gratùitu in discoteca, ma analcòlicu ebbia, intrada iscontada pro chi s’impinnat a ghiare (e a non bìere alcòlicos!), iscontos in sas tarifas de sos taxi, etilòmetros finantziados dae sa Regione in sos locales noturnos, promotzione de sa campagna de sensibilizatzione “Mi ispàssio seguru” (nùmene originale in italianu “Mi diverto sicuro”). Custas sunt una pariga ebbia de sas ideas chi s’agatant in sa proposta de lege de su M5S contra sos “istragos de su sàbadu sero”.

Sunt nùmeros chi assustrant sos chi pertocant sos “Istragos de su sàbadu sero”, a dolu mannu semper prus fitianos. Unu tema cantu mai atuale comente nde essit a campu dae sos datos presentados su 2 de ghennàrgiu coladu dae su Cumpartimentu de Politzia istradale de sa Sardigna chi postu a notu s’aumentu de su nùmeru de sos imbriagos chi si ponent a sa guida. Politzia istradale e Carabineris, in su 2018 in totu Itàlia, ant marcadu 2.696 intzidentes e 109 vìtimas. Sos guidadores sutapostas a sa prova de s’etilòmetro sunt istados 207.862, e de custos su 5,2% est resurtadu positivu. Sas persones denuntziadas pro guida suta s’efetu de drogas sunt istadas imbetzes 375.

In su 2018 de 34.362 guidadores controllados dae Politzia istradale e personale sanitàriu de sa Politzia su 6,5% (uguale a 2.229) est resurtadu positivu a s’alcol, mentras su 1,6% (uguale a 537 condusidores) est resurtadu positivu a una o prus drogas.

In Sardigna – Is nùmeros cuntènnidos in sa relatzione annuale de su 2019 de sa Diretzione tzentrale pro sos servìtzios antidroga nde essit a pìgiu unu cuadru lègiu de sa Regione: sos minores denuntziados a s’Autoridade giuditziària pro reatos de droga sunt istados 71 (su 5,57 % de sos minores signalados a livellu natzionale), cun una crèschida de su 9,23% cunforma a s’annu pretzedente.

Peri sos casos de mortes provocados dae s’abusu de drogas in sa regione nostra sunt creschidos de su 50 pro chentu in un’annu, e currispondent a su 4,49% de su totale natzionale.

Diferèntzias cun su restu de Europa: mentras in sas tzitades europeas prus mannas su disaogu noturnu in su coa de chida est garantidu dae su servìtziu de trasportu metropolitanu aticu 24 oras a sa die, in sas printzipales tzitades italianas su trasportu pùblicu noturnu non podet cumpèterein perunu modu.

SA PROPOSTA DE LEGE DE SU M5S

Sa proposta de lege de su M5S – cumposta dae 8 artìculos –bolet pònnere in campu una sèria de mesuras chi potzant limitare su consumu de drogas e su consumu esageradu de alcòlicos in sos locales noturnos de sa Sardigna cun sa partetzipatzione de sas prefeturas, de sos comunos, de sas rapresentàntzias de sas fortzas de s’òrdine, de sos imprendidores de su setore, de sas iscolas e de sas universidades, pro pòdere incarrelare sos giòvanos bia sa cultura de sa responsabilidade e de sa legalidade in tema de salvaguàrdia de sa salude e de seguridade istradale.

Sa proposta de lege previdet in prus chi sa Regione promovat cada annu sa campagna istitutzionale de informatzione e de sensibilizatzione “Mi diverto sicuro”, in prus de sa promotzione de unu “còdighe èticu” chi previdat sa promotzione de diversas atziones de cuntrastu a s’abusu de alcol: s’identificatzione de su “ghiadore designadu” chi s’impinnat a non bufare alcòlicos, otenene in càmbiu s’intrada gratuita o iscontada in sos locales; s’abasciamentu de su prètziu de sas bèvidas analcòlicas; sa proibitzione de intrare in discoteca o de betare a bufare àteros alcòlicos a sas persones giai bufadas; collocare e/o megiorare su sistema de videovigilàntzia in intro e a presu de sos locales noturnos. Ancoras: pubblitzizare a s’internu de sos locales noturnos sas informatziones in sos disacatos procurados dae s’impreu esageradu de alcol e de drogas e de sustàntzias psicotropas.

Est prevìdudu pro sàbadu su 4 de ghennàrgiu 2020 su cumintzu de sos iscontos ierriles chi ant a pòdere durare non prus sessanta dies.

Sa data est istada atatzada in sa base a su Decretu Assessoriale de sa Regione Autònoma de sa Sardigna n.8 de su 15/06/2011 chi istabilit s’inìtziu de sas bèndidas de acabbu istajone in sa prima die feriale a in antis de sa Pasca de is Tres Res, (iscontos de ierru) e in su primu sàbadu de su mese de argiolas (iscontos istadiales).

In sas baranta dies a in antis de sa die de inghitzu de is iscontos, duncas a printzipiare dae su 25 de onniasantu 2019, sunt proibidas is bèndidas promotzionales e is bèndidas de licuidatzione pro sa mertze non alimentare.

Pro su cumintzu de is iscontos, comente acraridu dae su Servìtziu Atividades Produtivas, non est obbligatària perunu avisu.

IS CUSSÌGIOS DE CONFCOMMERCIO

Pro comporare bene sa mertze iscontada, sa Confcommercio finas ocannu donat calicunu inditu:

Càmbias: sa possibilidade de cambiare su produtu a pustis chi est istadu comporadu dipendet dae sa voluntade de su butegheri, francu chi s’ogetu non siat segadu o non cunforme (art. 1519 ter cod. tzivile introduidu dae su D.L.vu n. 24/2002). Capitende custu su butegheri est obligadu a dd’acontzare o a ddu cambiare cun un’àteru e, si no est impossìbile, su produtu depet èssere bèndidu a unu prètziu prus bàsciu o si depet torrare su dinari a su cliente. Su compratore però depet denuntziare su difetu intro duos meses dae sa data de s’iscoberta de sa magàngia.

Prova de su produtu: non ddoe tenet nisciunu òbrigu. Dipendet dae sa volontade de su negotziante.

Pagamentos: su butegheri est obligadu a atzetare is pagamentos cun carta de crèditu.

Produtos in bèndida: sa cosa posta in bèndida cun s’iscontu depet tènnere caràtere istajonale o de moda e si non si bendet intro unu tzertu perìodu de tempus depet èssere posta in bèndida a istracu baratu. Mancari gasi, però no est proibidu a pònnere in bèndida fintzas mertze de àteras s’istajones.

Indicu de su prètziu: su butegheri est obligadu a pònnere su prètziu normale de bèndida, s’iscontu e su prètziu finale.