Sos finantzieris de Casteddu ant postu suta indàgine totus sos tzitadinos chi retzint formas de assistèntzia econòmica comente su rèditu de tzitadinàntzia e s’indennidade de disocupatzione, formas particulares de suventziones istatales riservadas a cussa fàscia de populatzione chi s’agatat in cunditziones econòmicas discumbeniosas o a chie at pèrdidu dae pagu su traballu.

Pro su chi pertocat su rèditu de tzitadinàntzia, mesura istituida comente istrumentu de polìtica ativa de su traballu, de cuntrastu a sa poberesa, a sa diseguagliàntzia e a s’esclusione sotziale, diat a tocare petzi in presèntzia de particulares cunditziones autotzertificadas dae su chi presentat sa domanda pro more de dimustrare non solu sa cunditzione sua de dificultade, ma fintzas cussa de sos cumponentes su nùcleu familiare suo.

In custu cuntestu si còllocat su controllu fatu dae sa Guàrdia de Finàntzia, mutida a compudare si sas risursas postas a disponimentu dae s’Istadu andant a benefìtziu de chie nde tenet a beru bisòngiu.

In totus custas tzircustàntzias, sos sugetos retzidores abusivos de su rèditu de tzitadinàntzia sunt istados denuntziados dae s’Autoridade Giuditziària e in prus sunt istados sinnalados a s’INPS chi at provìdidu a su cuberamentu de sas summas otènnidas in manera ingiusta.

Is resurtados de sos controllos de sas Fracas Grogas ant portadu a s’iscoprimentu de 14 casos in ue su rèditu de tzitadinàntzia fiat istadu otentu in manera irregulare, sena dispònnere de sos recuisidos netzessàrios.

B’at tentu posca àteras situatziones particulare iscopridas dae sas finantzas chi però non ant portadu a sa denùntzia a sa Magistradura ma solu a sa rèvoca de su benefìtziu, opuru a sa recùperu de una parte de su dinare chistidu in prus.

Sas divisas grogo-birde, durante s’inghesta issoro, ant tentu contu però fintzas de àteras formas de agiudu econòmicu destinadas a sugetos in dificultade: sas indennidades de disocupatzione.

A pustis de medas interventos, su Corpus at iscollidu 102 traballadores in nieddu chi pigaiant sa disocupatzione. Àteros sugetos, imbetzes, ant sighidu a godire de sos ammortizadores sotziales evitende de comunicare a s’INPS de àere agatadu traballu.

A custu propòsitu, ocannu sunt istados averiguados 392 casos de sugetos chi traballaiant in nieddu o in modu irregulare.

Dae eris, su 1 de ghennàrgiu 2020, is monopàtinos elètricos podent èssere impreados in totus is tzitades de Itàlia.

Cun sa publicatzione in Gazeta Ufitziale de sa norma chi ddos acomunat a is bitzicletas si tapat un’istampu normativu e – difatis – si donat su bia lìbera a custos mezos a duas rodas.

Ant a pòdere èssere imprendos petzi in is pistas tziclàbiles e in sas zonas 30 (duncas no in sas zonas cun su lìmite a 50 e in is martziapees) e s’ant a pòdere parchegiare in sos logos pro is bitzicletas e is motos (peri si, essende sena targas, est impossìbile a ddis pònnere contraventziones).

In Itàlia tzìrculant prus de 100 mìgia monopàtinos. Unu rècord dèpidu a sa manibilidade istraordinària issoro e a sa possibilidade de èssere carrigados sena fadiga apetotu. Casteddu puru no est de mancu: bidu su clima belle semper bonu e is medas pistas tziclàbiles, semper prus persones ddos impreant pro s’ispostare.

Comente iscriet Repùbblica, sa lege 160 de su 27 de mese de idas 2019 at legalizadu s’impreu de custos mezigeddos a 2 rodas. Abbarrant a foras de sa norma is hoverboard e is monoroda (chi sunt galu sutapostos a is normas severas de su decretu Toninelli chi permitet a ddos impreare petzi in s’àmbitu de s’isperimentatzione de is comunos) ma pro is monopàtinos ddoe est su lassapassare definitivu: nudda patente o asseguratzione, nemancu pro is minorennes e nudda cascu. Invetzes pro su chi pertocat is limitatziones de potèntzia, cussos legales podent tènnere una potèntzia màssima de 500w e podent andare a una velotzidade àssima de 20 km/h.

Giai in is meses colados fiat partida s’isperimentatzione a Cuartu Sant’Aleni de monopàtinos e segway a su postu de màchinas e motos.

Imbetzes in is primas dies de mese de idas in Bia Tigellio a Casteddu, ddoe est istadu un’intzidente istradale tra unu monopàtinu e una màchina: una filipina de 38 annos cun unu veìculu elètricu est istada sucursa dae un’ambulantza de su 118. A pustis est istada leada a su Prontu Sucursu de s’ispidale Santìssima Trinidade pro is curas mèdicas.