At bìnchidu s’Udinese. Su Casteddu no est arrenèschidu a riscatare sa partida pèrdida contra sa Lazio.

In sa Dacia Arena de Ùdine est acabbada 2-1 pro is meres de domo cun is goal realizados dae Rodrigo De Paul e SekoFofana. Pro is casteddajos su goal de Joao Pedro.

Rolando Maran a pustis de sa partida at nàradu ca is giogadores ruju-blu ant giogadu una bona partida, ma est abarradu delusu pro su resultadu.

A is friulanos ddis serbiant puntos pro s’istesiare dae sa zona retrotzessione e ant meritadu de bìnchere pro sa gana dimustrada.

Su primu goal de s’Udinese est istadu realizadu dae De Paul, cun unu bellu tiru a s’acabbu de su primu tempus.

Su Casteddu est renèssidu a aderetare su resultadu cun Joao Pedro a sa coa de su segundu tempus.

Pròpiu su brasilianu est istadu su protagonista de s’ùrtima vitòria casteddaja in Friuli, cun su goal chi at permìtidu a s’iscuadra de s’impònnere in s’istajone 2017/2018.

Ma pustis pagu tempus Fofana at marcadu sa rete de sa vitòria de s’Udinese cun cuntentesa manna de is giogadores allenados dae Ivan Gotti.

Mancari is ùrtimas partidas pèrdidas, su Casteddu at cungiadu unu 2019 andadu bene meda, cun bonas proas, faghende sonnare is tifosos isulanos.

A s’incumentzada de s’annu nou, su Casteddu at giogare contra sa Juventus. Una partida difitzile meda a Torinu cun is biancu-nieddos, ca sunt primos in classìfica paris cun s’Internazionale de Milanu.

Sa possibilidade pro is ruju-blu de mustrare su valore issoro, e festare galu de prus is 50 annos de s’iscudetu de su 1969/1970 cun s’iscuadra de Gigi Riva.

At a mancare su difensore Pisacane ca in sa Dacia Arena de Ùdine est istadu bogadu a foras dae s’arbitru, cun su cartellinu ruju. At a torrare su portieri Olsen ausente pro iscualìfica in is ùrtimas 4 partidas, e s’isperat finas calicunu de is infortunados.

«Mantènnere firmu e continu su raportu cun is Diòtzesis sardas pro more chi totus is interventos realizados pro mèdiu de sa collaboratzione cun sa Regione siant adeguados e produtivos pro sa gente nostra».

Dd’at naradu su Presidente de sa Regione Christian Solinas atopende custu mangianu in Casteddu totus is cumponentes de sa Ces, sa Cunferèntzia episcopale sarda.

«Est pretzisu a torrare a iscobèrrere in sa polìtica su balore de s’iscurtu» at craridu su Presidente in s’interventu suo, a pustis de sa relata de is pìscamos sardos a pitzu de is temas sotziale mannos e de isvilupu pro s’Ìsula.

Su Capu de sa Giunta at cumpartzidu su bisòngiu de promòvere e atualizare su protocollu de intesa tra sa Regione e sa Cunferèntzia: «pro mèdiu de atziones chi dongent lestrasa a cussas protzeduras pro s’acumprimentu de is interventos subra benes culturales, sanidades, formatzione professionale, incroimentu sotziale».

Solinas at torradu a nàrrere fintzas: «s’atentu de sa Regione pro is Oratòrios, comente istruturas de annestru, presìdiu pro is territòrios e puntu de riferimentu pro medas pitzocheddos». Ponende in evidèntzia comente fintzas in s’ùrtimu paperi de riprogrammatzione finantziària: «sa Giunta apat tentu una sensibilidade significativa in custa diretzione».

Collende is rechestas manifestadas dae is pìscamos – chi ant espressadu satisfatzione manna pro s’interventu de su presidente Solinas – su Guvernadore ddis at pedidu: «unu contribuidu ùtile pro cuntrastare s’ispopulamentu, pro torrare a donare dignidade a su traballu e pro torrare a iscrìere su sistema de sa formatzione professionale chi siat a tretu de parare barra a s’abbandonu iscolàsticu».