Grandu resèssida de Nicola Bartolini in is Mundiales giaponesos de ginnàstica.

S’atleta sardu de sa Pro Patria Bustese faghet prestatzione etzetzionale a su corpus lìberu e divenit campione de su mundu.

S’Itàlia torrat in su pòdiu prus artu a 24 annos dae s’ùrtima vitòria de Yuri Chechi a is aneddos. In s’ispetzializade, in passadu, solu unu brunzu in su 1966 cun Menichelli.

Est su segundu oro asulu in s’istòria: su primu fiat arribbadu in su 1913 cun Giorgio Zampori. Bartolini trìunfat cun su puntègiu de 14.800 (6.2 su Puntègiu D). A palas suas su giaponesu Kazuki Mina•mi (14.766) e su finlandesu Emil Soravuo (14.700).

Su cuartesu si fiat presentadu a s’atu conclusivu cun su segundu puntègiu de calìfica (14.966, 6.2 sa nota de partèntzia) e teniat totu is cartas in règula pro pigare in su pòdiu, ma a sa fine at fatu meda de prus de su chi si pensaiat.

In abrile Bartolini aiat bintu una medàllia de brunzu a is Europeos: de sa rassegna continentale est istadu capassu de artziare su Puntègiu D de bator dètzimos, fundamentale pro pòdere intrare in màssima cumpetitzione internatzionale.

Un’aumentu de is dificultades chi però no at influidu in sa limpiesa de s’esecutzione, su puntu suo de fortza chi fintzas oe dd’at permìtidu de bìnchere cun unu puntègiu netu de 14.800 (6.2).

Sa diferèntzia intre su sardu e totus is aversàrios suos dipendent pròpiu dae custu: s’esertzìtziu suo est dae manuale de su Prùere de Magnèsiu pro sa netesa de is lìnias, sa pretzisione in totu is arribos, is imperfetziones limitadas a s’etzessu,

Duos “avitamentos” e mesu a in antis, dòpiu “càrpiu” cun mesu giru, Tsukahara avitadu. Unu e mesu duos avitamentos, duos e mesu-unu a in antis. Serrada cun unu super triplu avitamentu. Custos is elementos prus significativos de una prova colada oramai a s’istòria e chi aprèsiat a Nicola Bartolini a is mannos de sa ginnàstica artìstica italiana.

Una bella satisfatzione a pustis de sa delusione de no àere pòdidu partetzipare a is Giogos de Tòkyo 2020. Su ginnasta asulu s’est postu a palas aversàrios de bàlia comente su giaponesu Kazuki Minami (14.766, chi moviat dae 6.5), su finlandesu Emil Soravuo (14.700, 6.0), e su sudcoreanu Ryu Sunghyun (14.600)

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

A s’Unipol Domus su Casteddu, contra sa Sampdoria, at torradu a bìnchere. Custa est sa prima vitòria de s’istajone chi est lòmpida a pustis sa de oto giorronada.

Su resurtadu finale est de 3-1 pro is meres de domo: pro is casteddajos is gol sunt istados marcados dae Joao Pedro a su de 4 minutu de su primu tempus, a su de 15 de su segundu tempus dae Caceres, e in su finale un’àtera rete de Joao Pedro at cungiadu sa partida, a pustis chi su dorianu Thorsby at torradu a abèrrere sa partida marchende su 2-1 .

Una vitòria de importu mannu pro ite immoe su Casteddu nd’est essidu dae s’ùrtimu postu de sa classìfica e si ponet a su de 17 postu, a 6 puntos de distàntzia pròpiu dae sa Sampdoria.

Is òmines de Mazzarri ant giogadu una partida bella a beru, cun is atacantes Keita Balde e Joao Pedro chi ant postu in dificultade manna sa defensa aversària.

Tzertu, sa rete de su brasilianu in su comintzu de sa partida, at postu sa gara in betada pro is sardos, ma is lìgures non sunt abarrados a castiare e una pariga de minutos a pustis, cun Candreva, ant pitzigadu su palu de is sardos, chi si dd’ant iscampada gràtzias a Cragno.

Su segundu tempus si alluet cun duas iscutas de pee de Keita Balde, in chirca de marcare sa segunda rete, chi callentat is manos de su portieri dorianu Audero.

Su gol pro is casteddajos lompet a pustis de una punitzione de Marin, rebàtida dae sa barriera aversària, cun Caceres lestru meda a torrare a iscùdere da botza bia sa porta, cun una iscantzada chi at corpidu Thorsby, chi at collionadu s’ùrtimu defensore blu-chilciadu.

Ma sa defensa de su Casteddu si dormit a su minutu 82, cun su matessi Thorsby chi cun unu corpu de conca marcat sa rete de su 2-1.

Sa Sampdoria si betat a in antis pro chircare su parègiu, e in un’atzione cuntestada meda – cun probàbile rigore a dannu de s’atacante Caputo – su Casteddu cùngiat sa partida gràtzias a una bella calada fatu de sa fàscia destra de s’argentinu Nandez, chi serbit sa botza de su 3-1 a Joao Pedro.

Est a pustis de custa atzione chi s’àrbitru che nche bogat dae su campu a s’allenadore D’Aversa pro more de is chèiscias meda.

In sa partida chi benit su Casteddu,at a giogare foras de domo, in s’istàdiu Artemio Franchi, contra sa Fiorentina.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22