Tres campiones de tres malàidos ricoverados sunt resurtados positivos a su virus.

S’influèntzia est lòmpida in Sardigna e sos primos campiones positivos a su virus de ocannu sunt istados agatados unas cantas die a oe dae su laboratòriu de Virologia Ispetziale de s’Aiensa Ospedaliera Universitària de Tàtari.

Su virus est istadu identificadu in duos malàidos ricoverados in sos repartos de s’Aou de Tàtari e unu in unu malàidu chi s’agatat in un’ispidale gadduresu.

Totus e tres sos campiones – faghet ischire su laboratòriu de Virologia Ispetziale – sunt resurtados positivos a su virus influente de tipu A sutatipu “H1N1 pdm09”. Pro s’ora non sunt istados identificados campiones positivos pro virus influente de tipu A sutatipu H3N2, e de tipu B giai signalados a livellu natzionale.

Su laboratòriu de Virologia Ispetziale, chi faghet parte de s’istrutura cumplessa de Microbiologia e Virologia dirìgida dae su professore Salvatore Rubino, est coordinadu dae sa professora Callina Serra.

«In Sardigna – at naradu Salvatore Rubino, diretore de sa Microbiologia e Virologia de s’Aou de Tàtari – s’istajone influente incumentzat pro su prus unu pagu a trigadiu cunfrontu a s’Itàlia. Finas a immoe, a livellu natzionale, s’istajone influente est istada caraterizada dae una tzirculatzione moderada de sos viros A/H3N2, A/H1N1 pdm09 e B, comente resurtat peri dae s’ùrtimu raportu Influnet pro sa vigilàntzia virològica. In Sardinga sa punta màssima l’amus a tènnere tra ghennàrgiu e metade de freàrgiu».

Sa regorta de sos campiones de analizare benit fata dae sos mèdicos “guardianos”, chi s’agatant in totu su territòriu de sa Sardigna. In prus s’agiunghent sos dotores de sos ispedales regionales.

Pro immoe su prus de sos campiones benit dae sos dotores de sos repartos de sos ispidales. Pretzisamente: Pediatria, Meighina e Terapia intensiva. Sos tres campiones positivos a su virus influente fiant de unu pipiu e de duos adultos.

«Sos campiones clìnicos impreados pro sa chirca de su virus influente o de sos cumponentes suos – ispiegat sa professora Callina Serra de su laboratòriu de Virologia Ispetziale – sunt istados testados cun metòdicas molecolares pro individuare tipu e sutatipu de su virus influente tzirculante. Sos datos otentos benint imbiados ogna chida, pro bia telemàtica, a su Tzentru de coordinamentu natzionale de s’Istitutu Superiore de Sanidade pro compudare s’eficatzidade de sa campagna vatzinale e s’essia de possìbiles mudaduras virales».

A livellu natzionale, sos primos duos campiones positivos a su virus influente sunt: unu de tipu A sutatipu “H1N1 pdm09” e unu de tipu B, lineàgiu Victoria, sunt istados signalados pro mèdiu de su portale InfluNet a s’acabbu de onnisantu.

In su perìudu a in antis de su cumintzu de sa vigilàntzia virològica (chida 46/2019), calicunu laboratòriu de riferimentu ant signaladu casos isolados de infetzione de virus influente in Itàlia. Mescamente, sunt istados cunfirmados tres casos de influèntzia: unu virus B/Victoria identificadu a s’acabbu de cabudanni (chida 39/2019) dae s’Azienda ospedaliera universitària de Parma in una pitzinna de 6 annos; unu virus A (H1N1) pdm09 identificadu a metade de mese de ladàmine (chida 42/2019) in su repartu de Maladias Infetivas de s’ispidale pediàtricu Giovanni XXIII de Bari in una pitzinna de 6 annos; unu virus B/Victoria identificadu a fine de mese de ladàmine (chida 43/2019) a s’IRCCS “Lazzaro Spallanzani” de Roma in unu sugetu de 24 annos contoniadu dae s’istràngiu.

Antonietta Pintus est morta a pustis de duas dies de sunferèntzias in s’ispidale Brotzu.

Tropu graves is feridas de sa fèmina de otantachibant’annos casteddaja causadas dae s’atumbada contra unu tziclomotore.

Sa fèmina fiat istada investida rugrende is istrìscias pedonales a s’artària de bia Tramontana dae una moto modellu Yamaha X City ghiada dae un’òmine de 54 annos residente in Casteddu chi fiat andende conca a Viale Diaz.

Sa sennora Pintus est istada sucùrrida dae un’ambulantza de su 118 e leada de presse a su Brotzu cun su còdighe ruju pro more de is cunditziones graves suas.

Un’àtera rughe duncas s’agiunghet in is caminos sardos. In Sardigna is datos de is intzidentes cun mortos sighent a èssere preocupantes meda.

Difatis bastat a donare una mirada a is datos Istat pro cumprèndere sa gravidade de sa situatzione: unu mortu ogna tres dies. Nùmeros in contratendèntzia cunfrontu a sa mèdia italiana, in ue si registrat un’abbasciamentu de is intzidentes istradales e de is vìtimas puru.

Peri in Sardigna ddoe est istadu unu ismenguamentu de is mortos causados dae intzidentes istradales, difatis dae su 2008 a su 2018 su tassu de mortalidade est faladu a su 0,9%, ma si ddu cunfrontamus a su datu italianu, 19%, est casi insignificante. Peus ancora su tassu de mortalidade in su perìudu curtzu – tra su 2017 e su 2018 – in Sardigna semus passados dae 2,6 a 3 mortos ogna chentu intzidentes. A livellu italianu imbetzes est abarradu belle invariadu, e est meda prus bàsciu de cussu isulanu (1,9).

Si si cunsìderant is datos de is ùrtimos degh’annos, annotamala, morint semper prus pedones: in su 2010 is mortes de is pedones in s’Ìsula rapresentaiant su 10,4% de su totale, in su 2018 sa pertzentuale est belle addopiada, lompende a su 20%.

A pagare prus de totus sunt is betzos, categoria prus dèbile. Su 47,6% de is pedones investidos tenet prus de 65 annos, e in sa matessi fàscia de edade (65+) si registrat su tassu de mortalidade prus artu (7,7 pro 100 mìgia abitantes). Comente in su casu de sa sennora Pintus.