Dae eris, su 1 de ghennàrgiu 2020, is monopàtinos elètricos podent èssere impreados in totus is tzitades de Itàlia.

Cun sa publicatzione in Gazeta Ufitziale de sa norma chi ddos acomunat a is bitzicletas si tapat un’istampu normativu e – difatis – si donat su bia lìbera a custos mezos a duas rodas.

Ant a pòdere èssere imprendos petzi in is pistas tziclàbiles e in sas zonas 30 (duncas no in sas zonas cun su lìmite a 50 e in is martziapees) e s’ant a pòdere parchegiare in sos logos pro is bitzicletas e is motos (peri si, essende sena targas, est impossìbile a ddis pònnere contraventziones).

In Itàlia tzìrculant prus de 100 mìgia monopàtinos. Unu rècord dèpidu a sa manibilidade istraordinària issoro e a sa possibilidade de èssere carrigados sena fadiga apetotu. Casteddu puru no est de mancu: bidu su clima belle semper bonu e is medas pistas tziclàbiles, semper prus persones ddos impreant pro s’ispostare.

Comente iscriet Repùbblica, sa lege 160 de su 27 de mese de idas 2019 at legalizadu s’impreu de custos mezigeddos a 2 rodas. Abbarrant a foras de sa norma is hoverboard e is monoroda (chi sunt galu sutapostos a is normas severas de su decretu Toninelli chi permitet a ddos impreare petzi in s’àmbitu de s’isperimentatzione de is comunos) ma pro is monopàtinos ddoe est su lassapassare definitivu: nudda patente o asseguratzione, nemancu pro is minorennes e nudda cascu. Invetzes pro su chi pertocat is limitatziones de potèntzia, cussos legales podent tènnere una potèntzia màssima de 500w e podent andare a una velotzidade àssima de 20 km/h.

Giai in is meses colados fiat partida s’isperimentatzione a Cuartu Sant’Aleni de monopàtinos e segway a su postu de màchinas e motos.

Imbetzes in is primas dies de mese de idas in Bia Tigellio a Casteddu, ddoe est istadu un’intzidente istradale tra unu monopàtinu e una màchina: una filipina de 38 annos cun unu veìculu elètricu est istada sucursa dae un’ambulantza de su 118. A pustis est istada leada a su Prontu Sucursu de s’ispidale Santìssima Trinidade pro is curas mèdicas.

Un’asilu nidu nou in mesu de su birde de su Parcu de Monti Claru, in una zona urbana collegada diretamente cun is printzipales artèrias chi unint su cabulogu a is Comunos de sa Tzitade Metropolitana de Casteddu.

Su progetu de s’òpera, chi at a costare 3 milliones de èuros e at a èssere finantziadu cun is risursas destinadas a su fàbricu de asilos nidu de su Fundu pro s’Isvilupu e sa coesione 2014-2020, est istadu annuntziadu dae su sìndigu Paolo Truzzu a pustis de sa firma de s’atu agiuntivu tra su primu tzitadinu metropolitanu e su ministru pro su Sud e sa coesione territoriale Giuseppe Provenzano.

«Bolimus donare un’atentzione particulare a sas polìticas de sa famìlia, e in cust’àndala su mese de ladàmine coladu amus presentadu a su ministeru sa recherta de finantziamentu pro un’asilu nidu nou chi potzat agiudare is babbos e is mamas chi bivent o traballant in Casteddu», ispiegat Truzzu.

Sa punna de s’interventu est cussa de megiorare e ativare su servìtziu de asilu nidu de sa Tzitade Metropolitana de Casteddu cun sa realizatzione de unu edifìtziu nou chi rispetet sa normativa in vigèntzia, postu in unu cuntestu seguru, fàtzile a ddoe lòmpere e chi potza acollire sena diferèntzias totus is pipios de s’hinterland gràtzias a sa positzione istratègica sua. «Su finantziamentu fiat destinadu a is Comunos cabulogu, ma amus bòlidu agatare unu logu chi tenneret una collocatzione favorèvole pro ospitare fintzas is pipios de àteros tzentros de sa Tzitade Metropolitana», at craridu Truzzu.

Su nidu nou, chi at a pòdere acasagiare belle 70 pipios e at a ocupare una superfìtzie lorda de 950 mq, at a tènnere unu parchègiu privadu, una coghina cun mensa, e unu parcu esternu mannu cun giogos e fintzas unu tretu pro is animales. S’interventu previdet fintzas sa frunidura de mobìlia, giogos e atretzadura vària siat pro is internos siat pro is esternos.

«Semus traballende pro agatare risursas de àmbitos de cumpetèntzia nostra chi potzant donare profetu a totu su territòriu metropolitanu», afirmat su diretore generale e responsàbile de su Patu pro s’Isvilupu de sa Tzitade Metropolitana Stefano Mameli. «Nos amus a ativare pro chi s’òpera siat fata a sa lestra pro dda pònnere abèrrere in pagu tempus – agiunghet Mameli – e at a tocare a pensare cales ant a èssere is modalidades de gestione de su servìtziu, tenende contu peri de s’esperièntzia de s’asilu metropolitanu chi giai esistit, chi oe òspitat belle 40 pipios», agiunghet Mameli.

Fintzas a su 1 e ghennàrgiu 2019 sos pipios residentes in su territòriu de sa Tzitade Metropolitana in sa fàscia de edade finas sos 3 annos fiant 7837, de custos 2388 (su 30,5 pro chentu) fiant residentes in sa tzitade de Casteddu. Su tassu mèdiu de natalidade de s’àrea metropolitana est de su 5,5 pro chentu, cun sa pertzentuale prus arta in su Comunu de Setimu (8,4 pro chentu) e sa prus bàscia in su Comunu de Casteddu (4,8 pro chentu). Negativu su tassu mèdiu de crèschida de sa populatzione (- 2,1 pro chentu), cun sa pertzentuale prus arta semper a Sètimu (+ 7,3 pro chentu) e Ceraxus, imbetzes, cussa prus bàscia (- 18,4 pro chentu). Unu tassu pagu pagu positivu in su cabulogu, cun una crèschida de sa 1 pro chentu.